Jesus dehan ba sira, “Tanba imi nia fiar menus. Tebes, Hau dehan ba imi, se imi nia fiar hanesan mostarda musan ida, imi bele dehan ba foho nee, ‘Muda aan ba nebaa,’ no foho sei muda aan. La iha buat ida nebee imi la bele halo.” Mateus 17:20 BK
Ema barak hanoin katak fé mak sentimentu ka emosaun ne'ebé forte. Maibé ita-nia sentimentu bele muda hosi loron ba loron. Dala ruma ita sente katak ita besik ho Maromak, no dala ruma ita sente fraku ka deskorajen. Fé ne'ebé loos mak kle'an liu fali sentimentu. Fé mak hili atu tau fiar ba Maromak no ba Ninia promesa sira maski ita iha situasaun ne'ebé la serteza.
Iha Evanjellu Mateus 17:20, Jesus hatete katak fiar ne'ebé ki'ik hanesan mostarda musan mós bele muda foho sira. Maski mostarda musan ki'ik, maibé nia krexe sai boot liu (Mateus 13:31-32). Jesus hanorin katak fé ne'ebé ki'ik mós bele sai boot bainhira tau fiar ba Maromak.
Maromak fó fé ba ita. Roma 12: 3 hatete katak Maromak fó ona fiar ba ema ida-idak. Efeso 2: 8 fó-hanoin ita katak salvasaun ne'e tamba grasa liuhusi fé - ne'e mak prezente husi Maromak.
Dala ruma ita-nia fé sente fraku. Iha tempu ida, aman ida halerik ba Jesus hodi dehan: "Nai, ha'u fiar; ajuda ha'u karik ha'u la fiar!" (Marcos 9:24). Maromak komprende ita-nia luta no hatudu pasiénsia ba ita. Fé la dehan katak ita nunka luta; maibé ne'e katak ita kontinua tau fiar ba Maromak iha luta sira-ne'e nia laran.
Maromak Nia domin mós hametin ita-nia fiar. Livru Jeremias 31:3 hatete katak Maromak hadomi ita ho domin rohan laek. Tanba Ninia domin nunka muda, ita bele tau fiar ba Nia maski ita-nia sentimentu muda.
Bíblia fó korajen mai ita atu fiksa ita-nia matan ba Jesus, " hanesan autór ne'ebé sei kompleta ita-nia fiar". Ita-nia fiar sei sai boot liután bainhira ita foka liután ba Maromak duke ita-nia ta'uk.
Dala ruma ita-nia moris bele susar, no dala ruma ita sente kole espiritualmente. Livru 2 Cronicas 15: 7 hatete: "Sai forte no keta rende." Maromak hafolin ita-nia fidelidade.
Ita mós hanoin-hetan katak ema hotu sala-na'in no presiza Maromak Nia grasa (Roma 3:23-26). Ita la hetan salvasaun tanba ita-nia fiar perfeitu, maibé tanba Jesus mak perfeitu. Hanesan feto ne'ebé Jesus fó perdua iha Evanjellu Lucas 7:50, ita hetan salvasaun liuhusi fiar ba Nia.
Fé la bazeia ba emosaun. Maibé fé ne'e bazeia ba Maromak Nia karakter, promesa no domin. Maski ita-nia sentimentu tun-sae Maromak nafatin fiél.
Bainhira ita tau fiar ba Jesus loroloron, ita-nia fiar sai metin liután no lori ita ba oin iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment