Prinsipiu ba deskansa ne'ebé loos

Tanba ema ne'ebé tama ona ba Maromak Nia fatin deskansa mak deskansa ona hosi ninia servisu hanesan Maromak mos deskansa hosi Ninia servisu. Ebreu 4:10 BK 

Ebreu 4:10

Ebreu kapítulu 4 ko'alia kona-ba Maromak Nia promesa atu deskansa, no fó avizu mai ita atu labele lakon oportunidade ida-ne'e tanba la fiar. Hakerek-nain ne'e hateke fali ba tempu Kriasaun, bainhira Maromak deskansa iha loron dahitu, no mós haree esperiensia ema Izrael nia viajen iha rai-fuik maran iha pasadu, ne'ebé ema barak la tama ba Maromak Nia deskansa tanba sira la tau fiar ba Maromak. Ida-ne'e ajuda ita atu komprende katak Maromak Nia deskansa mak prezente ida no mós konvite atu tau fiar no obedese ba Ninia hanorin sira. 

Ebreu 4:10 hanorin ba ita katak deskansa ne'ebé loos mai husi tau fiar ba Maromak Nia serbisu, la'ós ita-nian rasik. Ita deskansa hosi haka'as an atu hetan salvasaun ho ita-nia esforsu rasik. Salvasaun mak prezente husi Maromak, ne'ebé fó liuhusi fé. Maibé, iha tempu hanesan, deskansa ne'e mós la halakon ita-nia obedese ba Ninia ukun fuan sira. Maibé fiar book ita-nia laran atu halo tuir Maromak Nia ukun-fuan sira ho haksolok tanba domin, la'ós tanba ta'uk. 

Maromak Ninia deskansa fó-hanoin ita kona-ba ninia serbisu ne'ebé remata ona - iha Kriasaun no mós iha redensaun. Hanesan Maromak deskansa depoisde kriasaun, Nia mós konvida ita atu hanoin-hetan Nia nu'udar Kriador no sustentadór. Deskansa ida-ne'e mós indika ba deskansa espirituál iha Kristu, iha ne'ebé ita-nia laran sei hetan dame, perdua, no ksolok. 

Ema barak ohin loron sai kole iha isin no neon. Sira lori sala, hanoin barak, no presaun. Maromak konvida ita atu tama iha Ninia deskansa hodi tau fiar tomak ba Nia, rona ba Ninia Liafuan sira, no la'o tuir Ninia dalan sira. Deskansa ne'e renova ita no ajuda ita moris ho balansu no fiél nafatin ba Maromak. 

Deskansa ne'ebé loos inklui tau fiar ba Maromak loroloron, haketak tempu ba Nia, no hanoin katak Nia kontrola buat hotu. Kuandu ita halo tuir ida-ne'e, ita prepara ita-nia laran ba Maromak Nia deskansa rohan-laek neʼebé Maromak promete ona ba ema sira ne'ebé fiél ba Nia. 

Kuandu ita tau fiar ba Maromak Nia serbisu ne'ebé remata ona, hanoin-hetan Nia nu'udar Kriador no Redentór, no moris ho fiél hodi halo tuir Ninia hanorin sira, ita bele hetan deskansa ne'ebé loos. Deskansa ne'e hametin ita-nia esperansa ohin loron no prepara ita ba deskansa rohan-laek ho Maromak iha futuru no ajuda ita kontinua la'o ho laran-metin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