Konsidera Na'i Maromak Nia futarlia tuir mai:
Ho ida-neʼe, Na'i dehan ba Satanás: “Buat hotu neʼebé ninian iha ona ó-nia liman. Maibé ó-nia liman keta kona nia!” Nuneʼe, Satanás sai husi Na'i nia oin"Job 1:12
Simão, Simão, haree bá! Satanás husu atu nia bele haketak imi hotu hanesan ema neʼebé haketak trigu husi nia kulit. Lukas 22:31
Ema ida labele hanoin liu kona-ba haʼu tanba vizaun furak sira neʼebé haʼu simu. Haʼu simu ai-tarak iha haʼu-nia isin atu haʼu la sai foti an demais. Ai-tarak neʼe hanesan anju ida hosi Satanás neʼebé kontinua basa haʼu, atu nuneʼe haʼu labele foti an demais. 2 Kor. 12:7
Bainhira ita hasoru susar, ita bele hatete ba Diabu, hanesan saida mak Jose (Joseph) hatete ba nia Maun-alin sira ne'ebé fa'an nia sai atan: “Maski uluk imi intende atu halo aat ba haʼu, maibé Maromak intende ida-neʼe ba buat diʼak" (Gen. 50:20).
Kuidadu atu labele interpreta ida ne'e hanesan "Maromak uza buat aat ba di'ak" maibé Maromak intende ida ne'e ba buat di'ak ka keta hanoin katak Maromak troka buat aat ho buat di'ak, maibé Bíblia hatete "Maromak intende ida ne'e ba buat di'ak". Jose nia Maun-alin sira iha ojetivu ne'ebé aat, maibé Maromak nia ojetivu di'ak iha inisiu kedas, la'os Diabu halo aat ka fo'er mak Maromak ba hamoos tuir. Iha kondisaun saida de'it, Maromak sempre iha intensaun ne'ebé di'ak.
Ida ne'e savi ba ita nia konfortu bainhira ema aat no Diabu hamutuk halo ita sofre. Iha Kristu, ita iha direitu hatete ba Diabu no ema aat sira katak "imi intende atu halo aat ba haʼu, maibé Maromak intende ida-neʼe ba buat diʼak". La iha Diabu, moras no ema aat sira mak boot liu Na'i Maromak, so Na'i Maromak de'it mak boot. Na'i Maromak ne'e poderozu, loos no di'ak.
Na'i Jesus espresa Na'i Maromak Nia domin no Ninia kuida ba Ninia dixipulu sira no ita hotu katak:
Ema faʼan manu-liin rua ho osan-besi ida neʼebé folin kiʼik, loos ka lae? Maibé imi-nia Aman hatene kuandu sira ida monu ba rai. Kona-ba imi, fuuk-lahan iha imi-nia ulun mós nia sura hotu. Tan neʼe, keta taʼuk. Imi folin-boot liu fali manu-liin barak" Mateus 10:29-31
La iha manu-liin ida monu ba rai se ida ne'e la'os Maromak Nia planu. La iha ajente kauzativu moras nian (virus, bakeria ka parazita) ida sei hada'et se Maromak la permiti. Tan ne'e mak Maromak ne'e poderozu.
Rona-ba saida mak Na'i Jesus hatete tuir mai: "Tan neʼe, keta taʼuk. Imi folin-boot liu fali manu-liin barak. Imi nia fuuk lahan hotu Maromak konta"
Tanbasá mak keta ta'uk? Tanba Maromak ne'e poderozu - karik ita moris ka mate - ita nia obrigasaun mak serbí Na'i Maromak ne'ebé santu, di'ak no loos. Iha Kristu, ita sai Maromak Ninia oan ne'ebé valór boot, " Imi folin-boot liu fali manu-liin barak"
Nia sekretu mak ne'e: hatene ba katak Na'i Maromak poderozu ne'ebé bele hapara terus oinoin (moras, sofrementu no terus saida de'it) ne'ebé ita hasoru iha ita nia moris, MAIBÉ LA HAPARA, Na'i Maromak ne'ebé hanesan mós mak sustenta ita nia moris.
Na'i Maromak La'os de'it sustenta maibé haree buat hotu, midar no moruk serbisu hamutuk ba ita nia di'ak - ema di'ak sira ne'ebé hadomi Maromak.
Konsidera Na'i Maromak Nia futarlia tuir mai:
Ita hatene katak Maromak halo ninia serbisu hotu laʼo ho loloos atu lori diʼak ba sira neʼebé hadomi nia, sira neʼebé nia bolu ona tuir ninia hakarak. 29 Tanba husi uluk kedas, nia hatene kona-ba sira neʼebé nia atu hili, no nia deside katak sira sei sai nuʼudar ilas husi ninia Oan-Mane, atu nuneʼe ninia Oan neʼe sei sai nuʼudar oan primeiru iha ninia alin barak nia leet. 30 Liután neʼe, sira neʼebé nia hatene nanis ona atu hili mak sira neʼebé nia bolu; no sira neʼebé nia bolu mak sira neʼebé nia dehan katak sira ema loos sira. Ikusliu, sira neʼebé nia dehan katak ema loos mak sira neʼebé nia fó ona glória. Roma 8:28-30).
✝️✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
 |
| Génesis 50:20 |
0 comments:
Post a Comment