Tanba imi hatene ona ita nia Nai Jesus Kristu nia grasa, katak maski Nia riku Nia sai kiak tanba imi. Nia sai kiak nee atu imi bele sai riku. 2 Korinto 8:9
Saida mak ita hakarak liu iha moris? Osan barak? Uma di'ak? Rai? Karreta? Ka buat seluk ne'ebé bele halo ita moris komfortavel? Buat sira ne'e importante, maibé Bíblia hatudu katak iha rikusoin ida ne'ebé folin liu buat hotu.
Rikeza ne'e mak moris atu salvasaun iha Jesus Kristu.
Iha 2 Koríntiu 8:9, Paulo hateten kona-ba Jesus: “Maski Nia riku, maibé tanba imi Nia sai kiak, atu liuhosi Nia kiak imi bele sai riku.”
Jesus riku iha lalehan. Nia iha glória, honra, no poder. Maibé Nia husik buat sira ne'e hotu no mai mundu ida-ne'e. Nia moris hanesan ema simples ida. Nia la moris iha palásiu. Nia simu rejeisaun, terus, no ikusmai mate iha kruz.
Tanbasá Jesus halo buat sira ne'e?
Tanba Nia hadomi ita.
João 3:16 dehan: “Tanba Maromak hadomi tebes mundu, too Nia foo Ninia Oan Mane mesak, atu ema hotu nebee fiar ba Nia sei la lakon, maibee sei hetan moris rohan laek." João 3:16. Jesus sai “kiak” la'ós tanba Nia lakon valor. Nia halo ida-ne'e tanba Nia hakarak fó buat ne'ebé valor boot liu ba ita: salvasaun no moris rohan-laek.
Saida Mak Signifika “Ita Sai Riku”?
Ita sai riku la'ós tanba ita hetan osan barak. Ita sai riku tanba liuhosi Jesus, ita hetan perdaun, graça, esperansa, paz, no promesa moris rohan-laek.
Ema ida bele iha osan barak maibé se nia la iha Jesus nia salvasaun, nia laran mamuk. Ema seluk bele la iha osan barak, maibé nia iha Jesus, nia iha esperansa ba futuru.
Jesus dehan iha João 10:10: “Hau mai hodi sira bele hetan moris, no hetan moris too nakonu resin." João 10:10
Ne'e mak rikusoin ne'ebé Jesus hakarak fó mai ita.
Maibé, bainhira ita kompriende saida mak Jesus halo ba ita, ita-nia moris mós tenke muda. Tanba Jesus fó ninia an rasik ba ita, ita aprende atu fahe no fó buat ne'ebé ita iha ba ema seluk.
Ita bele fó ita-nia tempu ba ema ne'ebé presiza. Ita bele ajuda ema ne'ebé iha difikuldade. Ita bele fahe hahán ho ema ne'ebé falta. Ita bele fó liafuan di'ak ba ema ne'ebé triste. Iha igreja, ita bele uza ita-nia talentu atu servisu ba Maromak.
Ita la presiza sai riku ho osan atu sai bénsaun ba ema seluk. Buat ki'ik ne'ebé ita fó ho domin bele sai bénsaun boot ba ema seluk.
Loron ohin, ita bele husu ba ita-an:
“Jesus sai kiak tanba hau. Saida mak hau bele halo atu hatudu katak hau apresia Ninia sakrifísiu?”
Talvez ita presiza perdua ema ida. Talvez ita presiza ajuda família ida. Talvez ita presiza fahe buat ne'ebé ita iha. Ka talvez ita presiza entrega ita-nia moris tomak ba Jesus.
Jesus fó Nia buat hotu ba ita. Agora, ita bele fó ita-nia laran tomak ba Nia.
Dalan ba Lalehan mak kompriende katak Jesus sai kiak atu ita bele sai riku iha Nia. Bainhira ita simu Nia grasa, ita hetan salvasaun, no ita aprende atu moris ho gratidaun, domin, fahe buat ne'ebé ita iha no servisu ba ema seluk kada loron. Bainhira ita halo simu nia grasa no bénsaun ita kontinua la'o ho laran-metin iha dalan ba lalehan.
🙏 MAROMAK FO BENSAUN🙏🏻
Click iha ne'e atu Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment