Hahú buat foun

Lalika hanoin buat uluk sira ne'e, no lalika hanoin buat ne'ebé iha tempu antigu. Tebes, Hau sei halo buat foun; agora buat ne'e mosu mai, imi sei la hatene ka? Ha'u sei halo dalan iha rai fuik, no mota sira iha rai maran. Isaias 43:18-19 BK 

Isaias 43:18-19

Iha Isaias 43, Maromak ko'alia daudaun ba povu Izrael ne'ebé kole, ta'uk no deskorajen. Sira hasoru susar barak ona tanba sira-nia sala no sira sente la iha esperansa ba futuru. Antes versíkulu sira-ne'e, Maromak fó-hanoin sira oinsá Nia salva sira iha tempu uluk, oinsá Nia lori sira sai husi rai-Ejitu no lori sira hakur tasi mean. Maibé tuirmai Maromak hatete ba sira buat ne'ebé surpreza: Keta fokus ba buat sira ne'ebé akontese iha tempu antigu/uluk. 

Kuandu Maromak hatete: "Haluha tiha buat uluk nian," nia la dehan katak ita tenke haluha Ninia laran-di'ak sira ba ita iha pasadu. Nia hatete katak ita labele hakesian ba falla sira iha tempu uluk, laran moras /kanek sira, nein vitória sira iha tempu uluk. Maromak hakarak Ninia povu atu haree ba oin ho fiar, tanba Nia sei halo buat foun ida. 

Maromak promete katak Nia sei halo dalan iha rai-fuik no mota sira iha rai-fuik maran. Ida-ne'e katak, maski moris ne'e sente maran, mamuk, ka imposivel, maibé Maromak bele lori moris foun no esperansa ba ita. Buat ne'ebé ita haree hanesan la iha esperansa iha ita-nia moris, maibé ho Maromak sempre iha esperansa. Nia bele muda ita-nia situasaun, kura laran kanek sira, no loke dalan foun ba ita. 

Mensajen ne'e mós ba ita ohin loron. Ema barak leva sira-nia todan sira hosi pasadu: hanesan sala no memoria aat sira iha tempu uluk ne'ebé halo sira sente laran-kanek. Maromak konvida ita atu labele fokus akontesementu sira iha tempu uluk no fiar katak Nia bele ajuda hafoun fali ita-nia moris. Iha Jesus, Maromak fó perdua, kura no moris foun. 

Hahú moris foun la'ós katak moris sei fasil de'it, maibé ida ne'e signfika katak Maromak sei la'o hamutuk ho ita. Nia fó forsa ba ita ohin loron no esperansa ba loron aban. 

Kuandu ita tau fiar ba Maromak Nia promete atu hahú buat foun iha ita-nia moris no halo tuir Ninia matadalan sira, Nia fó esperansa mai ita. La'o ho fiar aan no halo tuir Maromak Nia hanorin sira sei ajuda ita la'o ba oin nafatin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