Iha tempu iha ita-nia moris, dalaruma buat hotuhotu la'o ho di'ak. Iha mós tempu balu iha ne'ebé buat hotu la'o ladi'ak. Atu saida de'it mak akontese, iha buat ida iha vida kristaun ne'ebé halo ita haksolok. Buat ne'e mak Jesus mate no moris hi'as ba ita. Jesus hatete "Hau mai laos atu tesi lia ba mundu, maibee atu salva mundu" João 12:47 Nia mós hatete "Hau mai iha mundu nudar naroman, atu ema nebee fiar mai Hau sei la hela iha nakukun laran" João 12:46
Kontestu Jesus fasi Ninia dixipulu sira-nia ain esplika antes festa paskua (João 13:1). Tempu ne'ebé ema barak halibur iha Jeruzalen atu selebra paskua. Selebrasaun ne'ebé akontese molok Jesus mate no moris hi'as, ne'ebé ohin loron ema kristaun barak selebra iha mundu tomak.
Bainhira Nia fasi ona sira-nia ain, Nia foti fali Ninia ropa no tuur fali. No Nia dehan ba sira, “Imi hatene buat nebee Hau foin halo ba imi ka lae? João 13:12. Saida mak ninia sentidu? Saida mak sira kompriende? Hosi eventu Jesus fasi ain ita bele aprende buat balu hanesan tuir mai:
1. Domin
Aktu Jesus fasi ain, demonstra ka hatudu Ninia domin João 13:1. Ida ne'e diferente ho saida mak ema mundu nian hanoin kona-ba domin. Saida mak Jesus halo ne'e liu fali sentimentu ka emosaun domin nian. Ema Kristaun tenke halo desizaun Ida atu halo tratamentu ba ema hotu tuir maneira jesus nian.
"Entaun se Hau, nebee imi nia Nai no Mestri, fasi ona imi nia ain, nunee imi mos tenki halo ida nee ba malu, atu fasi imi nia maluk nia ain. Tanba Hau foo ezemplu ona ba imi, katak imi tenki halo hanesan Hau halo ba imi" João 13:14-15 BK
2. Serbí
Kondisaun dalan iha Palestina, nakonu ho rai rahun. Iha tempu bai-loron, rai-rahuun barak no iha tempu udan nakonu ho tahu. Kustume ema sira iha tempu Jesus nian, liuliu sira ne'ebé riku no iha atan barak, atan ida sei mai koree sinelus ka sapatu nia talin, no atan ne'ebé kiik/ kraik liu sei fasi bainaka sira-nia ain.
Bainhira Ninia dixipulu sira tuur sadere ona, Jesus hamriik, no halo nia aan hanesan atan ida, Nia komesa fasi dixipulu sira nia ain. Jesus tau Ninia aan iha fatin atan ne'ebé kraik liu iha sosiedade, ida ne'ebé serbisu fo'er nian. Ida ne'e kontrariu ho modelu lideransa mundu nian. Jesus ne'ebé sira-nia Mestri no Na'i serbí hanesan atan, hatudu ezemplu mai ita atu banati tuir. Jesus hatudu mai ita katak se ita hadomi ema, ita tenke serbí sira voluntarimente no sira Ne'ebé serbí ita, sira tenke hetan tratamentu ho dignu no respeitu
3. Haraik-aan
Jesus hatudu domin ne'ebé absolute (João 13:1).... "Molok Festa Páskua, bainhira Jesus hatene katak Ninia oras too ona atu sai hosi mundu nee hodi baa Aman. Nia hadomi Ninia maluk sira nebee iha mundu, no Nia sei hadomi sira too rohan". Aman Maromak intrega buat hotu iha Jesus Ninia liman.... Jesus hatene katak Aman foo ona buat hotu ba Ninia liman, no katak Nia mai hosi Maromak, no Nia atu fila fali ba Maromak. João 13: 3. Tamba razaun domin, Nia hili haraik-aan no serbí dixipulu sira.
Sira ne'ebé buka sira-nia gloria rasik (hanesan Judas, iha João 23:2) sei sai lavale hotu. Sira ne'ebé foti aan, sei hatún. Sira ne'ebé haraik-aan Maromak sei tane aas.
Jesus hatudu oinsá ezerse podér liuhosi domin, serbí, no haraik-aan. Liuhosi dalan ne'e Nia hatudu oinsá lideransa ida halo halo tratamentu ba ema sira ne'ebé sira ukun.
4.Perdaun
Fasi no hamoos hanesan sinál perdaun ba sala. Fasi ain hanesan imajen ida kona-ba saida mak Jesus besik atu halo iha kruz ba sira ba ita hotu "Jesus hataan ba nia, “Agora o seidauk kompriende buat nebee Hau halo, maibee tuir mai o sei kompriende.” João 13:7
Liuhosi Jesus Ninia mate, ita hetan perdua ba ita-nia sala. Tambasá mak ita tenke regularmente halo orasaun atu hetan perdua?
Mai ita analiza João 13:8-10. Bainhira Jesus hakbesik ba Pedro atu fasi ninia ain, Pedro dehan "“O sei nunka fasi hau nia ain.” Jesus hataan ba nia, “Se Hau la fasi o, o sei la hamutuk ho Hau.” João 13:8. Pedro hatán “Nai, laos hau nia ain deit, maibee fasi mos hau nia liman no hau nia ulun!” Jesus responde " “Ema nebee hariis ona, la presiza fasi fali, só deit ninia ain, tanba nia isin tomak moos ona. No imi moos ona, maibee laos imi hotu" João 13:10
Ida ne'e mak imajen perdaun. Bainhira Ita tau fé ba Jesus, Jesus halo ita moos no totalmente perdua ita-nia sala. Hanesan ema haris. Maibé bainhira ita la'o iha mundu ida ne'e ita halo buat ne'ebé estraga relasaun entre ita ho Maromak tamba ne'e kontinua husu perdua liuhosi orasaun
Referensia: John 12:37-13:17
✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
