Laran ne'ebé hakarak tuir Maromak

Haʼu-nia maluk doben, keta halo tuir hahalok neʼebé aat, maibé halo tuir hahalok neʼebé diʼak. Ema neʼebé halo diʼak mai husi Maromak. Ema neʼebé halo aat seidauk koñese Maromak. 3 João 1:11 TMF

Kuandu ita kuda fini masán, ita hein katak ai masán sei moris. Fini no abut sira mak determina tipu ai-huun sira ne'ebé moris iha rai. 

Hanesan ne'e mós, kuandu ita partensi ba Maromak, ita hein katak buat di'ak no hahalok loos sei krese iha ita-nia moris. Ita-nia hahalok mak refleta fini oioin ne'ebé ita kuda ona. 

Dalan ida-ne'ebé ita bele hatene Maromak nia serbisu iha ita-nia moris mak liuhosi haree ai-fuan sira ne'ebé ita prodús. Sinál ida kona-ba moris ne'ebé krese no tuir dalan Maromak nian mak moris ida ne'ebé hakarak halo tuir Maromak nia Liafuan. So ema ne'ebé gasta tempu ho Maromak de'it mak sei prodús hahalok hanesan ne'e iha sira-nia moris. 

Joao fó atensaun mai ita atu hanoin didi'ak kona-ba ai-fuan sira ne'ebé ita prodús iha ita-nia moris. Kuandu ita partensi ba Maromak, no ita gasta tempu ho Nia, ita-nia moris sei naturalmente prodús buat di'ak no moris ne'ebé loos. 

Ninia ojetivu la'os atu orgullu kona-ba hahalok di'ak hira mak ita prodús ona, maibé atu kultiva fuan- laran ne'ebé hakarak halo buat di'ak ba ema seluk hodi Na'i Jesus Nia naran. Ita la'os ema ne'ebé perfeitu, maibé ita-nia laran tenke dezezu atu tuir Maromak.

Foti momentu balu hodi hanoin kona-ba Ita-nia pensamentu no asaun iha semana kotuk. Serake ita-nia hanoin no asaun sira hatudu relasaun ne'ebé besik ba Maromak? Hanoin to'ok kona-ba pasu balu ne'ebé ita bele halo atu kria ritmu ne'ebé regular atu gasta tempu ho Maromak.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Haklaken ba mundu tomak

No Nia dehan ba sira, “Baa mundu tomak, no foo sai evanjelhu ba kriasaun hotu-hotu” Marcos 16:15 BK

Antes Jesus husik hela mundu no sa'e ba lalehan, nia halibur ninia dixipulu sira ne'ebé hamutuk ona ho nia durante tinan tolu nia laran. Bainhira sira tuur haleu meza hodi han, Jesus haruka sira atu kontinua serbisu ne'ebé nia hahú ona. 

Jesus uza maioria hosi ninia Ministériu haklaken kona-ba Maromak nia Ukun ne'ebé mai dadauk. Tan ne'e, responde ne'ebé loos ba Maromak Ninia reiñu ne'ebé to'o mai mak arepende katak fila kotuk ba hahalok-aat no fiar ba Jesus. 

Liafuan primeiru husi Jesus iha Evanjellu Marcos mak iha Marcos 1:15, no liafuan sira-ne'e avizu ka fó sai katak Maromak nia Ukun mai dadauk ona. No Jesus nia liafuan ikus ba ninia dixipulu sira, hahú iha Marcos 16:15, hanesan kontinuasaun hosi anunsiu primeiru ne'ebé nia fó sai ona iha inisiu. Jesus mós husu ita atu kontinua fó sai liafuan di'ak husi Evanjellu. 

Liafuan di'ak ne'e mak Jesus lori Maromak nia Ukun mai iha rai, no liuhusi ninia mate no moris-hias, nia fornese dalan ba ema hotu atu hetan moris foun iha Nia. 

