Keta hanoin barak kona ba buat ida. Maibé iha buat hotu, liu hosi orasaun no harohan, hamutuk ho agradese, hato'o imi-nia pedidu sira ba Maromak. Filipe 4:6 BK
Laran-susar mak buat ne'ebé ema barak luta hasoru loroloron. Se ita hanoin barak kona-ba família, saúde, osan, ka futuru, fasil atu halo ita-nia neon sai nakonu no na'ok ita-nia dame. Iha Filipe 4:6, apóstolu Paulo ko'alia ba ema kristaun sira ne'ebé mós hasoru susar no la serteza. Duke fó-hatene sira atu ignora sira-nia hanoin susar sira, nia fó instrusaun ne'ebé klaru ho domin: Lori buat hotu ba Maromak liuhusi orasaun.
Apóstolu Paulo hahú hodi hatete: "Keta hanoin barak kona-ba buat ida." Ida-ne'e la dehan katak problema sei lakon ka moris sei sempre fasil. Maibé ida-ne'e katak ita la presiza lori ita-nia todan mesak de'it. Maromak konvida ita atu mai hasoru Nia ho problema hotu - boot ka ki'ik. La iha buat ida-ne'ebé simples liu ka todan liu atu lori ba Nai nia oin.
Tuirmai, versíkulu ne'e hanorin ita oinsá atu hatán ba ita-nia laran-susar sira: liuhusi orasaun, pedidu ka harohan, no agradese. Orasaun mak ko'alia nakloke ho Maromak. Harohan ka pedidu mak husu Maromak Nia ajuda. Agradese, mak fó-hanoin ita kona-ba buat ne'ebé Maromak halo ona ba ita. Kuandu ita agradese ba Maromak iha tempu susar, ida-ne'e muda Ita-nia ta'uk ba fé. Ida-ne'e ajuda ita atu hanoin-hetan katak Maromak ne'ebé ajuda ita iha pasadu bele ajuda fali ita agora.
Versíkulu ne'e mós hatudu katak ita tenke halo orasaun beibeik iha "situasaun hotu". Kuandu ita hanoin barak, ita-nia orasaun mós tenke barak. Duke husik ta'uk kontrola ita-nia hanoin, ita hetan konvite atu tau fiar ba Maromak nia kuida no sabedoria. Bainhira ita halo ida-ne'e, Maromak promete dame iha versíkulu tuirmai (Filipinas 4:7), dame ne'ebé guarda ita-nia laran no neon.
Ohin loron, se Ita sente laran-taridu, halo Ita-nia laran-susar nakfilak ba orasaun. Ko'alia ho onestu ba Maromak no agradese ba Maromak tanba Nia fidelidade. Bainhira ita aprende atu tau fiar ba Maromak loroloron, orasaun sai nu'udar pasu ida-ne'ebé forte iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment