Nia dehan ba ema sira nee, “Hakerek nanis ona, ‘Ema sei hanaran Hau nia uma nudar uma orasaun nian.’ Maibee imi halo fatin nee sai fali naok-teen sira nia knuuk.” Mateus 21:13 BK
Iha momentu ida, iha Mateus 21, hafoin Jesus tama ba Jeruzalein, nia baku fila meza vendador sira nian, soe namkari sira-nia osan, no duni sai animál sira iha templu nia oin. Nia la halo ida ne'e arbiru, maibé nia hatudu buat ne'ebé loos. Nia haree ema na'ok iha templu tuir maneira rua ne'ebé aat.
Ulukliu, ema ne'ebé fa'an animal sakrifisiu nian ho folin ne'ebé la razoavél no folin-boot , sira manipula ka explora valor troka osan ba ema sira ne'ebé halo viajen dook hodi mai halo adorasaun iha templu. Liuhosi aktu sira ne'e sira na'ok, explora no manipula sasan nia folin ba ema sira ne'ebé atu mai adora iha templu.
Maibé, na'ok ne'ebé kle'an liu mak parte espirituál. Sira ne'ebé kbiit la iha no la bele selu osan tamba sasan folin boot, sira la hetan permisaun atu tama ba templu hodi bele adora Maromak, sira la iha oportunidade atu halo orasaun no halo relasaun ho Maromak. Ema ne'ebé halo negósiu no ulun-nain relijiaun sira ne'ebé fó kbiit ba vendador sira atu halo nune'e, sira kria obstákulu iha templu, liuliu ba ema kiak, kbiit-laek no ema vulneravél sira atu bele hetan asesu ba Maromak Ninia prezensa iha templu.
Jesus Ninia desizaun mak: "para". Nia hamoos tiha templu hodi hasai tiha bareira ne'ebé ema halo ona entre povu no Maromak.
Jesus Ninia aktu ne'e la'ós de'it ba momentu ne'ebá de'it, maibé lia-loos ida ne'e ba mós ita ohin loron. Liuhusi Jesus, obstaklu ka bareira hotu entre ita ho Maromak halakon tiha ona. Presu ne'e selu tiha ona, dalan nakloke ona, no konvite habelar mai ita ona.
La problema ita ne'e se no saida mak ita halo ona iha pasadu, maibé la iha buat ida mak taka ita-nia dalan ba Maromak. Iha Jesus, iha dalan ne'ebé nakloke ona. Mai ita tama ba Ninia uma orasaun ho gratidaun no hodi agradese, tanba ita hatene katak ninia odamatan nakloke ba ita hotu.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
0 comments:
Post a Comment