Maibé sai ema nebee halo tuir liafuan ne'e, la'os ema ne'ebé rona de'it, hodi imi la lohi imi-nia aan rasik. Tiago 1:22 BK
Iha livru Tiago, hakerek-nain ne'e ko'alia ho klaru no praktikalidade kona-ba moris kristaun nian. Antes versíkulu ne'e, apóstolu Tiago esplika katak Maromak Nia Liafuan kuda iha ita-nia laran atu salva ita (Tiago 1:21). Maromak ko'alia ba ita liuhusi Ninia Liafuan atu nune'e ita bele transforma ita-nia moris. Maibé apóstolu Tiago fó avizu maka'as: la to'o atu rona de'it Maromak nia Liafuan. Se ita rona Maromak Nia Liafuan, maibé la halo tuir, ida-ne'e ita hanesan ema beik ida no lohi de'it ita-nia an.
Sai ema ne'ebé "rona de'it" Maromak Nia Liafuan katak ita gosta rona pregasaun, devosaun ka sermaun, lee Biblia, no rona konsellu di'ak hosi Biblia, maibé ita la prátika saida mak Biblia hanorin. Karik ita hatene saida mak loos, maibé ita nunka halo tuir. Apóstolu Tiago hatete katak fiar hanesan ne'e fraku. Ita hatudu fiar ne'ebé loos liuhusi ita-nia asaunsira. Kuandu Maromak haruka ita fó perdua, ita fó perdua. Kuandu Maromak haruka ita hadomi ema seluk, ita hatudu domin liuhusi ita-nia asaun. Kuandu Maromak haruka ita moris ho onestu, ita hili onestu maski susar.
Tuirmai, apóstolu Tiago fó ezemplu ida: nia hatete "Tanba se ema ida rona deit liafuan ne'e no la halo tuir, nia hanesan ema ne'ebé haree di-diak ninia oin iha espellu ida. Bainhira nia haree tiha ninia aan, nia baa deit no haluha kedas ninia oin nee oinsaa" Tiago 1:23-24. Maromak Nia Liafuan mak hanesan espellu ida. Maromak Nia liafuan hatudu ita ita-nia sala, ita-nia frakeza sira, no mós dalan ne'ebé loos atu la'o tuir. Maibé bénsaun mai, bainhira ita halo tuir buat ne'ebé ita rona.
Maromak la husu ita atu halo tuir Nia hanorin sira ho ita-nia kbiit rasik. Nia ajuda ita liuhusi Ninia Espíritu Santu. Bainhira ita halo tuir buat ki'ik sira pasu pur pasu, ita-nia fiar sai metin liután. Ita-nia moris komesa refleta Jesus ho klaru.
Tan ne'e ohin loron, husu ba ita-nia an: Hau rona de'it Maromak Nia futarlia ka ha'u mós pratika ka moris tuir Maromak Nia Liafuan? Bainhira ita hili atu halo tuir Maromak Nia Liafuan, ita la'o besik liután ho Maromak no ita ho laran-metin kontinua la'o iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment