Oinsá mak Maromak bele halo ita sai ema ne'ebé loos?

Reflesaun bazeia ba Roma 4: 1-15 

Oinsá mak ita bele sai ema ne'ebé loos iha Maromak nia oin? Oinsá mak Maromak bele "halo ita sai loos" iha ninia oin? Ida-ne'e mak buat ne'ebé ita presiza haka'as an iha ita-nia moris tomak no iha esperansa atu hetan buat ne'ebé di'ak liu?  

Paulo hatete: "Lae. Buat maraviloza ida akontese liuhosi Jesus nia moris, mate no moris-hias. Agora ita bele simu justisa ne'e nu'udar prezente ne'ebé gratuita. Ita simu ida-ne'e la'ós tamba serbisu maka'as tebes, maibé ho fé (Roma 4:1-5). 

Pergunta ida-ne'ebé ema husu beibeik mak: Se Jesus mate tanba ita-nia sala, saida mak akontese ba sira ne'ebé moris ona molok iha Jesus mai? Purezemplu iha Timor karik, ita-nia bei-ala sira nunka rona kona-ba Jesus, oinsá ho sira-nia destinu?

Paulo hatene katak pergunta hanesan ne'e sei mosu. No nia antisipa halo esplikasaun uza  Abrão nia kazu. Karik ninia inimigu sira dehan katak Abrão sai loos tanba rezultadu hosi ninia hahalok-di'ak, ne'ebé halo nia gaba nia an (Roma 4:2). Paulo hatete katak Eskritura deklara katak "Abrão fiar ba Nai, no Nai sura fiar nee nudar moris loos ba nia (Roma 4:3, Jénesis 15:6 BK). Fraze ne'e implika katak ida ne'e prezente la'ós buat ne'ebé ita sosa (Roma 4:5). 

Se ita serbisu maka'as no halo serbisu ne'ebé di'ak, ita merese hetan saláriu; ita la bolu ita-nia saláriu nu'udar prezente. Maibé se ita haree katak serbisu ne'e boot liu ba ita, katak serbisu ne'e so Maromak de'it mak bele halo, no ita tau fiar ba Nia atu halo serbisu ne'e...... Ida ne'e mak buat ne'ebé halo ita sai loos ho Maromak hosi Maromak, (Roma 4:4-5). 

Karik Paulo nia inimigu sira dehan katak prezente ne'e so disponivél de'it ba ema judeu sira (ema sira ne'ebé halo sirkunsizaun). Maibé Paulo hatete katak ema judeu sira halo sirkunsizaun depoisde Maromak deklara Abrão loos (Jenesis 17), tanba ne'e, Maromak fó bénsaun no justifikasaun ba moris loos tamba fé ne'e ba ema judeu sira ne'ebé hetan sirkunsizaun no mós ba ema ne'ebé la hetan sirkunsizaun (ema Jentiu sira), (Roma 4: 9-10). 

La'os sirkunsizaun mak halo ema sai loos iha Maromak Ninia oin. Maibé ne'e mak selu/seal/sinál ida. Oinsaa Maromak sura ida nee ba nia? Ida nee molok ka depois nia hetan sirkunsizaun? Laos depois, maibee molok nia hetan sirkunsizaun. Nia simu sirkunsizaun nudar sinál ida nebee hatudu katak nia iha ona moris loos liu hosi fiar molok nia hetan sirkunsizaun" Roma 4:10-11

Istória kona-ba Abraao hatudu momoos katak ema konta Abrão nu'udar ema laran-loos la'ós tanba ninia hahalok, sirkunsizaun ka ukun-fuan, maibé tanba Maromak nia grasa liuhosi fé ba Jesus. Se Abrão sai ema loos tanba fé, nia mak Aman ba ema hotu ne'ebé iha fé (inklui ema sira ne'ebé seidauk hetan sirkunsizaun, Roma 4:11-12). 

Krús ne'e efetivu durante tempu hotu. Liuhusi buat ne'ebé Jesus halo iha kruz, ema sira ne'ebé nunka rona kona-ba Nia maibé tau fiar ba Maromak hetan moris loos iha Maromak Ninia oin tanba sira-nia fé. 

