Liu tiha ne'e, bainhira nia hetan ona Matusalém, Enok lao hamutuk ho Maromak tinan atus tolu (300), no nia hetan tan oan mane no oan feto sira. Nune'e Enok moris to'o tinan atus tolu neen-nulu resin lima (365). Enok la'o hamutuk ho Maromak depois nia la iha ona, tanba Maromak foti nia. Jénesis 5:22-24
Enoc mak ema espesiál ida iha Biblia laran. Bíblia hatete katak nia la'o ho Maromak. Ne'e katak nia moris besik ho Maromak loroloron. Nia la'ós fiar de'it Maromak, maibé nia iha relasaun loroloron ho Maromak.
Iha livru Jenesis 5: 22-24, ita lee katak Enoc la'o hamutuk ho Maromak, no depois Maromak foti nia ba lalehan. Ida-ne'e hatudu katak nia besik tebes ho Maromak. Ninia moris iha relasaun di'ak no besik los ho Maromak tan ne'e to'o loron ida nia ba hamutuk ho Maromak.
La'o ho Maromak signfika sáida? Ida ne'e katak moris loroloron hamutuk ho Maromak - liuhusi ko'alia ho Nia, tau fiar ba Nia, no halo tuir Ninia dalan sira. Enoc la'os la'o ho Maromak dala ruma de'it, maibé nia kontinua la'o hamutuk ho Maromak loroloron.
Bíblia fó korajen mai ita atu moris hanesan ne'e. Roma 12: 12 hatete katak ita tenke fiél iha orasaun. Ida-ne'e katak ita tenke kontinua ko'alia ho Maromak regularmente, hanesan Enoc.
Ita bele ko'alia ho Maromak iha tempu ne'ebé de'it no iha fatin ne'ebé de'it. Livru Salmo 139: 7-12 fó-hanoin ita katak ita labele subar an husi Maromak Nia prezensa. Maski ita iha naroman ka nakukun laran, Maromak sempre hamutuk ho ita. Ida-ne'e fó komfortu ba ita, tanba ita nunka mesak.
Maski iha tempu susar, ita bele bolu ba Maromak. Livru Lamentasaun 3:55-57 hatudu katak kuandu ita halerik ba Maromak, Nia rona ita no besik mai ita. Maromak rona orasaun hotu ne'ebé ema halo ho laran moos.
Enoc nia moris hanorin ita lisaun simples ida: ita bele la'o no ko'alia ho Maromak loroloron. Ita la presiza liafuan espesiál ka fatin espesiál ida. Ita presiza de'it laran ne'ebé hakarak hakbesik ba Maromak.
Kuandu ita hili atu la'o hamutuk ho Maromak loroloron, ko'alia ho Nia iha orasaun, no tau fiar ba Nia iha situasaun hotu, ita hakbesik liután ba Nia pasu pur pasu.
No bainhira ita la'o hamutuk ho Maromak hanesan Enoc, ita la'o daudaun iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment