Hatene Maromak ho kle'an

Hau hakarak konhese Nia no hatene kbiit nebee halo Nia moris hias ona. Hau hakarak hola parte iha Ninia terus no sai hanesan Nia iha Ninia mate. Atu nunee, liu hosi dalan saida deit, hau bele moris hias hosi mate. Filipe 3:10-11 BK

Iha livru Filipe, Paulo fó korajen ba ema kristaun atu fokus nafatin ba Jesus no labele tau fiar ba sira-nia kbiit rasik ba sira-nia moris di'ak. Nia rekoñese katak se iha ema ruma iha razaun atu gaba an tanba hahalok-di'ak- ne'e mak nia (Paulo). 

Paulo mak ema judeu ne'ebé apaixonadu, no halo tuir Maromak nia ukun-fuan hotu, no halo buat hotu ne'ebé loos. Ulun-nain judeu sira hatudu respeitu ba nia antes nia sai ema kristaun, no tuir ukun-fuan judeu nian, Paulo la iha sala. Maibé apóstolu Paulo hatete katak buat hotu ne'ebé nia hetan iha tempu ne'ebá la iha komparasaun ho koñesimentu kona-ba Jesus. 

"Nee duni, hau sura buat hotu nudar folin laek tanba folin boot liu mak atu konhese hau nia Nai Kristu Jesus. Tanba Nia mak hau lakon buat hotu no sura buat hotu nudar lixu deit, atu nunee hau bele manaan Kristu" Filipe 3:8 BK

Kuandu Paulo deside tuir Kristu, nia lakon ninia relasaun ho autoridade judeu sira. Ema sira ne'ebé uluk fó suporta ba nia, sira komesa fo-terus ba nia. Sira haruka ema-lubun husi sidade ba sidade atu koko no hapara Paulo atu haklaken. Sira baku nia, baku nia ho sikote, ko'alia lia-bosok ba nia, no goza nia. Iha fatin ne'ebé de'it Paulo ba, nia hasoru blokeia no rezistensia oioin. 

Maibé Paulo la haree ninia terus nu'udar problema, maibé hanesan oportunidade. 

Terus ba Jesus mak oportunidade ida atu hakbesik liutan ba Jesus. Kuandu apóstolu Paulo hetan terus, nia hanoin Jesus Ninia terus iha kruz tamba de'it atu ajuda ita ema sala na'in. 

Kuandu ita hatene kle'an kona-ba Kristu, ita komesa hatene katak ita-nia hahalok-di'ak la to'o atu hetan Ninia domin ka bénsaun. Dalan ida de'it ne'ebé ita bele halo atu bele sai loos iha Maromak nia oin mak fiar ba Ninia Oan-Mane Jesus. No evidénsia kona-ba ita-nia fiar mak ita-nia hakarak atu la'o tuir Nia ... no mós terus hamutuk ho nia. 

Entaun... serake ita hakarak hatene Jesus hanesan Paulo? Se nune'e, hahalok-aat saida mak ita prontu atu rende? Serake ita hakarak haree dezafiu sira ne'ebé ita hasoru nu'udar oportunidade atu hetan terus hamutuk ho Kristu no hatene didi'ak Jesus? 

Ita bele komprende liután kona-ba Jesus nia domin ne'ebé kle'an tebes ba ita kuandu ita hadomi, fó perdua, serbí no ajuda ema seluk- ho kustu ka konsekuensia saida de'it 

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Maromak Ninia prezensa ho ita

Depois Nai hatete, “Hau nia prezensa sei hamutuk ho o, no Hau sei foo deskansa ba o.” Exodu 33:14 BK

Ita sente sempre ta'uk atu hahú buat foun ruma se ita la hatene oinsá mak ida-ne'e bele akontese, maski ne'e relasaun foun, serbisu, projetu ka viajen ba fatin foun. Ita nunka hatene dezafiu saida de'it mak ita sei hasoru iha dalan. 

Bainhira Maromak hasoru povu Izrael iha Foho Sinai, Nia fó ba sira identidade foun ida (povu ne'ebé Maromak nian), valór foun (ukunfuan Sanulu), no destinasaun foun ida (Rai ne'ebé Maromak promete ona). Sira la hatene atu ba ne'ebé ka to'o bainhira. No Maromak lori sira ba rai-fuik, maibé nia mós fó promesa ba povu rai-fuik maran ne'e katak Nia sei hamutuk ho sira no fó deskansa ba sira. 

Sira iha pergunta barak kona-ba buat hotu! Serake sira bele hetan ai-han no bee? Serake sira sei hasoru inimigu sira iha sira-nia viajen? Oinsá mak sira bele moris? 

Kuandu ita hasoru situasaun foun iha fatin foun, ita la bele antisipa kona-ba buat hotu ne'ebé ita presiza, maibé ita bele hetan benefísiu husi promesa ne'ebé Maromak promete ona ba ema Izrael: "Hau nia prezensa sei hamutuk ho o, no Hau sei foo deskansa ba o" Exodu 33:14 BK

Maski buat saida de'it mak akontese ba ita iha fatin ne'ebé de'it ita ba, Nia sei loke dalan atu ita bele deskansa. 

Ita bele fiar katak Maromak sei lori ita ba futuru hodi deskansa. Hanesan Maromak fó "Manna" ba ema Izrael atu han kuandu sira presiza ai-han, nia mós sei fó ba ita saida mak ita presiza. Nia sempre hamutuk ho ita.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Maromak nu'udar Ita-nia Kriador

Horiuluk kedas Maromak kria lalehan no rai. Jénesis 1:1 TMF

Serake ita pernah pauza atu refleta kona-ba Maromak nu'udar Ita-nia Kriador? 

Maromak la hanesan ho buat seluk ne'ebé ita hatene iha pasadu, agora ka buat sira ne'ebé sei mai. Nia mesak de'it mak bele sustenta buat ne'ebé nia kria ona. No nia mesak de'it mak bele kria, hodi ko'alia de'it no buat hotu ezisti. 

Liafuan "Jenesis" katak "hahu", no ne'e mak lifuan ne'ebé ita lee kona-ba Maromak nia kriasaun iha inisiu. Se ita ke'e kle'an liután iha Eskritura nia pájina sira, ita bele aprende kona-ba podér ida ne'ebé mak Maromak uza hodi kria. 

Purezemplu João 1: 1-3: "Hahuu fo-foun, Liafuan iha nanis ona. No Liafuan nee hamutuk ho Maromak. No Liafuan nee mak Maromak. Nia hamutuk ho Maromak hori uluk kedas. Maromak halo buat hotu-hotu liu hosi Nia. Maromak la halo buat ida ketak hosi Nia"

Ka Koloso 1:16: "Tanba Maromak kria buat hotu liu hosi Nia, buat nebee iha lalehan no iha mundu, buat nebee ita bele haree no la bele haree, inklui kadunan sira, ukun sira, nai ulun sira no podér sira. Maromak kria buat hotu liu hosi Nia no tanba Nia"

Autór libru Ebreu asegura ba ita katak "Liu hosi fiar mak ita kompriende katak Maromak nia liafuan kria buat hotu, atu nunee Nia halo buat nebee ita haree hosi buat nebee ita la haree" Ebreu 11:3 BK

"Liafuan" ne'e mak Jesus Kristu, no liuhusi Nia mak Maromak halo buat hotu mosu. Maromak nia promesa hotu kona-ba redensaun ka salvasaun sei kumpri liuhosi "lia-fuan" ne'ebé hanesan - Jesus Kristu. 

Refleta to'ok lia-loos ne'e iha momentu balu: podér ne'ebé "ko'alia" de'it no uiverso no buat hotu mosu mak podér ne'ebé hanesan atu salva buat hotu ne'ebé Maromak promete ona. 

Ohin loron, uza tempu balu atu hanoin didi'ak kona-ba Maromak nia knaar nu'udar Kriador, no permiti ida ne'e fo esperansa boot ba ita. Tanba Nia la'ós de'it kriador baibain, Nia mak ita-nia Kriador, no Nia kaer metin universu no kaer metin ita-nia moris iha Ninia liman.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More