Reflesaun bazeia ba Roma 8:18-39 Biblia Kadi
Serake iha Ita-nia moris, iha situasaun balu ne'ebé halo Ita kestiona Maromak nia domin?
Paulo sofre maka'as los - liuhosi ema baku, tama prizaun, no hetan susar barak seluk tan.
Maibé nia hatete katak terus sira-ne'e la bele kompara ho glória ne'ebé ita sei haree loron ida. La iha komparasaun entre tempu susar sira ohin loron no tempu di'ak sira oin mai (Roma 8:18).
Bainhira imi hein hela, imi iha espíritu nia fuan primeiru (Roma 8:23). Espíritu santu mak garantia ba glória iha futuru. Loron ida, kriasaun tomak sei sai livre (Roma 8:21). Iha ne'e no agora, ita-nia isin bele sai aat liután (Roma 8:22) bainhira isin-lolon ne'e iha degradasaun ka neneik - neneik sai aat liután, maibé loron ida isin-lolon ne'e sei restaura no sai di'ak fali. Ita-nia moris-hias la'ós de'it iha espíritu, maibé fiziku mós. Ita hein ho laran-manas ba redensaun isin nian (Roma 8:23).
Paulo uza análogu isin-rua nian.Tanba ita hatene katak kriasaun tomak halerik hamutuk no tanis ho kanotak moras too agora (Roma 8:22).
"Nunee mos, Espíritu ajuda ita tanba ita sei fraku. Tanba ita la hatene atu husu saida bainhira ita halo orasaun, maibee Espíritu rasik halo ita nia orasaun ho lian halerik nebee klean liu ema nia lian" Roma 8:26. Nia fó dalan ba ita atu halo orasaun tuir Maromak nia hakarak (Roma 8:27). Se espíritu santu mak dirije ita atu halo orasaun, ita sei hetan resposta duni, tanba orasaun sira ne'e sei tuir Maromak nia hakarak.
Buat hotu ne'ebé akontese iha moris la'os naran akontese de'it. "Ita hatene katak buat hotu halao hamutuk hodi halo diak ba sira nebee hadomi Maromak, ba sira nebee Maromak bolu tuir Ninia planu" Roma 8:28
Iha ita-nia moris tomak, Maromak serbisu hela. Buat hotu inklui mós ita-nia eru sira. Maromak bele mós foti ita-nia eru sira no halo buat sira-ne'e sai di'ak. Nia mak ukun-na'in. Iha buat hotu Nia bele halo buat di'ak ba sira ne'ebé hadomi Nia. Krús hatudu katak hanesan Maromak halo akontesimentu ne'ebé aat liu iha istória no halo ida-ne'e sai di'ak liu fali buat ne'ebé aat liu iha ita-nia moris. Maromak bele foti buat ne'ebé aat liu iha ita-nia moris no uza buat sira-ne'e ba buat di'ak.
Promesa sira ne'e aplika ba ema kristaun hotu. Nia esplika iha versíkulu 29-30, "Tanba ema nebee Nia konhese nanis ona, Nia mos desidi ona atu sira bele sai hanesan Ninia Oan Mane.Ema nebee Nia desidi ona kona ba ida nee, Nia mos bolu sira. No sira nebee Nia bolu ona nee, Nia mos halo sira sai loos. No sira nebee Nia halo loos ona, Nia mos foo glória ba sira, Roma 8:29-30. Eventu haat primeiru akontese ona, maibé glória mak eventu ida iha futuru. Maibé, Paulo mós uza "past tense" ka fraze tempu pasadu ba eventu sira hotu. "Ita hetan... glória." Paulo uza "tense" ne'ebé kompleta ona, Ida ne'e hatudu Paulo ninia serteza ba futuru. Futuru ne'ebé seguradu ona (bainhira ita mantein fiél to'o rohan).
Ida-ne'e estraordinariu. Karik ida-ne'e mak deklarasaun fé ne'ebé berani tebes iha testamentu foun tomak. Ida ne'e ko'alia kona-ba seguransa totál. Seguransa ema kristaun nian mak solídu bazeia ba Maromak nia domin. Fundasaun fé ida ne'e kle'an liu kondisaun no sentimentu hotu.
Oinsá ita bele serteza kona-ba Maromak Ninia domin? Paulo husu pergunta 5 tuir mai:
1. Ho Maromak iha ita-nia sorin, oinsá mak ita bele Lakon? "Se Maromak hamutuk ho ita, see mak bele kontra ita? Roma 8:31b. Se Maromak mak ba ita, buat ne'ebé ema seluk hanoin la importante. Ita livre husi ta'uk ba ema no la hanoin demais kona-ba ema seluk nia hanoin.
2. Se Maromak fó ninia Oan-Mane mesak ba ita, serake ita hanoin katak nia bele tahan netik buat seluk ba ita? "Nia nebee la husik Ninia Oan Mane rasik, maibee entrega Oan nee tanba ita hotu, laos Nia sei foo gratis buat hotu ba ita? Roma 8:32
3. Se mak barani atu halo presegisaun ba Ita? " See mak foo sala hasoru sira nebee Maromak hili ona? Roma 8:33a
4. Se Maromak mak juis no Jesus mak ita-nia konsellu atu defende ita, oinsá mak prosekusaun/tunturan bele hetan susesu? "Maromak halo sira sai loos, se mak bele kondena, Roma 8:33b-34. Jesus mak ita-nia advogadu defeza nian. Nia iha kualifikasaun ne'ebé boot liu. Kristu Jesus, ne'ebé mate ona (Roma 8:34) mak kumpre ona kastigu mate ba ita. Maromak "halo nia moris-hias" (Roma 8:34). Nia iha fatin onra nian, iha Aman Maromak Ninia sorin kwana (Roma 8:34). Nia halo orasaun ba Ita (Roma 8:34). Nia hamriik metin ba ita. Jesus nunka para atu halo orasaun ba Ita.