Knaar fó sai kona-ba Jesus, ka atu fó-hatene ema seluk kona-ba Jesus, ne'e mak buat primeiru ne'ebé Jesus husu ba ninia dixipulu sira atu halo bainhira nia husik hela mundu. Ko'alia ba ema seluk kona-ba buat ne'ebé Jesus halo ona ba sira mak buat ne'ebé importante liu hotu ne'ebé ita bele halo ba ita-nia tempu. Ita simu ona prezente ne'ebé boot liu hotu - moris rohan-laek hamutuk ho Maromak. Maibé prezente furak ne'e mós disponivél ba mundu tomak.

Tan ne'e, foti tempu balu ohin loron atu halo orasaun ba sira ne'ebé la hatene esperansa ne'ebé Jesus fo. Halo orasaun atu sira bele hetan salvasaun, halo orasaun mós atu iha oportunidade atu fahe istória fiar nian ba sira. 

Konta historia kona-ba Jesus la signifika katak ita tenke hamriik iha dalan sira hodi hakilar, maibé ne'e katak ita tenke buka atu iha konversa ne'ebé iha valor ho ema seluk kona-ba Jesus. Kuandu ita fó-hatene ema seluk kona-ba moris foun no kona-ba Maromak nia Ukun ne'ebé disponivél ba sira, ita kontinua serbisu ne'ebé Jesus husik hela ba ita atu halo.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Maromak nunka muda

Nai, o nia Maromak, mak iha o nia laran, Nia mak asuwain ida nebee sei salva o; Nia sei sai haksolok kona ba o ho laran kontenti; Nia sei hamaus o ho Ninia domin; Nia sei dansa no kanta makaas kona ba o. Sofonias 3:17 BK

Entre tinan 640 to'o tinan 608 molok Kristu, profeta Sofonias ko'alia ba povu Izrael. Nia fó avizu ba sira kona-ba Maromak nia julgamentu, maibé nia mós fó-hanoin sira kona-ba Maromak nia promesa ba sira-nia futuru. 

 "Nai, o nia Maromak, mak iha o nia laran (iha imi-nia leet), Nia mak asuwain ida nebee sei salva o; Nia sei sai haksolok kona ba o ho laran kontenti; Nia sei hamaus o ho Ninia domin; Nia sei dansa no kanta makaas kona ba o" Sofonias 3:17 BK

Ita la'os ema Izrael iha tinan 640 antes de Kristu, maibé nu'udar ema ne'ebé estuda Maromak nia Liafuan, ita mós bele hetan komfortu husi Sofonias nia liafuan. 

Ita hatene katak Maromak mai iha ita-nia leet liuhusi Jesus no nia fó ninia espíritu ba ita kuandu ita fiar (João 1:14; Galasia 4:6). Ita mós hatene katak Maromak hadomi tebes ita (João 3:16, 1 Joao 4:16). Paulo hanorin katak Maromak nia dame sei guarda ita-nia laran no neon iha Kristu Jesus kuandu ita halo orasaun ba Nia (Filipinas 4: 6-7). 

Tan ne'e, maski ita la'ós profeta Sofonias ninia audensia orijinál, maibé ita bele hetan komfortu tanba ita hatene katak Maromak mak hanesan iha jerasaun hotu. Nia sei iha ita-nia leet, nia sei salva nafatin ema, nia sei haksolok nafatin ho ita, no nia sei taka nafatin Ninia oan sira ho Ninia domin ne'ebé la iha rohan. 

Nia nafatin ita-nia Maromak ne'ebé kbiit boot, no Nia tau matan ba sira ne'ebé mai no bolu Nia. 

Tan ne'e, ohin loron, uza tempu atu fó agradese ba Maromak no refleta Ninia fidelidade no ninia karakter ne'ebé la muda. Tuirmai, lee fali Sofonias 3:17 no ko'alia sai versu ne'e ho lian maka'as ba Ita-nia an no ba Ita-nia família.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More