Haʼu sei fila ba haʼu-nia uma neʼebé haʼu husik tiha

Kuandu Demonia ida sai husi ema, nia laʼo liu rai-fuik maran hodi buka uma. Se nia la hetan, nia sei dehan: ‘Haʼu sei fila ba haʼu-nia uma neʼebé haʼu husik tiha.’  No kuandu nia toʼo, nia haree uma neʼe dasa moos no furak ona. Entaun, Demonia neʼe bá hodi lori tan Demonia hitu neʼebé aat liu nia. Sira tama no hela iha neʼebá, no ikusmai ema neʼe nia situasaun sai aat liu fali uluk.” Lukas 11:24-26

Bazeia ba referensia barak iha Bíblia, ita bele hatene katak, espiritu aat (Demonia) sira buka hela iha isin ne'ebé moris.  Purezemplu, bainhira Na'i Jesus duni  sai espiritu aat sira hosi mane ida iha  Gadarenes (Marco 5:1-17)  sira husu Na'i Jesus atu hela iha manada fahi, no lakohi fila fali ba  ABYSS.  Tan ne'e, karik espiritu aat ida ita duni sai hosi ema ida, imediatamente buka ema seluk atu hela ba.

Iha Lukas 11:24-26  Na'i Jesus  hatete bainhira espiritu aat ida sai hosi ema ida, nia buka fatin seluk (ema seluk) atu hela ba. Buka lahetan, nia fila fali ba ema ida ne'ebé uluk nia hela ba no nia haree fatin ne'e prontu atu nia Hela ba. Espiritu aat ne'e komesa hela fila fali no konvida tan, espiritu aat seluk ne'ebé aat liu nia halo ema ne'e aat liu fali ida uluk.

Lisaun saida mak ita bele aprende? Lisaun mak ne'e: duni sai espiritu aat bainhira ema kerasukan, ita nia serbisu seidauk remata, maibé foin metade.  Ita labele husik ita nia an mamuk.  Ita tenke konvida Espiritu ne'ebé forsa liu atu prevene espiritu aat fila fali mai no lori tan nia kolega sira.

Molok ida ne'e iha Lukas 11:21-22, Na'i Jesus hatete mesmu mane forsa ida labele proteje nia Uma, bainhira ema ida forsa liu nia mai asalta. Demonia forsa liu ita ema. Tanba Demonia sira ne'e uluk Anju di'ak ne'ebé funu hasoru Maromak. Tanba sira anju, sira forsa liu ita (Salmo 8:5).  Tanba ne'e ema labele proteje sira nia an kontra Demonia ka Diabu, maibé Maromak  forsa liu Demonia sira. St.  João hakerek, “..... Ida neʼebé iha ita mak boot liu fali nia neʼebé iha mundu" (1 João 4:4). Tan ne'e konvida Na'i Maromak atu hela hó ita mak dalan ne'ebé seguru atu libre hosi "kerasukan" hó espiritu aat ka Demonia ka Diabu.

Ida ne'e signifika katak ema ne'ebé fiar metin iha Maromak nunka hetan kerasukan. Kerasukan ka rai na'in sa'e so akontese ba sira ne'ebé la metin iha Na'i Maromak. Sira ne'ebé moris foun iha Kristu sei la hetan kerasukan.

Ami Nia esperiensia hatudu katak, iha Estudante barak mak hetan kerasukan, ami halo orasaun, espiritu aat ne'e sai duni, maibé espiritu aat ne'e to'o ikus sei fila fali mai nafatin iha ema ne'ebé hanesan tanba, ema refere mamuk hela alias la iha protesaun. Bainhira espiritu aat sai ona ita presiza konvida kedas espiritu Maromak nian atu mai okupa fatin ne'ebé mamuk. Oinsá ita halo ida ne'e? Liuhosi medita Na'i Maromak Nia futarlia loron no kalan no husu protesaun Maromak nian liuhosi halo orasaun.

Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Lukas 11:24

Read More

Maibé buat ida de'it mak presiza

Depois neʼe, sira laʼo ba knua ida. Iha fatin neʼe iha feto ida naran Marta,  no nia simu Jesus nuʼudar bainaka iha ninia uma. Feto neʼe mós iha alin ida naran Maria, no Maria tuur besik iha Naʼi nia ain hodi rona didiʼak ba ninia liafuan. Maibé Marta fali sai okupadu loos tanba halo serbisu barak. Nuneʼe, nia mai besik Jesus no dehan: “Naʼi, Ita la haree katak haʼu-nia alin husik haʼu mesak atu halo serbisu oioin ka? Tan neʼe, favór ida, haruka nia atu ajuda haʼu.” Naʼi hatán: “Marta, Marta, ó prekupa  kona-ba buat barak. Maibé buat ida de'it mak presiza. No Maria hili buat neʼebé diʼak, no ema ida sei la foti ida-neʼe husi nia.”Lukas 10:38-42

Hospitalidade ka serbí bainaka inportante tebes iha tempu Na'i Jesus nian no iha tempu ita nian mós. Bainhira Na'i Jesus mai iha Betania, Marta demonstra hospitalidade liuhosi simu Na'i Jesus iha sira nia uma.  Marta prekupa loos serbí bainaka sira. La iha deskrisaun kona-ba prekupa hó serbisu saida, maibé ita bele siik katak, nia prepara ai-haan. Maibé nia feton Maria, tuur besik Na'i Jesus hodi rona Nia ko'alia. La'os halo serbisu feto nian tuir sira nia kultura. 

Hau fiar katak sira fokus loos ba Na'i Jesus Nia liafuan to'o bainhira Marta mai protesta "Naʼi, Ita la haree katak haʼu-nia alin husik haʼu mesak atu halo serbisu oioin ka? Tan neʼe, favór ida, haruka nia atu ajuda haʼu” (Lukas 10:40). Ita barak mak hanesan Marta iha kazu ida ne'e, liuliu iha ita nia rain. Dala barak feto sira tenke sibuk te'in iha dapur, mane sira tuur konta istoria, depois to'o haan, mane sira mak haan uluk.

Na'i Jesus Nia resposta ba Marta haree hanesan ladún midar iha ita balu nia tilun.  Na'i Jesus resposta nune'e: “Marta, Marta, ó prekupa  kona-ba buat barak. Maibé buat ida de'it mak presiza. No Maria hili buat neʼebé diʼak, no ema ida sei la foti ida-neʼe husi nia.”Lukas 10:41-42

Problema Marta nian mak, la'os nia sibuk te'in atu serbí bainaka sira ne'e maibé nia problema mak nia prekupasaun. Klaru Na'i Jesus iha fatin barak hanorin atu ita serbí ema (ezemplu istoria ema Samaria ne'ebé di'ak).

Marta nia prekupasaun halo nia lakon aspeitu inportante hospitalidade nian, rona fo atensaun ba bainaka, liuliu nia hasé nia alin Maria iha bainaka sira nia oin no husu atu bainaka halo intervensaun ba problema familia nian. Marta mós hanoin katak Na'i Jesus la kuida nia ("Naʼi, Ita la haree katak...). Marta no ita nia prekupasaun hó buat seluk-seluk prevene ita nia prezensa hó Na'i Jesus. Marta nia prekupasaun halo nia la kontenti ho nia alin Maria no hó Na'i Jesus.

Marta lakon "buat ida de'it ne'ebé presiza"  ba hospitalidade. La iha buat ida mak boot liu rona ba ita nia bainaka, liuliu bainaka ne'e mak Na'i Jesus!. Tan ne'e Na'i Jesus dehan "Maria hili buat neʼebé diʼak, no ema ida sei la foti ida-neʼe hosi nia"

Na'i Jesus nia liafuan ba Marta, ita bele haree hanesan konvida nia la'os hirus nia. “Marta, Marta, ó prekupa  kona-ba buat barak. Maibé buat ida de'it mak presiza". Buat ida ne'e mak simu prezensa Na'i Jesus no rona Na'i Jesus Nia futarlia no halo tuir.

Naturalmente, ita sukat ita nia valor hó ita nia  "kesibukan", sukat hó buat ne'ebé ita hetan, ka liuhosi oinsá ita halo ema kontenti ka oinsá halo ema satisfaz. Ita bele sibuk hó buat hotu-hotu maibé keta haluha atu tuur iha Kristu Nia futar-ain atu rona Nia liafuan.

Ita barak iha ita nia igreja, prekupa hó buat barak, liuliu iha loron boot Maromak nian. Ita prekupa hó estilu fuk foun, ropa foun, sapatu foun, maibé dala ruma ita haluha atu renova ita nia laran halo foun. Ita falun ita laran ne'ebé prekupa hó buat barak hó ropa ne'ebé foun, maibé ita nia hahalok la foun.

La lalika prekupa barak hó buat mundu nian ne'ebé temporariu. Na'i Jesus Nia liafuan iha Lukas 12:25 dehan  “Imi ida-neʼebé mak hodi hanoin resin bele aumenta ninia tinan  moris? Loos duni katak ita nia kesibukan hotu ne'ebé ita halo hó intensaun di'ak.  Ita hakarak fornese ba nesesidade familia nian, ita hakarak fó biban atu hariku ita nia oan sira nia moris, ita hakarak serbí ita nia viziñu, no ita hakarak serbí Maromak.

Tuir loloos, igreja sei la ba oin se la iha ema hanesan Marta iha ita nia igreja.  Ema barak ne'ebé halo serbisu hospitalidade halo igreja sai hanesan fatin ne'ebé ema gosta halibur an ba. Maibé se atividade hotu-hotu ne'e halo ita la iha tempu atu hakmatek iha Maromak Nia futar-oin atu rona Maromak Nia liafuan, ita sei la moris haksolok. Na'i Jesus konvida ita hotu ne'ebé prekupa hó buat barak atu tuur no deskansa iha Na'i Maromak Nia prezensa atu rona Nia Lia Loos. Na'i Maromak Nia Lia Loos mak hakerek iha Sagrada Bíblia.

 Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Lukas 10:42

Read More

Bibi-Oan iha asu-fuik nia leet

Depois neʼe, Naʼi hili ema naʼin-70 seluk no haruka sira naʼin rua-rua hodi laʼo uluk nia ba sidade no fatin hotu neʼebé nia rasik sei bá. Tuirmai, nia dehan ba sira: “Tuir loloos, kolleta boot tebes, maibé serbisu-naʼin uitoan deʼit. Tan neʼe, husu Toʼos-Naʼin atu haruka tan ema hodi kolleta. Bá! Haʼu haruka imi bá hanesan bibi-oan iha asu-lobu sira-nia leet. Lukas 10:1-3

Bibi-Oan no Asu-lobo

Na'i Jesus  hatete ba dixípulu sira “Bá! Haʼu haruka imi bá hanesan bibi-oan iha asu-lobu sira-nia". Ida ne'e perigu loos ka lae? Saida mak akontese bainhira bibi-oan halai ka la'o sala bá asu-fuik/Asu-lobo nia leet? Sira sai ai-haan ba Asu-lobo sira, loos ka lae?

Tanbasá mak Na'i Jesus hatete liafuan sira ne'e antes haruka sira sai bá?    Na'i Jesus fó hanoin sira kona-ba difikuldade ne'ebé sira sei hasoru. Hó razaun ne'e mak  serbisu-na'in uitoan de'it (Lukas 10:2), tanba obra ne'e difisíl.

Ema fó protesaun ba bibi-oan sira hasoru predatór  tanba sira ne'e la iha forsa atu defende sira nia an.  Na'i Jesus halo ligasaun entre bibi-oan no ema sira ne'ebé la'o tuir Na'i Jesus/dixípulu sira.  Dixípulu sira haklaken evanjellu liuhosi fó testamuña la'os funu, dixípulu sira haklaken uza Bíblia la'os kilat musan. Ema Kristaun sai vulneravél tebes bainhira sira hala'o sira nia misaun.  La iha liafuan "violensia" iha Kristaun nia dutrina, se iha,  ida ne'e la'os Kristu Nia hanorin, maibé anti-Kristu nia hanorin.

Bainhira Na'i Jesus haruka "bá hanesan bibi-oan iha asu-lobu sira-nia leet" Nia haruka ita bá haklaken la'os de'it iha fatin ne'ebé seguru ka fatin ne'ebé ita gosta de'it, maibé mós fatin sira ne'ebé nakonu hó perigu.

Na'i Jesus Nia liafuan iha Mateus 28:28-20 dehan nune'e "Kbiit tomak iha lalehan no rai entrega ona mai haʼu. Neʼe duni, laʼo bá no hanorin ema husi nasaun hotu atu sai haʼu-nia dixípulu, fó batizmu ba sira  hodi Aman, Oan no espíritu santu nia naran. Hanorin sira atu halo tuir mandamentu hotu neʼebé haʼu fó ona ba imi. No haʼu sei hamutuk nafatin ho imi toʼo mundu neʼe nia rohan.”

Maioria hosi ita lakoi bá iha fatin ne'ebé perigu tanba ita lakoi mate. Mate bá Kristu ne'e fasíl atu ko'alia maibé difisíl atu halo. Maibé karik ita moris iha Kristu ita sei la ta'uk mate ba Kristu.

Moris ba Kristu

Oinsá ita bele moris ba Kristu?

Seráke ita prontu atu moris ba Kristu?  Moris iha Kristu signifika saida? Moris ba Kristu bele sai hanesan  buat ida ne'ebé todan tebes ba ema Kristaun ida atu halo, tanba ida ne'e signifika nani hasoru korenti tradisaun, fiar no kultura lokál.

