Laran-sadi'a ba sira ne'ebé iha dúvida fé nian

Hatudu laran luak ba sira nebee duvida hela. Judas 1:22 BK

Iha livru Juda, ita hetan instrusaun simples no kle'an ida: "Hatudu laran luak ba sira nebee duvida hela" Judas 1:22. Liafuan sira-ne'e fó-hanoin ita katak importante tebes atu hatudu laran-sadi'a no kompaixaun ba ema ne'ebé dúvida iha sira-nia fiar ba Maromak. Ne'e inklui ita-nia an rasik! 

Dúvida ne'e hanesan esperiensia komún ida iha ita-nia viajen fé nian. Ida-ne'e bele mosu husi fonte oioin, hanesan pergunta intelektuál sira, problema pesoál sira, ka influénsia husi mundu ne'ebé hale'u ita. Kuandu ita hasoru ema ne'ebé iha dúvida kona-ba fiar, importante tebes atu ita responde ho laran-sadi'a no kompriensaun.

Hatudu laran-sadi'a katak ita hatudu laran-di'ak no pasiénsia ba ema seluk. Ida-ne'e envolve rona sein julga ema, fó apoiu, no fó fatin ne'ebé seguru atu ema ko'alia ho onestu. Kuandu ita hatudu laran-sadi'a ba sira ne'ebé dúvida, ita kria ambiente ida-ne'ebé sira bele hato'o sira-nia pergunta no preokupasaun ho nakloke, sein ta'uk atu ema rejeita ka kondena. 

Nu'udar Kristu nia dixipulu, ita tenke banati-tuir ninia ezemplu. Jesus sempre hatudu laran-sadi'a ba sira ne'ebé luta iha sira-nia fiar. Nia hasoru ema iha sira-nia kondisaun idaidak, hodi fó matadalan no komprensaun. Jesus nunka rejeita sira ne'ebé buka Nia, mesmu sira iha duvida no inserteza.

Kuandu ita hatudu laran-sadi'a ba sira ne'ebé dúvida, ita la'ós de'it ajuda sira iha sira-nia viajen fé nian, maibé mós ita refleta Na'i Salvadór Ninia domin. Ita mós bele hatudu laran-sadi'a ba ita-nia an kuandu ita sente dúvida. 

Iha fatin ba pergunta sira. Iha fatin ba inserteza sira. Dúvida la intimida Jesus, no dúvida la presiza intimida ka halo ita ta'uk ita mós.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Maromak Ninia nia prezensa

Buat ida mak hau husu ona ba Nai, no hau sei buka ida nee deit: katak hau bele hela iha Nai nia uma durante hau nia moris tomak, hodi hau bele haree Nai nia oin furak, no medita iha Ninia templu. Salmu 27:4 BK

Autór Salmo 27 ho intensaun fokus kona-ba aspeitu importante hosi vida espirituál. Iha Eskritura laran, ita aprende kona-ba Maromak Ninia prezensa.

Iha Maromak Ninia prezensa mak ita hetan forsa no esperansa (Salmo 27:1). Iha Maromak Ninia prezensa mak ita-nia inimigu sira lakon sira-nia forsa atu ukun ita (Salmo 27:2-3)

Iha Salmo 27: 4 autór Salmo espresa ninia dezezu atu hela iha Nai nia uma laran, atu haree Maromak nia furak no atu iha ninia prezensa iha templu. Iha Testamentu Antigu, Maromak nia prezensa prinsipalmente iha templu laran. Maibé liuhusi gasta tempu ho Maromak, Salmista hetan esperansa no restaurasaun ba Ninia klamar.

Obrigadu ba Jesus, agora Maromak Ninia prezensa la limite de'it iha templu. Agora ita bele hetan Ninia prezensa liuhusi espíritu santu ne'ebé hela iha ema fiar-na'in nia laran. Agora ita bele asesu Maromak Ninia prezensa iha kualkér tempu. 

Hanesan autór Salmo dezezu atu hela iha Maromak Ninia prezensa, ita mós presiza iha dezezu atu hamutuk ho Maromak. Iha Maromak Ninia prezensa mak ita hetan esperansa, ksolok, kmanek, no restaurasaun ba ita-nia klamar ne'ebé kolen. 

Importante tebes ba ita atu gasta tempu ho Maromak loroloron. Ita bele halo ida-ne'e liuhusi lee Eskritura beibeik no refleta kona-ba buat ne'ebé ita lee ona. Ita mós bele gasta tempu atu halo orasaun hodi ko'alia ho Maromak kona-ba buat ne'ebé akontese iha ita-nia moris. Dalan seluk tan mak hatene katak nia hamutuk ho ita liuhusi ita-nia serbisu loroloron nian.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Oinsá ita prátika laran sadia iha moris?

Nee duni, hatudu laran luak, hanesan imi nia Aman mos hatudu laran luak. Lucas 6:36 BK

Lia-fuan mercy iha dalen ingles mak ita tradús laran sadi'a ka laran luak ka mezerikordia iha tetun.

Saida mak Ita sei halo bainhira hasoru ema ne'ebé halo ita-nia laran-kanek, sira ne'ebé halo ita hirus, ka halo sala boot ba ita? 

Iha Jesus nia tempu, ema farizeu sira hanorin katak ita bele fó perdua ba ema ida laliu dala tolu. Maibé Jesus nia hanorin sira hatudu katak ita tenke fó perdua ba ema seluk liutan ida ne'e. Nia hatete katak ita tenke fó perdua ba ema seluk ho laran-luak no kontinua fo perdua (Lee Lucas 17:3-5; Mateus 18:21-22).

Espresaun esterna hosi perdaun hosi ema idaidak la hanesan. Maibé perdaun ne'ebé loos tenke oferese laran-sadi'a no kompaixaun ba ema ne'ebé hakanek ita. 

La fasíl atu fó perdua. Hatudu laran-sadi'a ba ema ne'ebé hakanek ita kontra ita-nia hakarak naturál. Iha tempu sira hanesan ne'e, dala ruma, ita sente katak ne'e la justu no imposivél. Maibé fo perdua no fo kompaixaun ba ema ne'ebé la merese simu, ida ne'e mak hanaran laran sadi'a, laran luak ka mezerikordia no Ida ne'e mak Jesus halo ba ita. 

Maromak hadomi tebes mundu ne'e, tamba ne'e mak maski ita halo sala beibeik no kontinua la simu ninia prezensa, Nia haruka Ninia oan mane mesak, Jesus mai mate ba ita. Maski ita la merese hetan Ninia perdaun ka domin, maibé nia fó nafatin perdua ba ita. No agora, ema ne'ebé fiar ba Jesus bele simu laran-sadi'a ne'ebé la iha limitasaun no simu grasa ne'ebé loloos ita la merese simu. 

Ida ne'e akontese tanba Maromak livremente oferese laran-sadi'a ba ita ho laran tomak, no nia mós husu ita atu hatudu laran-sadi'a ba ita-nia maluk sira. 

Mundu sei haruka ita atu kaer metin ita-nia laran kanek no husik ida-ne'e forma ita-nia karakter. Maibé Jesus hakarak halo ita sai livre husi ita-nia laran-susar iha tempu pasadu hodi muda ita-nia laran ba ema seluk ne'ebé hakanek ita. Ida-ne'e la fasil - ida ne'e dala barak hanesan aktu submisaun ida-ne'ebé halo ita-nia laran-kanek. Maibé Jesus la espera ita atu liuhosi prosesu fo perdaun ne'ebé difisíl mesak de'it. Se ita hakarak tau fiar ba Nia no hafolin ninia hanorin, Nia hakarak ajuda ita. 

Jesus la husu ita atu halo buat ida-ne'ebé nia seidauk halo ba ita. No kuandu ita hatudu laran-sadi'a ba ema ne'ebé hakanek ita, ita hatudu oinsá Maromak nia perdaun fo ona impaktu ba ita. 

Entaun, pergunta mak ne'e, serake iha ema ida-ne'ebé ita bele oferese laran-sadi'a no perdaun ohin loron? Gasta tempu balu hamutuk ho Maromak, husu Nia atu buka-hatene Ita-nia laran, no intrega buat-aat ne'ebé hakanek ita-nia laran ba Maromak.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More