Sai Maromak nia oan

Reflesaun bazeia ba Roma 8:1-17 Biblia Kadi 

Oinsá mak Ita haree Ita-nia an iha relasaun ho Maromak? Serake ita sempre sente sala? Serake ita-boot sira sempre moris iha kalohan metan sala nia laran? Roma 8:1 hatete "Nunee ema nebee iha Kristu Jesus sei la hetan kastigu".

Karik ita sente tauk no sala, ida ne'e la'ós dalan ne'ebé Maromak intende ba moris nu'udar ema kristaun. Ita mak Maromak nia oan ne'ebé Maromak hadomi tebes, no nia simu no fó kbiit ba ita tanba nia domin inkondisionál. Nia hakarak ita hetan liberdade husi sala no kondenasaun no atu hetan relasaun ne'ebé besik ho nia, besik liu fali relasaun di'ak entre inan-aman no oan. 

Iha momentu ne'ebé ita simu Jesus, ita-nia pekadu sira iha pasadu hamoos ona. Ita simu perdua kompletamente. Bareira entre Ita ho Maromak hasai tiha ona. Paulo hakerek: "Nunee ema nebee iha Kristu Jesus sei la hetan kastigu" Roma 8:1. Imi sai livre husi ukun-fuan sala no mate nian (Roma 8:2). Maski ukun-fuan ne'e di'ak, maibé la iha kbiit atu salva ita tanba ita-nia natureza sala-na'in (Roma 8:3a). Tan ne'e, Maromak haruka Jesus mate ba ita nu'udar sakrifísiu sala nian (Roma 8:3b). Jesus hasai tiha ita-nia sala hotu. 

Agora, ita bele moris iha espíritu. "Tanba agora ita lao tuir Espíritu laos tuir isin nia hakarak" Roma 8:4. Espíritu santu lidera ita atu ita la tau ita-nia hanoin ba " buat nebee isin nian. Maibee sira nebee moris tuir Espíritu hanoin deit buat nebee Espíritu nian" Roma 8:5. Ida-ne'e lori ita ba moris no dame (Roma 8:6).

Paulo la dehan katak ita sei sai ema ne'ebé perfeitu, maski ita sei hasoru nafatin sala nia limitasaun hotu, maibé ita rasik sei hetan moris tuir Maromak nia liafuan (Roma 8:10). Ida-ne'e bele akontese tanba agora Maromak nia espíritu moris iha ita (Roma 8:9).

Liután ne'e, ita bele haree ba oin kona-ba resuresaun Isin nian iha futuru. Espíritu santu ne'ebé moris iha Jesus no halo Nia moris hi'as fali, hela iha ita. Tan ne'e, ita-nia isin, hanesan Jesus, sei moris hi'as. Paulo dehan: "No se Maromak nia Espíritu nebee halo Jesus moris hias ona hosi mate mak hela mos iha imi, Nia nebee halo Kristu Jesus moris hias ona hosi mate sei halo mos imi nia isin moris hias liu hosi Ninia Espíritu nebee hela iha imi" Roma 8:11.

"Maibee ema hotu nebee simu Nia, nebee fiar ba Ninia naran, Nia foo kbiit atu sai Maromak nia oan sira. João 1:12. Ita sai Maromak nia oan, la'ós tanba ita moris hosi ita-nia inan, maibé tanba ita moris fila fali liuhosi espíritu Santu. 

Se ema Roma mak "ema Timor" husi Testamentu Foun, entaun Roma 8 mak ninia foho Ramelau no ninia tutun mak versíkulu sira ne'ebé Paulo deskrebe katak ema ne'ebé espíritu santu dirije mak Maromak nia oan (Roma 8:14-17). 

Privileju saida mak ema Kristaun hetan bainhira espíritu santu dirije?

 1.Status aas liu 

 La iha status ne'ebé aas liu fali Maromak nia oan (Roma 8:14). Tuir Roma nia lei, se ema adultu ida hakarak atu transfer ninia eransa nia bele hili oan ida, ou nia bele adopta oan hakiak ida atu simu ninia eransa. Maromak iha oan-mane ida de'it, Jesus, maibé Nia adopta oan-mane no oan-feto barak tama ba Ninia familia. La iha buat ida iha mundu ne'e ne'ebé ita bele kompara atu sai Kriador lalehan nia oan.

2. Sai belun ne'ebé besik liu.

Ita iha relasaun ne'ebé besik liu ho Maromak. Paulo hatete katak liuhusi espíritu ita hakilar "Aba, Aman" (Roma 8:15). Karik liafuan Aramaic ne'e mak liafuan primeiru ne'ebé Paulo ko'alia, no Ida ne'e hanesan nia ko'alia ba ninia aman iha mundu. Jesus uza "Aba" atu ko'alia ba Maromak molok Nia mate. Ida ne'e hatudu respeitu ne'ebé kle'an no intimidade ne'ebé besik liu. Aba ne'e iha familia karik hanesan saida mak ita bolu ita-nia aman "pai" ka "Papa". Iha parte barak iha Mediu Oriente, liafuan ne'e sira sei hanorin ba labarik sira. 

Nu'udar Maromak nia oan, ita la'ós tan atan ba ta'uk, maibé oan hakiak hosi Maromak (Roma 8:15). Ita bele hakbesik liután ba Ita-nia Aman iha lalehan. 

 3. Bele esperiénsia relasaun kle'an liu ho Maromak.

 Espiritu fó esperiénsia ne'ebé kle'an liu kona-ba Maromak. "Espíritu nee foo sasin ho ita nia espíritu, katak ita mak Maromak nia oan sira" Roma 8:16. Nune'e mós ita hakarak ita-nia oan sira atu hatene no hatudu ita-nia domin ba sira no ita-nia relasaun ho sira, tan ne'e Maromak hakarak ninia oan sira atu hetan domin no relasaun hanesan ne'e. 

 4. Hetan seguransa boot liu. 

 Atu sai Maromak nia oan-mane ka oan-feto mak seguransa boot liu hotu. Tanba se ita mak Maromak nia oan sira, " ita sei simu liman rohan hosi Maromak. No ita sei simu liman rohan nee hamutuk ho Kristu. Naran katak ita simu terus hamutuk ho Nia, atu nunee ita bele simu mos glória hamutuk ho Nia" Roma 8:17. Tuir lei Roma nian, oan hakiak ida bele hetan eransa hosi ninia Aman hakiak nia riku-soin. 

Nu'udar Maromak nia oan, ita simu liman-rohan. Buat ne'ebé diferente mak ita la simu ita-nia liman-rohan momentu ita-nia aman mate, maibé ita simu hafoin ita mate iha Kristu. Ita sei goza domin rohan-laek ho

Jesus, hodi dehan: "se ita mak oan sira, entaun ita sei simu liman rohan hosi Maromak. No ita sei simu liman rohan nee hamutuk ho Kristu" Roma 8:17a

Paulo hatutan tan katak, "...ita simu terus hamutuk ho Nia, atu nunee ita bele simu mos glória hamutuk ho Nia" Roma 8:17b. Iha ema kristaun nia moris, glória mai husi terus: "Ita la'o tuir buat ne'ebé Kristu la'o liu ona. Se ita la'o liu tempu susar ho Nia, entaun ita sei la'o liu tempu di'ak ho Nia! (Roma 8:17). Ema kristaun identifika sira-nia an ho Jesus Kristu. Ida-ne'e hamosu terus boot ba ema kristaun ohin loron. Ita sei hasoru susar balu, maibé ita-nia liman-rohan nu'udar Maromak nia oan sei barak liu fali susar hotu ne'e. 

Abba Aman, obrigadu ba privilejiu sai Ita-nia oan. Obrigadu ba Ita-Boot tanba Ita-nia espíritu ne'ebé moris iha ha'u-nia laran fó sasin ho ha'u-nia espíritu katak ha'u mak Ita-nia oan. Obrigadu tanba asegura ona ha'u-nia futuru katak ha'u bele simu liman-rohan hamutuk ho Kristu.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Referensia 

Roma 8: 1-17 

1 Nunee ema nebee iha Kristu Jesus sei la hetan kastigu.

2 Tanba lei Espíritu Moris nian halo ita livre iha Kristu Jesus hosi lei sala no mate nian.

3 Tanba Maromak halo buat nebee lei la bele halo. Tanba iha ema nia isin, lei nee fraku. Maromak haruka Ninia Oan Mane ho ilas hanesan isin sala nian. No tanba sala nee, Nia foo kastigu ba sala iha isin.

4 Tanba lei dehan ita tenki iha moris loos. Entaun Nia kumpri ida nee iha ita. Tanba agora ita lao tuir Espíritu laos tuir isin.

5 Tanba sira nebee moris tuir isin hanoin deit buat nebee isin nian. Maibee sira nebee moris tuir Espíritu hanoin deit buat nebee Espíritu nian.

6 Se ita hanoin deit buat isin nian ita mate. Maibee se ita hanoin deit buat Espíritu nian ita hetan moris no dame.

7 Neon nebee hanoin deit isin sai inimigu ba Maromak. Tanba nia la halo tuir Maromak nia lei, no nia la bele duni.

8 Sira nebee iha isin laran la bele halo Maromak kontenti.

9 Imi laos iha isin laran, maibee iha Espíritu laran, se karik Maromak nia Espíritu hela iha imi nia laran. Ema nebee la iha Kristu nia Espíritu, nia laos Kristu nian.

10 No se Kristu iha imi, nunee imi nia isin mate tanba sala maibee Espíritu moris tanba hahalok loos.

11 No se Maromak nia Espíritu nebee halo Jesus moris hias ona hosi mate mak hela mos iha imi, Nia nebee halo Kristu Jesus moris hias ona hosi mate sei halo mos imi nia isin moris hias liu hosi Ninia Espíritu nebee hela iha imi.

12 Nunee, maun-alin sira, ita iha obrigasaun, laos ba isin atu moris tuir isin.

13 Tanba se imi moris tuir isin, imi sei mate. Maibee se imi hamate hahalok isin nian liu hosi Espíritu, imi sei moris.

14 Tanba ema hotu nebee lao tuir Maromak nia Espíritu mak Maromak nia oan sira.

15 Tanba imi la simu espíritu nebee halo imi sai atan hodi tauk fali. Maibee imi simu Espíritu nebee halo imi oan hodi bolu, “Apaa, Aman!”

16 Espíritu nee foo sasin ho ita nia espíritu, katak ita mak Maromak nia oan sira.

17 No se ita mak oan sira, entaun ita sei simu liman rohan hosi Maromak. No ita sei simu liman rohan nee hamutuk ho Kristu. Naran katak ita simu terus hamutuk ho Nia, atu nunee ita bele simu mos glória hamutuk ho Nia.

Read More

Ukun-Nain ba Buat hotu

O, Oh Nai, iha forsa no podér no glória no vitória no majestade. Tanba buat hotu-hotu nebee iha lalehan no mundu mak O nian. Reinu mak O nian, Oh Nai, no ami hasae O nebee ulun ba buat hotu. 1 Krónikas 29:11

Se ita haree mapa kona-ba mundu, ita bele haree nasaun oioin ne'ebé la hanesan iha área oioin. Nasaun ida-idak iha ukun-na'in ida-ne'ebé mak responsavel ba buat ne'ebé akontese iha fronteira sira-ne'e. Hahú kedas husi tempu kriasaun.mundu ne'e, ema sai nain ba porsaun rai balu ne'ebé sira hela ba.

Karik fasil atu haree mundu no hanoin katak ukun-na'in sira-ne'e mesak de'it mak kontrola buat ne'ebé akontese iha sira-nia rai. Maski nune'e, bainhira ita lee sagrada estrutura, ita haree katak maski ema ukun nasaun oioin, maibé Maromak mak ukun duni buat hotu. 

Maski ulun-nain barak mak iha kbiit atu ukun sira-nia rai no povu, maibé Maromak nia Liafuan hatete katak Maromak de'it mak iha podér loos. Nia mak kria buat hotu ne'ebé iha, tan ne'e nia mesak de'it mak boot no poderozu /kbiit boot loos. 

Buat hotu iha rai no iha lalehan mak Maromak nian, no maski buat hotu ne'ebé akontese iha mundu ne'e, Maromak sei ukun nafatin buat hotu. Maski ukun-na'in sira iha rai mak deside saida de'it, maibé ikus mai Maromak kontrola buat hotu. Tan ne'e mak Maromak merese hetan hahí no glória hotu tanba ninia kbiit boot no poderozu. 

So take some time today to think about the greatness of God who made everything that exists, and yet still desires a relationship with His people. God is not some lofty ruler who makes decisions in a far off place, but He is present in the lives of those who call Him Lord.

Tan ne'e, foti tempu balu, ohin loron, atu hanoin kona-ba Maromak nia kbiit boot ne'ebé halo buat hotu ne'ebé iha, maibé Nia sei hakarak nafatin atu iha relasaun di'ak ho ninia povu. Maromak la'ós ukun-na'in boot ida-ne'ebé foti desizaun iha fatin dook, maibé nia iha ema sira ne'ebé bolu nia Nai nia moris.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷

Read More

Ajuda iha funu hasoru sala

Bazeia ba Roma 7:7-25 BK (Biblia Kadi)

Karik Ita sente iha hahalok-aat ka sala ruma ne'ebé ita hakarak hapara ka hakotu maibé la konsege? Serake ita desidi atu hapara halo buat aat ruma, maibé kontinua halo nafatin?

Paulo hakerek: "Hau la kompriende hau nia hahalok. Tanba buat nebee hau hakarak halo, hau la halo. No buat nebee hau hakribi, ida nee mak hau halo fali. Roma 7:15 BK

Nia kontinua dehan: "Nunee hau hetan lei ida, katak bainhira hau hakarak halo buat diak, buat aat mos besik ho hau. Tanba hau kontenti ho Maromak nia lei iha hau nia laran. Maibee hau haree lei seluk iha hau nia isin nebee funu hasoru lei nebee iha hau nia neon. Lei seluk nee kastigu hau ba lei sala nian nebee hela iha hau nia isin" Roma 7:21-23 BK

Paulo hatete: Hau presiza ajuda! (Roma 7:18). Nia hakilar dehan: "Oh hau nee ema aat duni! See mak bele salva hau hosi isin mate nee? Roma 7:24

Antes iha versikulu anterior nia hatete katak "Maibee agora ita livre ona hosi lei. Ita mate ona ba buat nee, nebee kastigu ita. Nunee ita bele serví liu hosi dalan foun Espíritu nian, laos liu hosi dalan tuan surat nian, Roma 7:6. Paulo hanoin kona-ba pergunta sira ne'ebé sei mosu kona-ba buat ne'ebé nia hatete. Iha Roma 7:7 Paulo dehan "Entaun ita sei dehan saida? Lei mak sala ka? La bele! Se lei la iha karik, hau sei la hatene kona ba sala. Tanba hau sei la hatene kona ba hahalok nebee kaan se lei la dehan, “O la bele kaan” Roma 7:7

Nia hatudu katak la'ós ukun-fuan mak pekadu. Pelu kontrariu."Nunee lei mak santu, no ukun fuan mak santu, loos no diak", Roma 7:12. Ita mak sala nain. Ukunfuan hatudu ida ne'e liuhosi revelasaun saida mak pekadu no revela katak ita labele kumpri ukunfuan kompletamente. 

Pergunta tuirmai mak, se ukun-fuan mak di'ak loos, tanbasá mak ida-ne'e lidera ita ba mate? (Roma 7:13). Paulo hatete: "Lae. Ne'e la'ós ukun-fuan, maibé ita-nia sala mak lori ita ba mate. Se ema ruma hetan kondenasaun ba krime ruma, la'ós lei mak kauza pena ne'e. Maibé krime ne'e. Saida mak ukunfuan ka lei halo mak atu estabelese padraun ida. 

Iha debate barak ona kona-ba perikop Ida ne'e. Debate prinsipál mak serake Paulo ko'alia kona-ba ninia situasaun molok sai ema kristaun ka depois sai ema kristaun?. Klaru katak ida-ne'e autobiografiku ida, maibé nia mós ko'alia kona-ba kondisaun jerál ema nian ne'ebé moris iha lei nia okos. 

Karik ita presiza haree eskritura sira-ne'e ko'alia kona-ba ema kristaun ne'ebé la moris iha espíritu nia kbiit, maski sira hakarak atu halo nune'e. Ita bele lee ida-ne'e nu'udar ema nia halerik atu moris iha espíritu iha tempu ne'ebà, no ita rona fali halerik ne'e iha ema kristaun nia moris to'o tinan barak tuir mai to'o agora. 

Ita hatene katak Maromak nia ukun-fuan mak santu, loos no di'ak (Rona 7:12). Ita hatene katak ukunfuan mak espirituál (Roma 7:14). Maibé ita sempre falla atu kumpri. "Tanba ita hatene katak lei mak espíritu nian. Maibee hau mak isin nian nebee faan ona atu sala domina hau. Hau la kompriende hau nia hahalok. Tanba buat nebee hau hakarak halo, hau la halo. No buat nebee hau hakribi, ida nee mak hau halo fali. Roma 7:14-15

Diferensa entre antes no depois sai ema kristaun la'ós katak antes ne'e ha'u halo sala, no depois ne'e ha'u la iha sala ona. Lae, antes ita sai ema kristaun, pekadu mak nu'udar ita-nia karakter; tamba ne'e ita la prekupa kona-ba pekadu sira ne'e. Maibé kuandu ha'u sai ona ema kristaun, ha'u lakohi halo ida-ne'e. No Karik ha'u halo pekadu, ne'e halo ha'u sente moras no arrepende an. La'ós tanba ha'u husik ha'u-nia an monu, maibé ha'u sente moras tamba Hau la halo tuir Kristu.

Se ita boot hanesan ha'u, ita hatene di'ak funu hasoru sala ne'e. Bainhira ita funu hasoru pekadu, ida-ne'e mak hatudu katak ema kristaun ne'ebé loloos. 