Serake ita presiza komprende buat hotu ne'e atu bele hetan moris loos liuhusi fé? Lae ida. Moris loos iha Maromak ne'e liuhosi fé, nune'e ita la presiza atu komprende buat hotu-hotu maibé ita presiza fé ba Maromak. Tan ne'e mak kumpre Maromak nia promesa ne'e depende kompletamente ba tau fiar ba Maromak no ba ninia dalan sira, no depois kaer metin ba Maromak no saida mak nia halo. Maromak nia promesa mak prezente ne'ebé puru (Roma 4:16).

Aman, obrigadu barak ba lia-loos ne'ebé furak katak Ami hetan moris loos iha Maromak Nia oin liuhusi Jesus nia mate ba ami, no liuhusi fiar ba nia. Ajuda ami atu komprende lia-loos ne'e ho kle'an liután no esplika ho klaru liután, atu nune'e ema barak bele hatene liután kona-ba bénsaun boot sira ne'ebé Ami hetan husi fiar.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

🪷🪷🪷🪷🪷🪷🪷🪷🪷🪷🪷

Referensia

Roma 4:1-15 Biblia Kadi 

1 Entaun ita bele dehan saida kona ba Abraão, nebee ita nia bei-ala tuir isin? Nia manaan saida?

2 Tanba se Abraão sai loos liu hosi hahalok, nia bele gaba aan. Maibee laos iha Maromak nia oin.

3 Tanba Eskritura dehan saida? “Abraão fiar ba Maromak, no Maromak sura fiar nee nudar moris loos.”

4 Agora, ba nia nebee servisu, ninia patraun la sura ninia kolen nudar prezenti ida, maibee nudar buat nebee merese atu simu.

5 No ba nia nebee la servisu maibee fiar deit ba Ida nebee halo ema sai loos nebee seidauk konhese Maromak, ninia fiar nee sura nudar moris loos.

6 David mos koalia kona ba haksolok ba ema nebee Maromak sura nudar ema moris loos ketak hosi ninia hahalok:

7 Haksolok ba sira nebee hetan perdaun hosi sira nia hahalok aat,

no Maromak taka ona sira nia sala.

8 Haksolok ba ema nebee Nai la sura ninia sala.

9 Laran haksolok nee só ba deit sira nebee hetan sirkunsizaun ka ba mos sira nebee la hetan sirkunsizaun? Tanba ita dehan ona katak Maromak sura Abraão nia fiar nudar moris loos.

10 Oinsaa Maromak sura ida nee ba nia? Ida nee molok ka depois nia hetan sirkunsizaun? Laos depois, maibee molok nia hetan sirkunsizaun.

11 Nia simu sirkunsizaun nudar sinál ida nebee hatudu katak nia iha ona moris loos liu hosi fiar molok nia hetan sirkunsizaun. Nunee nia sai aman ba ema hotu nebee fiar maski sira la hetan sirkunsizaun hodi Maromak bele sura moris loos ba sira mos.

12 No nia mak aman ba sira nebee hetan sirkunsizaun, nebee laos hetan sirkunsizaun deit, maibee sira mos lao tuir Abraão nia fiar nebee nia iha molok nia hetan sirkunsizaun.

13 Tanba Abraão no ninia bei-oan sira hetan promesa katak nia sei simu mundu nudar liman rohan. Promesa nee la mai liu hosi lei maibee liu hosi moris loos nebee mai hosi fiar.

14 Tanba se sira nebee halo tuir lei mak simu liman rohan nee, entaun fiar sai mamuk no promesa nee la iha folin.

15 Tanba lei lori mai Maromak nia laran hirus. Maibee se lei la iha, entaun sala nebee kontra lei mos la iha.

Read More

Husi ta'uk ba aten-barani

 Maibee nia nebee halo buat nebee loos sei mai iha naroman, atu ema bele haree katak nia halao ninia hahalok iha Maromak. João 3:21

Serake Ita-boot iha hanoin ka dúvida ruma ne'ebé ita hanoin katak Ita-boot rasik mak tenke resposta? 

Dala ruma, ita sente moe atu husu pergunta tanba ita hanoin katak ita tenke hatene ona resposta sira ne'e. Maibé Jesus konvida ita atu fó sai ita-nia dúvida, ta'uk no pergunta hotu ba nia. 

