Oinsá mak ita bele lori ema seluk ba Jesus?

Maibé ema naturál la simu buat sira ne'ebé mai hosi Maromak Nia Espíritu. Tanba buat sira ne'e mak beik ba nia. Nia la bele hatene buat sira ne'e, tanba ema espirituál de'it mak bele kompriende. 1 Korinto 2:14 BK.

                         1 Korinto 2:14

Serake ita fahe ona evanjellu kona-ba Jesus ba ema seluk, maibé sira lakoi rona ka la simu? Karik sira hamnasa no goza tan Ita hodi dehan: "Hau la fiar ida-ne'e." Ida-ne'e dalaruma bele deskorajen ita.

Bíblia esplika tanbasá mak ema la simu Evanjellu. 1 Korinto 2:14 hatete katak ema ne'ebé la iha espíritu santu labele komprende Maromak Nia lia-loos sira. Ida-ne'e la dehan katak ita tenke hapara fahe evanjellu. Ne'e katak Maromak de'it mak bele muda ema nia laran. 

Entaun, saida mak ita tenke halo? 

Ulukliu, halo orasaun ba sira. Husu Espíritu Santu atu loke sira-nia neon no laran. La iha ema ida mak bele mai ba Jesus se Aman Maromak la dada sira mai (João 6:44). 

Segundu, kontinua fahe Maromak Nia Liafuan. Bíblia hatete: "Nunee fiar mai liu hosi buat ne'ebé ema rona. No ema rona liu hosi Kristu Nia liafuan. Roma 10:17. Ita la presiza ko'alia ho matenek. Maromak Nia Liafuan iha kbiit atu muda ema-nia moris (Ebreu 4: 12). 

Terseiru, moris hanesan Jesus. Ema haree oinsá mak ita ko'alia, oinsá mak ita trata ema seluk, no oinsá mak ita hatán ba problema sira ne'ebé mosu. Jesus hatete: "Nunee husik imi-nia naroman nabilan iha ema nia oin, atu sira bele haree imi-nia hahalok di'ak, no fó glória ba imi-nia Aman ne'ebé iha lalehan" Mateus 5:16. Moris ne'ebé hatudu laran-di'ak no onestu bele ko'alia maka'as fali liafuan barak. 

Ba dala haat, hatudu pasiénsia. Ema balu simu Jesus lalais. Ema seluk presiza tinan barak nia laran. Maromak hatudu pasiénsia ba ema, no ita mós tenke hatudu pasiénsia ba ema (2 Pedro 3:9). 

Lembra katak ita-nia serbisu mak atu fahe Evanjellu. Maromak Nia serbisu mak muda ema nia laran. Ita kuda fini, ema seluk rega bee, maibé Maromak mak fó moris (1 Korinto 3: 6-7). 

Ohin loron, keta ta'uk atu fó-hatene ema seluk kona-ba Jesus. Ko'alia ho domin. Moris tuir Maromak Nia hakarak. Halo orasaun ho fiél. Tau fiar ba Espíritu Santu atu halo buat ne'ebé ita labele halo. 

Karik Ita nunka hatene oinsá mak Ita-nia liafuan di'ak sira, ita-nia fidelidade iha orasaun, ka ezemplu moris kristaun nian sei influensia ema seluk nia laran. Maibé Maromak hatene, no Ninia Liafuan nunka fila mamuk (Izaias 55:11).

Bainhira ita fahe Jesus ho fiél liuhosi ita-nia liafuan no ita-nia moris ne'ebéloos, ita kontinua la'o iha dalan ba lalehan.

🙏🌹🙏🌹🙏🌹🙏🌹🙏🌹🙏

🙏 MAROMAK FO BENSAUN🙏🏻

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Maluk sira ne'ebé Kristu hadomi, 

Ami konvida ita-boot sira atu like, share no follow pájina Dalan ba Lalehan. Ami-nia misaun mak atu fahe Maromak Nia Liafuan ho língua ne'ebé simples no fasil atu nune'e ema hotu bele komprende mensajen salvasaun nian liuhusi Jesus Kristu.

Favór like, follow, no share pájina ida ne'e ba ita-nia família no kolega sira. Atu nune'e, bele ajuda habelar lia-loos husi Maromak no tau esperansa ba ema hotu iha mundu tomak. 

Obrigadu ba imi-nia suporta. Ha'u espera katak Maromak sei haraik bénsaun barak ba imi bainhira ita halo viajen espirituál hamutuk iha dalan ba lalehan. 

 Like • Follow • Share • Maromak fo bensaun! 🙏📖✨

Read More

Serake liberdade signifika ita bele halo saida de'it ne'ebé ita hakarak?

Maun-alin sira, Maromak bolu ona imi ba liberdade. Keta uza liberdade ne'e atu halo tuir imi-nia isin nia hakarak, maibé serví malu liu hosi domin. Galásia 5:13 BK 

                            Galásia 5:13

Ema barak hatete: "Hau livre. Ha'u bele halo buat saida de'it ne'ebé ha'u hakarak." Sira hanoin katak liberdade signifika la iha regra no la iha limitasaun. Maibé serake ida ne'e mak Biblia hanorin? 

Resposta mak: Lae

Jesus la fó liberdade mai ita atu ita bele kontinua moris iha sala laran. Nia halo ita livre husi sala nia kbiit no kastigu, atu nune'e ita bele iha moris foun. Bíblia hatete: "Nunee se Oan Mane mak halo imi livre, imi sei sai livre duni" João 8:36

Antes ita hatene Jesus, pekadu mak kontrola ita-nia moris. Ita bosok, odi, lohi, ka moris de'it atu halo ita-nia an kontente. Maibé kuandu ita simu ona Jesus, nia fó ita laran foun no moris foun (2 Korinto 5:17). 

Galasia 5: 13 hatete katak ita labele uza ita-nia liberdade nu'udar razaun atu fo satisfasaun ba hakarak isin nian. Duke halo nune'e, ita presiza uza ita-nia liberdade atu hadomi no serbí ema seluk. Ema kristaun ne'ebé iha liberdade ne'ebé loos la husu: "Saida mak ha'u hakarak?" Nia husu: "Saida mak Jesus hakarak ha'u halo?" 

Jesus mak ita-nia ezemplu di'ak liu hotu. Nia iha podér tomak, maibé Nia mai atu serbí, la'ós atu ema serbí Nia (Mark 10:45). Nia ajuda ema moras sira, tau matan ba ema kiak sira, fó perdua ba ema sala-na'in sira, no fó Ninia moris iha krús ba ita. Se ita la'o tuir Jesus, ita mós sei moris atu sai bénsaun ba ema seluk. 

Apóstolu Paulo mós hatete: "Lao iha Espíritu, no imi sei la halo tuir buat ne'ebé isin kaan" Galásia 5:16 BK. Loron-loron ita iha desizaun ida atu hili. Ita bele halo tuir ita-nia isin nia hakarak, ka ita bele halo tuir espíritu santu nia hakarak. 

Ohin, husu ba ita-nia an: "Oinsa mak ha'u uza liberdade ne'ebé Jesus fó mai ha'u?" Serake ha'u uza ida-ne'e atu halo ha'u-nia an kontente, ka atu halo kontente Maromak? 

Liberdade ne'ebé loos la'ós atu halo buat saida de'it ne'ebé ita hakarak. Liberdade ne'ebé loos mak iha kbiit atu hatete "Lae" ba sala no "Loos" ba Jesus. Ne'e mak liberdade ne'ebé lori ksolok, dame no moris rohan-laek. 

Bainhira ita uza ita-nia liberdade atu hadomi Maromak, serbí ema seluk, no la'o tuir Jesus, ita kontinua la'o iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Serake ema nia matenek bele salva ita?

Maun-alin sira, uluk bainhira ha'u ba vizita imi no fó sasin kona-ba Maromak, ha'u la bá ho liafuan aas ka matenek kle'an. Tanba ha'u desidi atu la hatene buat ida iha imi-nia leet, só deit Jesus Kristu, no Nia mate iha krús. Bainhira ha'u hela ho imi, ha'u fraku, tauk no laran tuk-tuku tebes. Ha'u-nia lia-fuan no mensajen la'os liafuan furak ho matenek kle'an, maibé hatudu Espíritu no kbiit. Nune'e imi tau fiar ba Maromak Nia kbiit, la'os ba ema nia matenek kle'an. 1 Korinto 2:1-5 BK 

                         1 Korinto 2:2

Kuandu Paulo haklaken, nia la koko atu fo impresaun ba ema liuhusi ko'alia liafuan boot ka ideia ne'ebé matenek. Nia haklaken mensajen simples ida de'it: Jesus Kristu mate iha kruz tanba ita-nia sala. Paulo hakarak ema hotu tau fiar ba Maromak Nia kbiit, la'ós ba ema nia matenek. 

Tanbasá mak susar ba ema barak atu simu mensajen ne'e? 

Ema Judeu sira hein hela liurai ida-ne'ebé iha kbiit boot atu manán sira-nia inimigu. Sira nunka espera katak Mesias sei hetan terus no mate iha krús. Ema gregu sira hafolin no admira ema nia matenek no filozofiku boot sira. Ba sira, mensajen kona-ba Salvador ne'ebé krusifika haree hanesan buat beik ida (1 Korinto 1:23). 

Maibé Maromak Nia planu la hanesan ho saida mak ema espera. Liuhusi krús, Jesus manán sala, Satanas no mate. Tuir loloos, buat ne'ebé haree hanesan fraku mak Maromak Nia vitória boot liu hotu. 

Buat ne'ebé hanesan mós akontese ohin loron. Dala barak ita espera katak Maromak sei rezolve kedas ita-nia problema sira. Ita halo orasaun atu hetan kurativu, maibé moras ne'e kontinua nafatin. Ita halo orasaun atu hetan serbisu, maibé ita tenke hein tempu balu. Ita halo orasaun atu hetan moris ne'ebé fasil, maibé problema sei mosu nafatin. 

Dalaruma, bainhira saida mak ita hakarak la akontese tuir ita-nia hakarak, ita komesa hanoin: "Serake Maromak haluha ona ita?" Resposta mak Lae. Maromak dehan "Tanba Ha'u-nia hanoin sira mak la hanesan imi-nia hanoin sira, no imi nia dalan sira mak la hanesan Ha'u-nia dalan sira, hatete Nai" Isaias 55:8-9 BK. Nia haree dezeñu tomak, maibé ita haree de'it parte ki'ik ida. 

Dala ruma Maromak hatete "loos". Dala ruma Nia hatete: "Hein." Dala ruma Nia dehan "Lae" tanba Nia iha planu ne'ebé di'ak liu. Karik ita la komprende Ninia resposta ohin loron, maibé loron ida ita sei komprende. 

Ema nia matenek labele salva ita. Ita-nia ideia rasik labele esplika buat ne'ebé Maromak halo daudauk ba ita. Tan ne'e mak ita tenke tau fiar ba Maromak maski ita la komprende. Proverbios 3: 5-6 hatete mai ita nune'e: "Fiar ba Nai ho ó-nia fuan laran tomak, no keta sadere ba ó-nia kompriensaun rasik. Provérbiu 3:5-6 BK. 

Ohin loron, karik ita-nia moris la la'o tuir saida mak ita espera, keta lakon fiar. Hanoin-hetan krús. Kruz-ne'e haree hanesan lakon, maibé ida-ne'e sai hanesan vitória boot liu iha istória. Se Maromak bele salva ita liuhusi kruz, Nia mós bele lori buat di'ak husi ita-nia situasaun susar sira iha ita-nia moris (Roma 8:28). 

Tau fiar ba Maromak Nia matenek liu fali ita-nia matenek rasik. Ninia planu sempre di'ak liu, maski ita la bele haree agora. 

Bainhira ita tau fiar ba Maromak Nia matenek no halo tuir Jesus ho fiél, ita kontinua la'o iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More