Tuir versu ida ne'e, Na'i Maromak Nia hakarak ne'e diʼak, aseitavél no perfeitu. La iha indikasaun hosi Na'i Maromak Nia planu ba ita ne'ebé la di'ak, ne'ebé bele destroi ita nia moris. Pelu kontrariu, saida mak Aman Maromak planu ba ita mak diʼak, aseitavél no perfeitu. Liafuan tolu ne'e bele halo ita moris hó paz no konfiansa.
Mai ita haree kle'an liu liafuan sira ne'e idaidak.
Dahuluk, Na'i Maromak Nia hakarak ne'e di'ak.
Na'i Maromak Nia planu ne'e eselente no benefisiál. Dalaruma ita haree lahanesan ne'e. Maibé ita tenke hanoin "katak Maromak halo ninia serbisu hotu laʼo ho loloos atu lori diʼak ba sira neʼebé hadomi nia, sira neʼebé nia bolu ona tuir ninia hakarak" Roma 8:28. Aman Maromak sei kuida ita nia moris tomak, tanba saida? Tanba Na'i Maromak ne'e di'ak. Salmo 145 afirma katak "Na'i hatudu laran-diʼak ba kriatura hotu"
Daruak, Na'i Maromak Nia planu ba ita ne'e aseitavél. Na'i Maromak simu ita bazeia Na'i Jesus Nia sakrifisiu iha kruz. Bainhira ita simu ona Na'i Jesus hanesan ita nia Salvadór, Na'i Maromak simu ita, la'os tanba ita nia di'ak maibé tanba Na'i Jesus Nia sakrifisiu. Bainhira ita aseita Na'i Jesus, Na'i Maromak Nia espiritu santu mai horik hó ita no Na'i Maromak Nia futarlia sai ita nia matadalan ita bele moris tuir buat ne'ebé halo Na'i Maromak Nia hakarak. Iha Filipenses 2:13 hatete nune'e "Tanba Maromak mak fó forsa ba imi, hodi fó ba imi hakarak no kbiit atu halo buat neʼebé nia hakarak". Aman Maromak ho pasiensia hanorin ita oinsá la'o hó Nia, lidera ita nia dalan ka viajen moris tomak. Tanba ne'e ita bele moris tuir buat ne'ebé aseitavél tanba Maromak Nia ajuda.
Ikus liu, Na'i Maromak Nia planu ba ita ne'e perfeitu. Bainhira ita haree liafuan perfeitu ita hanoin katak iha ita nia moris nunka halo sala ka nunka hasoru susar. Maibé liuhosi esperiensia moris nian, ita aprende atu sai maduru no krese espiritualmente tanba ita hatene katak Na'i sei la husik ita tanba nia planu ba ita ne'e perfeitu. Na'i Maromak Nia futarlia hatete katak "Na'i dehan: ‘Haʼu iha planu ne'ebé diʼak ba imi, haʼu hakarak fó imi prosperiadade, laʼós fó-terus, no haʼu hakarak fó imi futuru kapás no esperansa" Jeremias 29:11
Só eu conheço os planos que tenho para vocês: prosperidade e não desgraça e um futuro cheio de esperança. Sou eu, o Senhor , quem está falando. Jeremias 29:11 NTLH
Mai ita submete ita nia moris tomak ba Na'i Maromak tanba Nia planu mai ita ne'e di'ak, aseitavél no perfeitu.
✝️✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
 |
| Jeremias 29:11 |
0 comments:
Post a Comment