Ema barak hanoin katak moris tuir Kristu signifika tama de'it relijiaun Kristaun ida, ne'e loos ona.
Ida ne'e bele loos, bele mós lae. Ita bele tama ba relijiaun Kristaun ida mas, se ita la halo tuir saida mak Kristu hanorin, ita sei la hola parte iha reiñu Lalehan. Konsidera Na'i Jesus Nia liafuan tuir Mai "Laʼós ema hotu neʼebé dehan mai haʼu: ‘Naʼi, Naʼi’, sei tama ba Reiñu lalehan nian, maibé ema neʼebé halo tuir haʼu-nia Aman iha lalehan nia hakarak mak sei tama ba Reiñu neʼe. Iha loron neʼebá ema barak sei dehan mai haʼu: ‘Naʼi, Naʼi, ami fó sai profesia no duni sai anju aat sira, no ami mós halo milagre barak hodi Ita-Boot nia naran, loos ka lae?’ Maibé haʼu sei hatete ba sira: ‘Haʼu la hatene imi! Hadook an tiha husi haʼu, imi neʼebé la halo tuir ukunfuan. Mateus 7:21-23

Entaun moris ba Kristu ne'e signifika saida?
1. Ida ne'e signifika moris ida ne'ebé halo Maromak kontenti!

2. Ida ne'e signifika hadomi Maromak liu ita nia osan, familia no ita nia serbisu.

3. Ida ne'e signifika, ita aprezenta ita nia isin hanesan sakrifisiu ne'ebé moris no santu ba Maromak (Roma 12:1).

4. Ida ne'e signifika "Buat saida deʼit neʼebé imi koʼalia no halo, halo buat hotu iha Naʼi Jesus nia naran. Fó obrigadu ba Aman Maromak liuhusi nia (Kolose 3:17).

5. Moris ba Kristu signifika Nia mak sai ita dezezu boot liu iha ita nia moris, ita nia hanoin sempre fokus atu fó Gloria ba Maromak.

6. Moris ba Kristu signifika ita luta loronloron atu  “hadomi Na'i, imi-nia Maromak, ho imi-nia laran tomak, hó imi-nia moris tomak, hó imi-nia kbiit tomak no hó imi-nia neon tomak’, no ‘hadomi imi-nia maluk hanesan imi-nia an rasik". Lukas 10:27

7. Moris ba Kristu signifika ita kompriende katak iis moris ne'ebé  ita dada no ai-haan hotu  ne'ebé ita haan hanesan Prezente hosi Maromak atu fó forsa ba atu atu haklaken evanjellu. Ida ne'e inportante tanba ema ne'ebé moris ba Kristu mak bele prontu atu mate ba Kristu.

Mate ba Kristu

Antes ita halo diskusaun ba oin, atu fó hanoin fila fali se ita la moris ba Kristu ita sei la prontu mate ba Kristu. Ezemplu iha Bíblia ema sira ne'ebé mate ba Kristu mak Estevão. Estevão, mate ba Kristu no molok ida ne'e nia ema fiar na'in no nakonu hó espiritu santu (Apostolu 6:5).

Tanbasá mak ema ida prontu atu mate ba Kristu? Seráke, Na'i Jesus husu Nia dixípulu sira atu mate ba Nia?   Na'i Jesus la rekere Nia dixípulu sira hotu atu mate ba Nia, maibé Nia husu atu ema Kristaun hotu prontu atu mate ba Nia karik presiza.

Karik ita tenke hili entre mate ka moris no nega fiar ba Na'i Jesus Kristu, di'ak liu ita hili Na'i Jesus Kristu. Konsidera Na'i Jesus Nia liafuan iha Lukas 9:26 " Ema se deʼit neʼebé moe kona-ba haʼu no kona-ba haʼu-nia liafuan, Oan-Mane  mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

Na'i Jesus prepara ita ba difikuldade ne'ebé ita sei hasoru bainhira halo obra iha João 15:20, "Atan ida la boot liu fali ninia naʼi. Se sira fó-terus haʼu, sira mós sei fó-terus imi. Se sira halo tuir haʼu-nia liafuan, sira mós sei halo tuir imi-nia liafuan"

Paulo mós hakerek ba servidór joven ida naran Timoteo dehan  “ema hotu neʼebé hakarak atu moris fiél ba Maromak iha Kristu Jesus  sei hetan presegisaun. 2 Timoteo 3:12

Pergunta mai ita idaidak ne'ebé agora lee hela "Karik presiza, seráke ita prontu mate ba Kristu?"

Mai ita remata hó St. Paulo nia liafuan iha  Apostolu 20:22-24:
Agora, Maromak nia espíritu haruka haʼu atu laʼo ba Jeruzalein, maski haʼu la hatene saida mak sei akontese ba haʼu iha neʼebá, maibé husi sidade ba sidade espíritu santu fó hanoin beibeik ba haʼu katak haʼu sei tama komarka no hetan terus. Maski nuneʼe, haʼu la haree haʼu-nia moris nuʼudar buat neʼebé importante. Haʼu hanoin deʼit atu bele halai toʼo rohan no halo hotu serbisu neʼebé haʼu simu husi Naʼi Jesus, hodi fó sasin ho loloos ba liafuan diʼak kona-ba Maromak nia laran-diʼak neʼebé boot"

Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Lukas 10:3

Read More