Nia haree Nai

Maria Madalena baa no foo hatene ba eskolante sira, “Hau haree ona Nai!” No nia hatoo liafuan nebee Jesus dehan ba nia. João 20:18 BK

Maria Madalena mak feto ida-ne'ebé ema barak hatene liu iha Biblia. Nia hamutuk ho Jesus durante ninia serbisu haklaken to'o ninia moris rohan no depois Ninia moris-hias.Tempu dahuluk ita hasoru Maria iha Eskritura mak momentu Jesus halo milagre ida ba nia: 

 ... "Jesus lao ba sidade sira no aldeia sira hodi haklaken no foo sai evanjelhu kona ba Maromak nia reinu. No sira nain sanulu resin rua lao hamutuk ho Nia. Iha mos feto balu, nebee Nia kura tiha hosi espíritu aat sira no moras oi-oin, inklui Maria ho naran Madalena, nebee diabu nain hitu sai hosi nia" Lucas 8:1-2 BK

Hanoin to'ok Maria Magdalena oinsá nia senti la iha ema ida mak bele ajuda, nia hetan babeur hosi espíritu aat, la iha esperansa, nia hetan torturasaun, no la iha solusaun tamba hetan presaun hosi espiritu nakukun.

Maibé depois ne'e, Jesus mai hodi halo Maria Magdalena livre hosi espíritu aat ne'e . 

Iha tempu ne'ebá, momentu Jesus kura Maria Magdalena hosi torturasaun diabu nian, Nia rekupera hosi forsa nakukun. No Maria Magdalena haree Jesus. Nia la'o tuir nia. Husi dook, nia haree krusifikasaun ninia Salvador ne'ebé Nia fó ba ema hotu (Marcos 15: 40). Tuirmai, nia haree fatin ne'ebé ema Rai Jesus Ninia mate isin (Marcos 15:47). 

Iha dadeer-saan, Maria Madalena no feto nain-rua seluk ne'ebé la'o tuir Jesus hadeer no ba atu kose-mina ba Jesus nia mate-isin. 

Maibé la iha ema ida iha ne'ebá. 

Iha rate mamuk ne'e, Maria tanis tanba triste hodi hanoin katak ema hasai tiha ona Jesus. Maibé tuirmai nia rona Jesus nia lian: 

 "Jesus dehan ba nia, “Maria.” Maria fila oin, no dehan ba Nia, “Rabi!” (katak ‘Mestri’). João 20:16

Tuirmai Jesus tau fiar ba nia hodi halo serbisu importante ida. " baa hasoru Hau nia maun-alin sira, no dehan ba sira, ‘Hau sei sae ba Hau nia Aman, no imi nia Aman, ba Hau nia Maromak, no imi nia Maromak" João 20:17

Novidades kona-ba Jesus nia moris-hias habelar liuhusi Maria Madalena, feto ne'ebé uluk hetan terus tamba forsa nakukun. Husi ema hotu ne'ebé Nia bele hili ba deskobrementu gloriaozu ida ne'e, Nia hili Maria Magdalena. 

Nia ba hasoru dixipulu sira ho novidades ne'ebé muda ona ninia moris hodi dehan: "Hau haree ona Nai!" (João 20: 18).

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Kontinua prátika

Halo tuir buat sira nebee imi aprende, simu, rona no haree iha hau. No Maromak dame nian sei hamutuk ho imi. Filipe 4:9 BK

Bainhira ema ida treinu kona-ba serbisu ida, ikusmai nia tenke muda husi estuda ba prátika. 

Apóstolu Paulo hatene importansia hosi prinsipiu ne'e, tamba ne'e mak maski nia ema sulan iha prizaun laran, nia hakerek ba ba ema kristaun sira iha Filipe, rai-Gresia, liafuan sira tuirmai ne'e: 

"Halo tuir buat sira nebee imi aprende, simu, rona no haree iha hau. No Maromak dame nian sei hamutuk ho imi" Filipe 4:9 BK

Paulo hanorin ona sira. Paulo treinu ona sira. Paulo hadomi tebes sira. Tan ne'e mak Paulo hosi prizaun laran haforsa sira atu moris tuir buat ne'ebé sira aprende ona hosi nia. 

Jesus mós hadomi tebes ninia dixipulu sira, Nia la'ós finje halo di'ak, maibé Nia halo di'ak duni ho laran ne'ebé hakarak fó glória ba Maromak. Jesus nia alin ida naran Tiago mós hakerek kona-ba la'ós de'it rona ba Biblia, maibé halo tuir buat ne'ebé Biblia hatete. 

"Maibee sai ema nebee halo tuir liafuan nee, laos ema nebee rona deit, hodi imi la lohi imi nia aan rasik. Tanba se ema ida rona deit liafuan nee no la halo tuir, nia hanesan ema nebee haree di-diak ninia oin iha espelhu ida. Bainhira nia haree tiha ninia aan, nia baa deit no haluha kedas ninia oin nee oinsaa" Tiago 1:22-24

Hatene buat ida ne'e buat ida, maibé tau ba pratika buat ne'ebé ita hatene ne'e buat seluk ida.

Maromak nia dame mak prezente ne'ebé nia fó mai ita. Ne'e mak buat ne'ebé ita esperiensia bainhira ita hakbesik ba nia hodi moris iha dalan ne'ebé fó onra ba Nia. Se ita hatene Maromak nia hakarak maibé la halo buat ida kona-ba ida-ne'e, ne'e hatudu katak ita lakohi fó onra ba Maromak. Maibé se ita halo tuir Maromak nia hakarak, ita-nia hahalok hatudu katak ita-nia identidade nia abut maihosi Kristu nia huun. No kuandu ita hakbesik an ba Kristu, ida-ne'e ajuda ita atu hetan Ninia dame. 

Halo tuir Maromak nia hakarak, la'ós atu aprende de'it kona-ba Maromak nia hakarak, no Maromak sei fo Ninia dame ba ita.

Tan ne'e, ohin loron, estuda kona-ba buat ne'ebé Paulo hanorin (ne'ebé realidade Jesus Ninia hanorin). Tuirmai, husu ba ita-nia an: "Saida mak Maromak hanorin ba ha'u kona-ba ha'u-nia an, Ninia an rasik, no ema seluk? Oinsá mak ha'u bele aplika Ninia hanorin iha ha'u-nia moris?

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Kontinua lao ho espíritu

Se ita moris iha Espíritu, mai ita mós la'o iha Espíritu. Galásia 5:25 BK

Bainhira ita la'o hamutuk ho kolega ida, ita tenke la'o ho lais ne'ebé hanesan, la uluk mós la ikus. Karik ida lao uluk, ita na'in rua la lao hamutuk ona. Ida ne'e hanesan mós bainhira ita la'o hamutuk ho Maromak. 

Apóstolu Paulo hatete nune'e: "Se ita moris iha Espíritu, mai ita mós la'o iha Espíritu" Galásia 5:25 BK

Kuandu ita fiar ba Jesus nu'udar ita-nia Salvadór, ita simu prezente grasa no Espiritu Santu. Espíritu Santu mak Maromak. Ita simu Maromak! Espíritu Santu dirije, gia, no serbisu iha no liuhusi ita. 

Iha tempu balu ne'ebé ita tenta atu halai uluk Espiritu Santu. Tanba, se ita onestu, Nia la sempre muda lalais hanesan ita-nia hakarak. Dalaruma ita pergunta se Nia la'o ba oin ho ita ka kuida ita. Tan ne'e mak ita presiza pasiénsia atu la'o ho Maromak. 

Iha tempu seluk, ita hetan tentasaun atu la'o iha espíritu nia kotuk. Tanba dala ruma, nia dirije ita ba iha fatin ruma ne'ebé halo ita la komfortavél. Ita presiza esforsu no intensaun, presiza forsa fíziku no emosionál lao hamutuk ho espíritu Maromak nian. Tan ne'e mak la'o ho Maromak rekere korajen.

Ita bele kontinua la'o tuir Espiritu Santu hodi hakbesik ba Nia, fo atensaun ba Nia, ko'alia ho Nia, lee Ninia Liafuan, no hamutuk ho komunidade sira ne'ebé hadomi Nia. 

Tanba kuandu ita iha komitmentu atu hakbesik ba Maromak, iha buat ida mak serteza: Espiritu Santu sei dirije ita, kada pasu iha dalan ne'ebé atu la'o.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More