Maibé Nai mak fiél. Nia sei hametin imi no proteje imi hosi aat na'in. 2 Tesalónika 3:3 BK
Moris nakonu ho dezafiu sira. Ita hasoru susar, tentasaun, moras, no buat barak ne'ebé la iha serteza. Dala ruma ita sente fraku no ta'uk iha ita-nia atividade loron-loron. Iha 2 Tesalonika 3: 3, apóstolu Paulo fó-hanoin ema fiar-na'in kona-ba lia-loos ne'ebé fó komfortu: Maromak ne'e fiél. Maski hasoru susar iha moris ne'e, maibé Maromak la husik Ninia povu mesak.
Iha versíkulu sira ne'ebé hakerek iha lisaun ne'e, apóstolu Paulo ko'alia kona-ba difikuldade no opozisaun ne'ebé ema fiar-na'in sira hasoru. Ema balu hamosu problema, no ema seluk koko atu hapara mensajen Evanjellu nian. Maibé apóstolu Paulo fó korajen ba igreja hodi hatudu ba sira katak Maromak ne'e fiél. Ema bele tenta halo ita monu, maibé Maromak nunka halo ida-ne'e. Nia halo tuir Ninia promesa sira.
Hala'o moris hamutuk ho Maromak signifika tau fiar ba Maromak loroloron. Maromak promete atu haforsa ita kuandu ita sente fraku. Kuandu ita la hatene saida mak ita tenke halo, Maromak fó matenek mai ita. Kuandu ita ta'uk, nia fó dame mai ita. Maromak mós promete atu proteje ita husi buat aat hotu. Ida-ne'e la dehan katak ita sei moris livre husi susar, maibé ida-ne'e signifika ita nunka hala'o ita-nia moris la ho Maromak nia kuida no protesaun.
Hala'o moris hamutuk ho Maromak mós signifika hakbesik ba Nia liuhusi orasaun, lee Ninia Liafuan, no halo tuir Ninia hanorin sira iha sagrada Eskritura. Kuandu ita la'o besik ho Maromak, ita sei sente liután Ninia matadalan no forsa iha ita-nia moris. Ho Maromak iha ita-nia sorin, ita sei hala'o ita-nia moris loroloron ho fiar an nafatin.
Bainhira ita hala'o moris hamutuk ho Maromak, hodi tau fiar ba Ninia fidelidade no protesaun, ita-nia laran sai metin liután iha ita-nia fiar. La'o loroloron hamutuk ho Maromak, halo ita laran-metin nafatin atu nafatin la'o iha dalan ba lalehan. Amen.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment