Ema moris loos hetan terus barak, maibee Nai salva nia hosi terus hotu nee. Salmu 34:19 BK
Karik Ita sente katak moris ne'e halo Ita sente KO (knockout)? Se nune'e, ó la mesak de'it. Tuir loloos, la'ós segredu katak mundu ne'e nakonu ho buat di'ak no problema.
Liurai David, ne'ebé ninia moris deskrebe barak iha Testamentu Antigu, nia toman ona moris iha problema nia laran. Nia hetan ameasa husi inimigu sira no hasoru susar ne'ebé fo amiesa ba mate.
Maibé, inspira hosi espíritu santu nia hakerek:
"Ema moris loos hetan terus barak, maibee Nai salva nia hosi terus hotu nee" Salmu 34:19 BK
Se iha buat ida de'it ne'ebé ita bele depende ba iha ita-nia moris, ne'e mak Maromak ne'ebé moris, ativu, no sempre prezensa iha ita-nia moris tomak, maski iha tempu susar liu iha ita-nia moris.
Maibé se mak "ema laran-loos" ne'ebé Liurai David temi iha Salmo ida-ne'e? Tamba bainhira ita lee parte seluk iha Biblia dehan: "La iha ema ida mak loos, nein ema ida mós" (Roma 3:10, Salmo 14: 3). Iha maneira ida atu ita komprende kontradisaun ida-ne'e:
Laran loos, ita la bele hetan, maibé Maromak bele fo.
Kuandu ita tau fiar ba Maromak, no mós ba Ninia Oan-Mane, Jesus Kristu (neebe sakrifika Ninia moris atu ita bele moris), ita fiar katak Ninia hahalok loos mós sei habelar ba ita.
Atu halo simples, ema laran-loos mak ema sira ne'ebé sadere ba Maromak nia hahalok loos.
Ita haree ida-ne'e hanesan la justu no la merese, loos ka lae? Maibé ne'e mak grasa. Tamba grasa, liuhusi fé mak ita bele sai nu'udar ema laran-loos. Ita la bele serbisu hodi hetan ida-ne'e no ita labele sosa ho osan.
Tan ne'e, kuandu ita hasoru susar oioin, ita bele espera katak Maromak sei hatudu an iha dalan barak ne'ebé úniku. La'ós tanba ita mak ema loos, maibé tanba Ninia hahalok loos. No Ninia hahalok loos la iha limitasaun.
Entaun, oinsá mak Maromak hatudu hahalok-loos?
Nia dirije ita. Nia fo komfortu. Nia korrije. Nia fó-hanoin ita kona-ba buat ne'ebé loos. Nia ajuda ita atu tahan nafatin. Nia fo sabedoria no matenek ba ita-nia neon. Nia inspira ema seluk atu ajuda ita. Nia book ita laran atu ajuda ema seluk. Nia fó dame mai ita iha tempu susar nia laran. Nia fó korajen mai ita atu hamriik metin iha fiar. Nia serbisu, serbisu no serbisu iha dalan ne'ebé ita la komprende.
No kuandu ita hanoin katak Maromak sei husik ita iha tempu susar, hanoin ba katak Maromak nia prezensa sempre iha ita-nia terus laran no ninia rekursu la iha rohan. Di'ak ba ita atu presiza Maromak loroloron. Atu bele dada iis. Atu bele Tahan moris ka sobrevive no moris-di'ak.
Entaun maun-alin sira, susar sei mai. Maibé Maromak sei nunka husik ita-nia sorin.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
0 comments:
Post a Comment