Seráke ita hatene katak Na'i Maromak ne'e iha karakteristika prinsipál 3 hanesan :
1. omnipresent,
2. omniscient, no
3. omnipotent?
Liafuan sira ne'e signifika saida? Liafuan omni mai hosi liafuan Latin ne'ebé signifika hotu-hotu (all). Liafuan sira ne'e la temi iha Bíblia, maibé liafuan sira ne'e deskrebe karakteristika Maromak nian.
Mai ita haree definisaun idaidak.
1. Omnipresent (Jeremias 23:24; Provérbios 15:3; 1Reis 8:27, etc)
Na'i Maromak Nia prezensa iha fatin hotu-hotu.
Na'i Maromak iha fatin ne'ebé de'it, iha tempu ne'ebé de'it, besik ba ema hotu no buat hotu.
Na'i Maromak hakonu Lalehan no mundu.
Hanesan ema Kristaun, ita harohan "Na'i Maromak mai horik hó ha'u ohin loron", orasaun ida ne'e hatudu ita nia presiza ba Maromak Nia prezensa, maibé tuir loloos, ita la presiza halo orasaun ida hanesan ne'e. Tanbasá? Tanba Na'i Maromak iha ne'e ona no iha fatin hotu-hotu iha tempu ne'ebé de'it. Ita Nia orasaun tuir loloos ne'e hanesan ne'e " Na'i, favór halo ha'u sente ita boot Nia prezensa iha ha'u nia moris"
2. Omniscient (Salmo 147:5; Salmo 139:4; 1João 3:20; Mateus 10:30 etc).
Na'i Maromak hatene buat hotu. Relasiona ho matenek, la iha limitasaun ba Maromak.
Na'i Maromak iha matenek hotu no Nia hatene buat hotu.
La iha detik/ segundu ida mak liu mak Na'i Maromak la hatene.
La iha buat ida mak Na'i Maromak presiza atu aprende ka presiza hanoin.
La iha buat ida mak halo Na'i Maromak surpreza, tanba Nia hatene buat hotu.
Ita haksolok tanba Na'i Maromak hatene ita nia presiza antes ita husu. Konsidera versu tuir mai:
"Maibé kuandu ó halo orasaun, keta repete beibeik liafuan neʼebé hanesan, hodi tuir toman husi nasaun seluk, tanba sira hanoin katak Maromak sei rona sira tanba sira uza liafuan barabarak. Tan neʼe, keta halo hanesan sira, tanba imi-nia Aman hatene saida mak imi presiza antes imi husu ba nia. Mateus 6:7-8
3. Omnipotent (Daniel 4:35; Isaias 43:13; Isaias 14:27; Efeso 1:19; Apokalipse 19:6 etc).
Maromak ne'e iha podér hotu (Maromak poderozu).
Podér hotu partensi ba Maromak. Na'i Maromak mak na'in ba podér hotu.
Nia bele halo buat saida de'it no buat hotu.
Na'i Maromak nunka kolen no forsa nafatin ba nafatin.
Nia la presiza toba. Ita haree buat ne'ebé imposivél maibé ba Maromak buat hotu posivél (Lukas 1:37).
Mai ita adora Na'i Maromak iha tempu ne'ebé de'it no iha fatin ne'ebé deit. Bainhira ita la kompriende buat ruma kona-ba Maromak, hahí Nia liuhosi adorasaun iha espiritu no lia loos (João 4:23-24).
✝️✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
 |
| Mateus 6:7-8 |
0 comments:
Post a Comment