Imi buka hatene Eskritura sira, tanba imi hanoin katak iha Eskritura mak imi hetan moris rohan laek. No Eskritura fó sasin kona-ba Ha'u. João 5:39 BK
Bíblia la'ós de'it livru baibain ida atu lee, maibé lee Biblia mós dalan ida atu hatene Jesus. Ema barak lee Biblia, maibé sira lakon ninia ojetivu prinsipál. Jesus rasik esplika kona-ba ida ne'e iha Evanjellu João 5:39. Nia hatete katak ema estuda Eskritura tanba sira hanoin katak sira sei hetan moris, maibé loloos ne'e eskritura hatudu kona-ba Jesus. Ne'e katak Biblia mak matadalan ida-ne'ebé lori ita ba Jesus.
Hatene Jesus mak buat ne'ebé importante liu iha ita-nia moris. Iha Evanjellu João 17: 3, Jesus hatete katak moris rohan-laek mak hatene Maromak loos mesak de'it no Jesus Kristu ne'ebé Nia haruka mai. Moris rohan-laek la'ós de'it kona-ba moris ba nafatin, maibé moris rohan-laek mak kona-ba relasaun ne'ebé loos ho Jesus.
Maibé hatene Jesus la'ós automatikamente akontese. Banhira Nia konvida ita, ita tenke hatán. Iha livru Apokalipse 3:20, Jesus hatete: "Haree, ha'u hamriik iha odamatan no dere." Nia hein hela ita atu loke ita-nia odamatan laran nian. Se ita loke odamatan, Nia sei tama no hamutuk ho ita.
Ida-ne'e hanorin ita lisaun importante ida. Lee Biblia de'it la sufisiente. Ita tenke loke ita-nia laran ba Jesus. Kuandu ita lee Eskritura, ita tenke husu: "Saida mak versikulu sira-ne'e hanorin ha'u kona-ba Jesus?" Tuirmai ita tenke konvida Nia mai ita-nia moris.
Jesus sempre besik, sempre bolu, no sempre prontu atu tama mai ita-nia laran. Nia hakarak atu iha relasaun di'ak ho ita. Bíblia ajuda ita atu rona Ninia lian, maibé ita tenke hili atu rona no responde.
Ohin loron, mai ita la'ós de'it lee Biblia maibé loke ita-nia laran ba Jesus. Kuandu ita halo nune'e, ita sei hatene duni Maromak no hetan esperiénsia moris ne'ebé Nia promesa ona.
No bainhira ita hatene liután kona-ba Jesus loroloron, ita la'o hela pasu pur pasu iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment