Nune'e ami la sai fraku. Maski ami nia isin iha liur bele sai aat, ami nia laran sai foun fila fali loron ba loron. 2 Korinto 4:16 BK
Serake ita esperiensia sentimentu kole demais? La'ós de'it iha ita-nia isin, maibé iha ita-nia laran. Moris bele hetan susar. Ita bele sofre moras. Ita bele hasoru problema. Ita mós bele iha prekupasaun oinoin. Hosi loron ba oron, ita-nia idade aumenta tan.
Apóstolu Paulo mós sente hanesan ne'e. Maibé nia hatete ba ita segredu ida: "Ita labele rende" Tanbasa? Tanba Maromak halo buat ne'ebé furak tebes iha ita-nia laran.
Loos duni, ita-nia isin-lolon parte liur sai tuan hosi tempu ba tempu. Ne'e akontese ba ema hotu. Maibé ba ema ne'ebé la'o tuir Jesus, buat ida diferente akontese iha sira-nia laran. Maromak halo sira-nia espíritu sai foun hosi loron ba loron.
Ida ne'e signfika katak Maromak fó forsa ba ita kuandu ita fraku. Nia fó esperansa foun mai ita kuandu ita triste. Nia fó dame mai ita kuandu ita hanoin barak kona-ba buat ruma. Karik ema haree hanesan la iha mudansa iha ita-nia li'ur, maibé iha laran, Maromak transforma ita. Nia halo ita sai hanesan Jesus hosi loron ba loron.
Entaun ohin, keta hateke de'it ba ita-nia problema sira. Keta sente de'it Ita-nia isin kole. Haree ba ita-nia laran. Husu ba Maromak: "Favór renova ha'u agora. Fó Ita-nia forsa mai ha'u." Ko'alia ba Maromak. Lee Ninia Biblia sagrada. Husik Nia halo ita nakonu ho Ninia domin no podér. Karik problema sira iha li'ur sei iha nafatin, maibé ita sei hasoru problema sira-ne'e ho laran foun.
Dalan ba lalehan mak viajen ida. Maski ita-nia isin la'o hela iha dalan ne'ebé fraku. Maibé ita-nia espíritu iha hela Maromak Nia dalan - dalan ba lalehan, iha ne'ebé Maromak halo ita sai forte liután no foun liután loroloron to'o bainhira ita hela hamutuk ho nia loron ida. Entaun keta rende an. Tamba Maromak renova ita atu halo viajen ba lalehan.
Orasaun: Nai, ami-nia isin kole ona. Maibé ami agradese tanba Ita bele halo ami sai foun iha laran ohin. Favór, fó Ita-nia forsa no dame mai ami. Ajuda ami atu kontinua la'o iha dalan ba lalehan. Hodi Jesus nia naran, ami harohan, Amen.
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment