Husu ba, no imi sei simu; buka ba, no imi sei hetan; dere ba, no odamatan sei nakloke ba imi. Mateus 7:7 BK
Jesus fo promesa ne'ebé klaru: "Husu ba, no imi sei simu; buka ba, no imi sei hetan; dere ba, no odamatan sei nakloke ba imi". Eskritura ne'e fó korajen mai ita atu halo orasaun ho fiar an. Maromak konvida ita atu mai hasoru Nia ho ita-nia nesesidade, ita-nia todan, no ita-nia pergunta sira.
Maibé, dala ruma ita la hetan resposta lalais ba ita-nia orasaun ka hetan resposta tuir dalan ne'ebé ita espera. Bíblia fó konsellu ne'ebé matenek kona-ba situasaun ne'e.
Primeiru, ita tenke halo orasaun tuir Maromak Nia hakarak, la'ós tuir ita-nia hakarak rasik. Jesus hanorin ita atu halo orasaun hodi dehan: "Ita-nia hakarak mak akontese" (Mateus 6:10)." 1 Joao 5: 14-15 mós hatete katak kuandu ita husu tuir Maromak Nia hakarak, Nia rona ita. Maromak sempre hatán iha dalan ne'ebé di'ak liu, maski ida-ne'e la hanesan ho saida mak ita espera.
Segundu, ita tenke ezamina didi'ak ita-nia laran. Bíblia fó avizu katak sala ne'ebé ita hadomi liu bele blokeia ita-nia orasaun (haree Livru Salmo 66:18; 1 Pedro 3:12; no Proverbios 15:29). Ita mós tenke cek didi'ak ita-nia hanoin (Proverbios 16: 2; Tiago 4: 3). Maromak haree ita-nia laran.
Terseiru, ita tenke hakbesik nafatin ba Maromak no ba Ninia Liafuan. Jesus hatete katak se ita halo tuir Nia no Ninia Liafuan, ita-nia orasaun sai poderozu (João 15: 7). Fé mós importante. Maromak Nia liafuan haruka ita atu halo orasaun ho fé (Ebreu 11: 6; Tiago 1:6; Marcos 11:24).
Ita mós tenke haraik-an (Tiago 4:6, 1 Peter 5:6) no fó perdua ba ema seluk (Marco 11:25-26. Se ita la fó perdua, ida-ne'e bele afeta ita-nia moris espirituál nian.
Ikusmai, ita tenke hanoin katak Maromak haree buat ne'ebé ita labele haree. Nia halo serbisu ba ita-nia di'ak (Roma 8,:28). Maromak bele halo buat barak liu fali buat ne'ebé ita husu ka hanoin (Efeso 3: 20). Ninia planu ba ita mak di'ak (Jeremias 29:11-13). Dala ruma Ninia resposta mak simples, hanesan Nia hatete ba apóstolu Paulo: "Hau-Nia grasa sufiente ba ó." (2 Korinto 12:9).
Kuandu ita haree hanesan ita-nia orasaun la hetan resposta, ita tenke tau fiar nafatin ba Maromak. Hanesan Ana ka Hannah iha 1 Samuel 1: 10-17, ne'ebé halo orasaun ho triste no fiar ne'ebé kle'an, ita bele fakar sai buat ne'ebé iha ita-nia laran ba Maromak. No hanesan livru Salmo 62: 8 fó-hanoin ita katak: ita tenke tau fiar ba Maromak iha tempu hotu no fakar sai buat neʼebé iha ita-nia laran ba Maromak.
Maromak sempre rona Ninia oan sira. Maski ita la haree kedas Maromak Nia resposta, maibé ita bele tau fiar ba Ninia matenek no domin. Bainhira ita kontinua halo orasaun ho fiar no submete ba Maromak Nia hakarak, ita la'o nafatin ba oin iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment