Jesus hatudu Ninia aan ba dixipulu sira ho dalan rua:
Dahuluk Nia hatudu Ninia aan liuhosi eskritura: "No nia esplika ba sira buat neʼebé hakerek kona-ba nia iha Eskritura, hahú husi Moisés no Profeta sira hotu nia liafuan" Lukas 24:27. Ne'e hanesan tempu estuda Bíblia ida ne'ebé furak tebes hosi Jesus rasik. Nia esplika hosi Bíblia tomak (iha antigu testamentu) ko'alia kona-ba Nia aan rasik. Bainhira Jesus esplika halo sira-nia laran manas : V32 “Ita sente laran-manas tebes kuandu nia koʼalia ba ita iha dalan no esplika Eskritura sira ba ita ho klaru, loos ka lae?” lisaun ba ita mak bainhira ita estuda Bíblia ita hasoru Jesus
Daruak, Jesus hatudu Ninia aan liuhosi paung: Vv 30-31"No kuandu nia han hamutuk ho sira, nia foti paun no halo tiha orasaun, nia silu ida-neʼe no hahú fahe ba sira. Ho ida-neʼe, sira-nia matan nakloke no sira koñese nia, maibé nia lakon kedas husi sira-nia leet" Liu tiha ida ne'e sira esplika : v35 "Tuirmai, dixípulu naʼin-rua neʼe konta kona-ba buat neʼebé akontese bainhira sira laʼo iha dalan no kona-ba oinsá sira koñese nia kuandu nia silu paun". Ida ne'e to hanoin ba ita kona-ba komuñàun, bainhira ita ita partisipa iha komuñàun ita hasoru Jesus.
Ita hasoru Jesus bainhira ita estuda Bíblia no bainhira ita partisipa iha komuñàun
Referensia: Lucas 24:13-35 BK
Iha Dalan Ba Emaus
13 Iha loron nee kedas, nain rua hosi sira lao ba aldeia ida naran Emaus. Aldeia nee dook maizoumenus kilometru sanulu resin idab hosi Jerusalém.
14 No sira koalia hamutuk kona ba buat hotu nebee akontese ona.
15 Tuir mai, bainhira sira koalia no hanoin hela, Jesus rasik hakbesik no lao hamutuk ho sira.
16 Maibee sira nia matan la hatene Nia.
17 Nia dehan ba sira, “Imi koalia ba malu kona ba saida bainhira imi lao dadaun nee?”
18 Ema ida hosi sira, naran Cleopas, hataan no dehan ba Nia, “Ita mak estranjeiru mesak deit iha Jerusalém nebee la hatene buat sira nebee foin akontese dadauk iha tempu nee ka?”
19 Nia dehan ba sira, “Kona ba saida?” No sira dehan ba Nia, “Kona ba Jesus hosi Nazaré. Nia mak profeta ida nebee hatudu kbiit ho liafuan no hahalok iha Maromak nia oin no iha povu hotu nia oin.
20 Xefi saserdote sira no ita nia ukun nain sira entrega Nia atu simu kastigu mate. No ema prega ona Nia ba krús.
21 Maibee ami hanoin katak Nia mak ema nebee atu hola fali Israel.c Sin, no liu tan nee, ohin mak loron terseiru hosi tempu nebee buat sira nee akontese.
22 No mos, feto balu hosi ami nia grupu halo ami hakfodak. Tanba ohin dadeer sedu, sira baa rate
23 maibee sira la hetan Ninia mate isin. Sira mai fali no dehan katak sira haree vizaun ida ho anju sira, nebee dehan katak Nia moris fali.
24 No ema balu hosi ami baa rate no hetan buat sira nee hanesan feto hatete. Maibee sira la haree Nia.”
25 Depois Nia dehan ba sira, “Oh beik-teen sira! Imi iha fuan laran nebee neineik atu fiar buat hotu nebee profeta sira koalia nanis ona!
26 Laos katak Kristu tenki simu terus sira nee, no tama ba Ninia glória?”
27 No hahuu hosi Moisés no profeta sira hotu, Nia esplika ba sira buat hotu nebee hakerek iha Eskritura kona ba Nia.d
28 Bainhira sira besik ona ba aldeia nebee sira atu tama, Nia lao hanesan atu baa fatin seluk.
29 Maibee sira obriga Nia, no dehan, “Mai hela ho ami. Tanba besik kalan ona, no loron matan besik atu monu ona.” Entaun Nia tama hodi hela ho sira.
30 Bainhira Nia tuur haan hamutuk ho sira, Nia foti paun, no foo bensa, silu paun, no foo ba sira.
31 Depois sira nia matan nakloke, no sira konhese Nia. No Nia lakon kedas hosi sira nia oin.
32 Sira dehan ba malu, “Laos katak ita senti ita nia fuan laran lakan bainhira Nia koalia hela ho ita iha dalan no Nia loke Eskritura sira ba ita?”
33 Sira hamriik iha oras nee kedas no fila fali ba Jerusalém. Sira hetan apostolu nain sanulu resin ida halibur ho ema nebee hamutuk ho sira,
34 nebee dehan, “Nai moris fali ona, no Nia mosu ba Simão!”
35 Depois ema nain rua nee konta kona ba buat sira nebee akontese iha dalan, no oinsaa sira konhese Nia bainhira Nia silu paun.
0 comments:
Post a Comment