5. Oinsá mak ema ida bele haketak malu entre ita no Kristu nia domin?
Ita bele haketak an husi ita-nia belun no família liuhusi situasaun balu ka mate. Maibé, se mak sei haketak ita husi Kristu nia domin? (Roma 8:35a). Ne'e la signifika katak moris ne'e fasil. Karik iha problema ruma, susar, odi, hamlaha, la iha uma, ameasa no traisaun. Maibé mesmu pekadu aat liu ne'ebé alista iha eskritura.. La iha buat ida mak bele separa ita tanba Jesus hadomi ita (Roma 8:35b-37). Iha situasaun susar hotu nia leet, ita bele kaer metin ba Maromak nia domin ba ita.
Paulo alista posibilidade sanulu-resin-hitu ne'ebé envolve kalamidade, ajénsia sira ne'ebé iha kbiit boot liu tempu no fatin (Roma 8:35-39). Ninia lista inklui difikuldade sira ne'ebé ita bele hasoru. Nia konklui katak nia totalmente konvensidu katak "la iha buat ida nebee bele haketak ita hosi Maromak nia domin, iha Kristu Jesus ita nia Nai" Roma 8:39
Nai, oinsá mak ha'u bele agradese ba Ita-Boot tanba Ita-Boot nia domin ne'ebé furak? Obrigadu ba Maromak tanba ita serbisu hamutuk iha buat hotu ne'ebé di'ak iha ha'u-nia moris, no la iha buat ida mak absolutamente bele haketak ha'u husi ita-nia domin.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Referensia
Roma 8:18-39
18 Tanba hau hanoin katak ita la bele kompara terus iha tempu agora ho glória nebee ita sei haree aban-bainrua.
19 Tanba kriasaun nee hein ho laran ba tempu nebee Maromak sei hatudu sai Ninia oan sira.
20 Tanba kriasaun nee tenki tama tempu folin laek, laos tanba kriasaun hakarak, maibee tanba Maromak haruka kriasaun atu tama tempu nee hodi simu esperansa.
21 Ita espera katak kriasaun nee sei sai livre hosi kastigu nebee halo nia sai aat no hetan liberdade ho glória nebee Maromak nia oan sira sei hetan.
22 Tanba ita hatene katak kriasaun tomak halerik hamutuk no tanis ho kanotak moras too agora.
23 No laos kriasaun deit, maibee ita mos nebee simu ona rezultadu primeiru nian hosi Espíritu. Ita mos halerik iha ita nia laran, tanba ita hein ho laran atu sai Maromak nia oan sira bainhira Nia hola fali ita nia isin.
24 Tanba ita simu ona salvasaun ho esperansa ida nee. Maibee tuir lo-loos esperansa nebee ita haree ona nee laos esperansa. Tanba see mak espera atu hetan buat nebee nia haree hetan ona?
25 Maibee se ita espera ba buat nebee ita la haree, ita hein ida nee ho pasiénsia.
26 Nunee mos, Espíritu ajuda ita tanba ita sei fraku. Tanba ita la hatene atu husu saida bainhira ita halo orasaun, maibee Espíritu rasik halo ita nia orasaun ho lian halerik nebee klean liu ema nia lian.
27 No Nia nebee buka hatene ema nia fuan laran hatene Espíritu nia hanoin. Tanba Espíritu halo orasaun ba santu sira tuir Maromak nia hakarak.
28 Ita hatene katak buat hotu halao hamutuk hodi halo diak ba sira nebee hadomi Maromak, ba sira nebee Maromak bolu tuir Ninia planu.
29 Tanba ema nebee Nia konhese nanis ona, Nia mos desidi ona atu sira bele sai hanesan Ninia Oan Mane. Nunee Jesus bele sai Maun Boot iha Ninia alin sira nia leet.
30 Ema nebee Nia desidi ona kona ba ida nee, Nia mos bolu sira. No sira nebee Nia bolu ona nee, Nia mos halo sira sai loos. No sira nebee Nia halo loos ona, Nia mos foo glória ba sira.
31 Entaun ita bele dehan saida kona ba buat sira nee? Se Maromak hamutuk ho ita, see mak bele kontra ita?
32 Nia nebee la husik Ninia Oan Mane rasik, maibee entrega Oan nee tanba ita hotu, laos Nia sei foo gratis buat hotu ba ita?
33 See mak foo sala hasoru sira nebee Maromak hili ona? Maromak halo sira sai loos.
34 See mak kondena? Tanba Kristu mak mate ona, no liu tan nee, Nia moris hias ona, no Nia iha Maromak nia liman loos, no tebes Nia halo orasaun tanba ita.
35 See mak haketak ita hosi Kristu nia domin? Terus, ka susar, ka ema hanehan ita, ka hamlaha, ka isin molik, ka perigu, ka surik?
36 Hanesan ema hakerek nanis ona,
“Tanba Ita, sira oho ami durante loron tomak,
sira haree ami hanesan bibi nebee sira atu oho.” Roma 8:36
37 Lae! Iha buat sira nee hotu ita mak liu fali manaan nain sira liu hosi Nia nebee hadomi ita.
38 Tanba hau fiar duni katak la iha buat ida - mate ka moris, ka anju sira, ka ukun nain sira, ka buat sira nebee iha agora, ka buat sira nebee atu mai, ka kbiit,
39 ka buat aas, ka buat klean, ka buat seluk-seluk tan iha kriasaun tomak - la iha buat ida nebee bele haketa
k ita hosi Maromak nia domin, iha Kristu Jesus ita nia Nai.