Bainhira Paulo hakilar hodi husu ajuda, nia hatene ona resposta ba pergunta ne'e: "Oh hau nee ema aat duni! See mak bele salva hau hosi isin mate nee? Agradese ba Maromak, liu hosi ita nia Nai Jesus Kristu! Entaun, hau rasik serví Maromak nia lei ho hau nia neon, maibee hau serví lei sala nian ho hau nia isin. Roma 7:24-25 BK

Karik, atu komprende liafuan sira-ne'e mak ho liafuan rua tuir mai: "Hau rasik" (Roma 7:25b). Ita rasik mak atan ba pekadu nia ukun-fuan, maibé ida-ne'e la'ós istória nia rohan. Paulo kontinua ko'alia kona-ba liberdade boot ne'ebé espíritu santu lori mai ita-nia moris. 

Bainhira ha'u haree ha'u-nia an nu'udar ema kristaun ne'ebé partensi ba Kristu, ha'u hatene katak ha'u la livre atu halo sala. Bainhira ha'u haree ha'u Nia an nudar ema Kristaun iha mundu ha'u mós nafatin la livre atu halo sala. Maibé bainhira ha'u haree ha'u-nia an hanesan ema Kristaun ne'ebé hetan poder hosi Espíritu Santu, ha'u hatene katak ha'u iha liberdade atu manan pekadu 

Nai, ha'u hakilar hodi husu ajuda ba Ita. Favór ida, halo nakonu ha'u ho Ita-nia espíritu santu ohin. Ha'u presiza duni espíritu santu nia ajuda hodi hatudu ha'u-nia moris tuir ita-nia hakarak.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷

Referensia 

Roma 7:7-25 BK

7 Entaun ita sei dehan saida? Lei mak sala ka? La bele! Se lei la iha karik, hau sei la hatene kona ba sala. Tanba hau sei la hatene kona ba hahalok nebee kaan se lei la dehan, “O la bele kaan.”

8 Maibee sala nee hetan oportunidade liu hosi ukun fuan no kria hahalok kaan oi-oin iha hau nia laran. Tanba bainhira lei la iha, sala mak mate.

9 Tanba uluk hau moris ketak hosi lei. Maibee bainhira ukun fuan mai, sala foin moris, no hau mate.

10 Ukun fuan nebee tuir lo-loos atu foo moris, ikus mai lori hau ba mate.

11 Tanba sala foti oportunidade hosi ukun fuan atu lohi hau. No liu hosi ukun fuan nee, sala oho hau.

12 Nunee lei mak santu, no ukun fuan mak santu, loos no diak.

13 Entaun, buat nebee diak halo hau mate ka? Lae! Maibee sala mak halo hau mate liu hosi buat nebee diak. Ida nee hatudu katak sala mak sala duni, no liu hosi ukun fuan sala sai aat tebes.

14 Tanba ita hatene katak lei mak espíritu nian. Maibee hau mak isin nian nebee faan ona atu sala domina hau.

15 Hau la kompriende hau nia hahalok. Tanba buat nebee hau hakarak halo, hau la halo. No buat nebee hau hakribi, ida nee mak hau halo fali.

16 Entaun se hau halo buat nebee hau lakohi halo, hau konkorda katak lei mak diak.

17 Agora, laos tan hau mak halo ida nee, maibee sala nebee hela iha hau nia laran mak halo ida nee.

18 Tanba Hau hatene katak la iha buat diak ida nebee hela iha hau, katak iha hau nia isin. Tanba hau hakarak halo buat diak, maibee hau la konsege atu halo ida nee.

19 Tanba buat diak nebee hau hakarak halo, hau la halo. Maibee buat aat nebee hau lakohi halo, ida nee mak hau halo beibeik.

20 Se hau halo buat nebee hau lakohi halo, entaun ida nee laos hau mak halo, maibee sala nebee hela iha hau nia laran.

21 Nunee hau hetan lei ida, katak bainhira hau hakarak halo buat diak, buat aat mos besik ho hau.

22 Tanba hau kontenti ho Maromak nia lei iha hau nia laran.

23 Maibee hau haree lei seluk iha hau nia isin nebee funu hasoru lei nebee iha hau nia neon. Lei seluk nee kastigu hau ba lei sala nian nebee hela iha hau nia isin.

24 Oh hau nee ema terus duni! See mak salva hau hosi isin mate nee?

25 Agradese ba Maromak, liu hosi ita nia Nai Jesus Kristu! Entaun, hau rasik serví Maromak nia lei ho hau nia neon, maibee hau serví lei sala nian ho hau nia isin.

Read More