Iha Joao 3, ita haree Nicodemos, ema ne'ebé iha pozisaun aas iha relijiaun ne'ebé ema respeitu, mai hasoru Jesus iha kalan ida atu husu pergunta balu ba nia. 

Ema barak hanoin katak Nicodemos mai hasoru Jesus iha kalan tanba nia ta'uk ema farizeu sira seluk, ne'ebé sempre buka dalan atu hasai Jesus, sei haree Nikodemos no julga nia. 

Nu'udar farizeu, Nicodemos uza ninia moris tomak estuda Eskritura. Maibé nia seidauk iha resposta hotu. Duke sadere ba ninia matenek no koñesimentu rasik, Nicodemus hadook an husi ninia hahalok foti-an no ba hasoru Jesus. 

Maski karik nia ta'uk ema farizeu sira-nia julgamentu, maibé Jesus la julga nia. Nia simu Nicodemus nia pergunta sira no hatán lia-loos ba nia. 

Jesus hatán ba Nicodemos, hodi dehan: "Maibee nia nebee halo buat nebee loos sei mai iha naroman, atu ema bele haree katak nia halao ninia hahalok iha Maromak". João 3:21

Jesus dehan katak ema ne'ebé moris tuir lia-loos no la'o tuir nia, moris iha naroman. Sira ne'ebé la moris hanesan Jesus, halai husi naroman no moris iha nakukun laran. 

Nicodemus hakbesik ba Jesus iha kalan tanba ta'uk ema seluk nia hanoin. Maibé Jesus dezafia nia atu moris iha naroman no la'o tuir nia. Hosi sira-nia sorumutu ne'e, Jesus muda ninia moris. Nia la tuir tan Jesus iha nakukun laran. Iha Joao 7, nia defende Jesus ba ema farizeu sira seluk, no iha Joao 19, nia hakoi Jesus nia mate-isin. 

Hanesan Nicodemos, kuandu ita hili atu la'o hamutuk ho Jesus, ita mós la'o husi nakukun ba naroman no la ta'uk no aten-barani. Bainhira ita mai hasoru Jesus, nia hasoru ita iha fatin ne'ebé ita hela no fó matadalan ba ita kona-ba ninia lia-loos.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

🪷🪷🪷🪷🪷🪷🪷🪷🪷🪷🪷

Read More

Moris loos maihosi Maromak

Bazeia ba Roma 3: 9-31 Biblia Kadi 

Ita hakarak ka dezezu hetan dame. Ita hakarak iha relasaun di'ak ho Maromak no ho ema seluk. Maibé oinsá mak ita bele simu Maromak nia moris loos? 

Paulo kontinua ninia argumentu katak la iha ema ida mak loos. La iha ema ida ne'ebé moris loos, ida mós la iha (Roma 3:10b BK). Sira hotu la'o sees ona, hamutuk sira sai folin laek; la iha ida nebee halo diak, ida mós la iha (Roma 3:12 BK). Dalan ne'ebé loos mak dalan ba dame, maibé realidade mak, dalan dame nian ne'e sira la hatene (Roma 3:17 BK). 

Paulo konklui ninia diskusaun iha seksaun ne'e: klaru loos, katak ita sala-na'in, ita hotu, iha ro ne'ebé mout dadauk ho ema seluk? (Roma 3:20 BK). Liafuan ki'ik rua tuirmai ne'e signifika: Maibe agora... (Roma 3:21 BK). 

Hafoin aprezenta problema pekadu nian, Paulo agora aprezenta Maromak Ninia resposta ba problema ne'e, ne'ebé nakonu ho podér, mak "Moris loos maihosi Maromak" (Roma 3:21 BK). Moris loos maihosi Maromak ne'e ita ema labele hetan liuhosi lei ka ukun-fuan tamba la iha ema Ida (esetu/kecuali Jesus) mak halo tuir ukun-fuan tomak. Iha Testamentu Antigu (Lei no profeta sira) fo sasin kona-ba Ida ne'e no hatudu ba Maromak Ninia resposta ne'e (Roma 3:21 BK). 

Moris loos maihosi Maromak ne'e ita hetan liuhosi fiar ba Jesus Kristu (Roma 3:22 BK). Moris loos maihosi Maromak ne'e ita labele sosa. Ita so bele simu de'it hanesan prezente ne'ebé moos liuhusi fiar ba Jesus Kristu. Ne'e mak prezente ida ba ema hotu ne'ebé fiar (Roma 3:22). 

Tuirmai Paulo uza imajen tolu atu esplika saida mak Jesus nia mate iha kruz alkansa ona. Sira ida-idak iha ligasaun ba malu: 

1. Selu tiha ona kastigu ba sala nian

Justifikasaun nu'udar espresaun husi tribunál. Ita hetan justisa gratuita liuhosi Maromak Ninia grasa (Roma 3:24 BK). Maromak mak juis ne'ebé justu. Nia la bele ignora ita-nia sala. Maromak mai liuhosi ninia oan-mane Jesus Kristu ne'ebé mate tanba imi no ha'u:... Maromak tau Jesus nudar sakrifísiu nebee kasu ita-nia sala ne'ebé ita simu liuhosi fiar iha Jesus nia raan. Ida nee hatudu Maromak nia hahalok loos tanba Nia hatudu pasiénsia kona ba sala iha tempu uluk. Ida ne'e mós hatudu Ninia hahalok loos iha tempu agora. Nunee Nia mak loos, no Nia mak ida ne'ebé halo sira ne'ebé fiar iha Jesus sai moris loos, Roma 3:25-26 BK. Maromak rasik mak selu kastigu ne'e. 

Ita hetan justisa gratuita tanba Maromak nia grasa ka laran-di'ak (Roma 3: 24 BK). Grasa signifika ita hetan domin ne'ebé ita la merese hetan. Ne'e gratuita. Ita hetan la'os tamba ita merese. Ita labele sosa. Ne'e mak prezente ida. Tan ne'e, la iha fatin atu ita gaba an (Roma 3: 27-31 BK). 

Liuhusi Jesus nia mate iha kruz, nia selu kastigu ba ita-nia hahalok-aat, liafuan aat no hanoin aat hotu. Bainhira ita tau fiar ba Jesus, ita sai ema ne'ebé loos. Ita la iha buat ida atu ta'uk. Pena ne'e selu tiha ona. Imi simu ona prezente justisa husi Maromak. 

 2. Sala nia kbiit rahun ona 

Imajen segundu ne'ebé Paulo uza maihusi fatin merkadu: "Redensaun (sosa fila fali) liuhosi Kristu Jesus" (Roma 3:24 BK). Iha mundu antigu, iha mós problema kona-ba debe. Se ema ida iha tusan boot, karik sira tenke obrigatoriamente fa'an sira-nia an nu'udar atan atu bele selu fali debe sira.

Karik ema ida hamriik iha merkadu, oferese sira-nia an nu'udar atan. Karik iha ema ida sente hadomi no selu osan ne'ebé sira debe, entaun ema ne'ebé sira selu sai livre. Hodi halo nune'e, sira sei sosa fila fali ema ne'e ho presu redensaun ne'ebé folin-boot. 

Hanesan ne'e mós ho ita, "redensaun/penebusan" mai liuhosi Jesus Kristu (Roma 3:24 BK). Imi-nia sala mak hanesan tusan ne'ebé ita iha. Jesus, liuhosi ninia mate iha kruz, selu ona presu redensaun nian (Markus 10:45 BK). Ho dalan ida-ne'e, ita sai livre atu bele iha relasaun di'ak ho Maromak. Ita-nia relasaun di'ak restaura fali ona. Imi simu moris loos husi Maromak. Polusaun hosi sala hasai tiha ona.

 3. Paulo nia imajen terseiru iha lisaun ne'e mai husi templu. Maromak hasa'e nia nu'udar sakrifísiu atu hamoos sala, liuhusi fé ba ninia raan (Roma 3:25 BK).

Iha Testamentu Antigu, Maromak fó lei oioin kona-ba oinsá rezolve pekaduu, bainhira ema ida halo sala. Iha sistema sakrifísiu tomak ne'ebé hatudu seriadade hosi pekadu no presiza hamoos. Sala hamoos, bainhira pekadu hosi pekadór ida kasu ba animal ne'ebé sakrifika ka oho. 

Maibé "Karau aman no bibi sira nia raan nunka bele hasai sala (Ebreu 10:4). Sistema sakrifísiu antigu ne'e hanesan lalatak de'it (Ebreu 10:1) kona-ba buat ne'ebé atu mai. Realidade mak sakrifisiu Jesus nian. Tanba so Kristu nia raan de'it mak bele fasi tiha imi-nia sala no hasai tiha ninia polusaun. (Ebreu 10:10). Ne'e tanba Jesus mak sakrifísiu ne'ebé perfeitu. Nia mesak de'it mak moris perfeitu. Liuhusi Jesus Nia raan, ita simu moris loos hosi Maromak. 

🙏Nai, oinsá mak ha'u bele fó agradese ba Ita tanba moris loos iha Jesus liuhosi fé. Obrigadu tamba moris loos hosi ita, Hau bele simu paz, perdaun, liberdade no hamoos liuhosi Jesus Ninia raan🙏.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

🪷🪷🪷🪷🪷🪷🪷🪷🪷🪷🪷

Referensia: Roma 3: 9-31 Biblia Kadi 

9 Nunee oinsaa? Ita ema Judeu diak liu fali sira ka? Lae liu! Tanba ita foin hatudu katak sala ukun ema hotu, inklui ema Judeu sira no ema Jentiu sira.

10 Hanesan sira hakerek nanis ona,

“La iha ema ida nebee moris loos, ida mos la iha.”

11 La iha ema ida nebee kompriende,

la iha ida nebee buka tuir Maromak.

12 Sira hotu lao sees ona, hamutuk sira sai folin laek; la iha ida nebee halo diak, ida mos la iha.

13 “Sira nia kakorok hanesan rate nebee nakloke hela, sira lohi ho sira nia nanaal.” “Samea nia veneno mak iha sira nia ibun tutun.”

14 “Sira nia ibun nakonu ho malisan no liafuan moruk.”

15 “Sira nia ain halai atu fakar raan.”

16 Sira lao tuir dalan nebee halakon no foo terus.

17 Sira la hatene dalan dame nian.

18 “Sira nia matan la hamtauk Maromak.”

19 Agora, ita hatene katak saida mak lei dehan, lei nee dehan ba sira nebee iha lei nia okos. Atu nunee ibun hotu sei nonook, no ema hotu iha mundu merese atu simu kastigu iha Maromak nia oin.

20 Tanba la iha ema ida nebee sai loos iha Maromak nia oin liu hosi halo tuir lei. Maibee liu hosi lei ita hatene kona ba ita nia sala.

21 Maibee agora, moris loos mosu mai hosi Maromak nebee ketak hosi lei. Lei no profeta sira foo sasin kona ba moris loos nee.

22 Ema hotu nebee fiar bele hetan moris loos hosi Maromak. Ida nee mai liu hosi fiar iha Jesus Kristu. Ema hotu hanesan deit.

23 Tanba ema hotu-hotu halo ona sala, no sira la too Maromak nia glória.

24 Maibee ita bele sai loos liu hosi Ninia grasa nebee Nia foo gratis deit. Tanba Nia hola fali ita iha Jesus Kristu.

25 Maromak tau Jesus nudar sakrifísiu nebee taka ita nia sala nebee ita simu liu hosi fiar iha Jesus nia raan. Ida nee hatudu Maromak nia hahalok loos tanba Nia hatudu pasiénsia kona ba sala iha tempu uluk.

26 Ida nee mos hatudu Ninia hahalok loos iha tempu agora. Nunee Nia mak loos, no Nia mak Ida nebee halo ema loos nebee fiar iha Jesus.

27 Entaun ita bele gaba aan ka? La bele! Ida nee liu hosi lei saida? Liu hosi lei hahalok nian? Lae, maibee liu hosi lei fiar nian.

28 Tanba ita hatene ona katak ema sai loos liu hosi fiar, nebee ketak hosi hahalok nebee tuir lei.

29 Nia mak Maromak ba ema Judeu sira deit ka? Laos Nia mos Maromak ba ema Jentiu sira? Sin, ba ema Jentiu sira mos.

30 Tanba iha Maromak ida deit, nebee sei halo loos sira nebee iha sirkunsizaun liu hosi fiar, no mos sira nebee la iha sirkunsizaun liu hosi fiar.

31 Entaun ita halakon lei tanba fiar ka? La bele! Maibee, ita hametin lei.

Read More