Ita livre ona!

Maun-alin sira, Maromak bolu ona imi ba liberdade. Keta uza liberdade nee atu halo tuir imi nia isin nia hakarak, maibee serví malu liu hosi domin. Galásia 5:13 BK

Serake Ita-boot debe ema-nia osan ka hatene ema ruma ne'ebé debe osan? Ita hatene ninia impaktu ba ema ne'e. Bainhira ita iha debe, ita-nia osan, tempu, ka rekursu sira la'ós ita-nian - tamba ema osan na'in kontinua foti husi Ita-boot, no dala barak foti mós ho ninia funan.

La iha ema ida mak hakarak sai atan ba ema ne'ebé fó-empresta, maibé ita hotu iha debe ida ne'ebé ita labele selu. 

Liafuan gregu antigu ne'ebé tradús nu'udar "pekadu" signifika "lakon marka". Uluk ema uza ida ne'e atu deskreve rama oan ne'ebé la kona alvu sentru ka la kona tarjetu. Iha kompetisaun hana, ema la prekupa se rama oan besik tarjetu ka dook husi sentru. Se ó la kona alvu ka tarjetu iha sentru, ó lakon. 

Iha Eskritura, "Marka/tarjetu" mak sasukat ne'ebé Maromak hakarak ita atu halo tuir- maibé ita hotu lakon marka ka tarjetu ne'e. Ita lakon marka ne'e bainhira ita hili hanoin an de'it duke haraik-an, ita hili hirus duke hatudu laran maus. Ita lakon marka ne'e bainhira ita ko'alia lia-bosok, na'ok, halo protesta, no gossip. Ita lakon marka ne'e bainhira ita hakanek ema seluk duke obedese ba Maromak no hatudu laran-di'ak ba malu. Pekadu hanetik ita atu sai ema ne'ebé tuir Maromak hakarak.

Maibé liafuan di'ak mak ne'e: Jesus salva ita ida-idak liuhosi hasa'e nia an nu'udar sakrifísiu ba ita-nia sala sira. Ita la bele selu fali ita-nia tusan mesmuke ita moris iha tinan miliaun ba miliaun, maibé nia halo ita livre husi sala sira ne'e iha momentu ida deit. 

No tanba nia selu ita-nia debe ne'e, Nia hakarak ita atu moris nu'udar ema ne'ebé livre.

Kuandu ita buka buat saida de'it ne'ebé haketak ita husi Maromak nia Espiritu, liuhosi halo desizaun ne'ebé legalistik ka la halo tuir ukunfuan sira, ita halo ita nia an hanesan Jesus la halo ita livre. Maibé kuandu ita hili atu hadomi ema seluk hanesan Jesus hadomi ita, ida-ne'e hatudu katak ita hafolin Jesus nia sakrifísiu no hakarak atu simu liberdade ne'ebé Nia sosa ba ita. 

Entaun, oinsá mak ita bele moris livre? 

Ita simu katak buat ne'ebé Jesus halo sufisiente ona ba ita, no depois ne'e ita komete atu hadomi Nia. Bainhira ita-nia domin ba Maromak krese boot liután, Ninia Espiritu ajuda ita atu hadomi ema seluk ho laran tomak. Kuandu ita hadomi liután, ita bele simu ita-nia liberdade liután, no tanba Maromak nia domin, la iha buat ida mak bele foti ita-nia liberdade.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Forsa iha tempu hotu

Hau bele halo buat hotu iha Nia nebee foo kbiit mai hau. Filipe 4:13 BK

Filipe 4:13 ne'e versikulu ne'ebé famozu, ne'ebé dala barak ita haree ona ema tau iha media sosiál, sticker, ka iha kareta. Karik Ita rona ona ema ruma sita versikulu ida ne'e molok hala'o eventu desportivu ka koko atu alkansa knaar difisíl ruma. 

Versikulu ida ne'e bele mós aplika ba situasaun sira temi iha leten, maibé Infelizmente, dala barak ema komprende sala versikulu ne'e. Versíkulu ne'e la dehan katak ita bele halo buat hotu ne'ebé ita hakarak. Paulo la ko'alia kona-ba manán jogu desportu ka iha aten-barani atu halo buat ruma. 

Maibé, Paulo ko'alia kona-ba ninia tempu iha komarka. Nia ko'alia kona-ba Maromak nia kbiit ne'ebé hamutuk ho nia durante tempu susar ne'e. 

Iha Filipe 4:12 nia ko'alia kona-ba kbiit ne'ebé nia iha atu moris kontente iha situasaun hotu-hotu iha ninia moris. Nia aprende oinsá atu moris ho sasan barak no la iha buat ida. Nia aprende atu moris ho hahán no rekursu uitoan de'it, no mós ho hahán no rekursu barak. 

Paulo haree katak maski nia iha situasaun saida de'it, Maromak kontinua fó kbiit ba nia atu halo Maromak Ninia serbisu. Maski nia iha komarka laran, maibé nia nunka falta forsa no rekursu atu fó-hatene ema seluk kona-ba Jesus nia liafuan di'ak. Mesmuke nia ema sulan hela iha komarka laran.

Paulo bele moris iha situasaun hotu iha ninia moris no alkansa buat hotu ne'ebé Maromak husu nia atu halo liuhusi kbiit ne'ebé Maromak fó ba nia. 

Tan ne'e, duke Maromak fó forsa mai ita atu halo buat saida de'it ne'ebé ita hakarak, Maromak fó forsa mai ita atu tahan hasoru situasaun oioin no alkansa misaun ne'ebé Nia fó mai ita. Ida-ne'e signifika katak ita sei nunka falta rekursu ida atu moris no krese tuir Maromak Nia hakarak, ka atu fahe liafuan di'ak kona-ba Jesus ba ema seluk. 

Se ita iha sasan barak ka la iha buat barak, hanoin-ba katak Maromak mak fó forsa ba ita atu tahan iha tempu hotu. Se ita hasoru situasaun difisíl ruma, husu Maromak atu fó forsa, ne'ebé so Nia de'it mak bele fó.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Xamada urjente

No Nia dehan ba Ninia eskolante sira, “Loos duni, toos nee boot, maibee ema hodi servisu mak uitoan deit. Nunee halo orasaun ba Toos Nain hodi Nia bele haruka ema hodi servisu iha Ninia toos.” Mateus 9:37-38 BK

Serake, Ita fahe ona Jesus nia liafuan di'ak ka evanjelu ba ema seluk iha Ita-nia moris? 

Kuandu Jesus hanorin no fó treinu ba dixipulu nain sanulu resin rua, nia dala barak uza imajen no ai-knanoik sira ne'ebé iha sira-nia kultura uza atu komunika lia-loos importante ba ema. Iha Mateus 9:37-38, Jesus konta kona-ba serbisu ne'ebé nia halo daudauk hanesan toos-nain ida-ne'ebé serbisu iha toos.

Jesus hatete katak ema ne'ebé la hatene Jesus mak hanesan toos trigu nian ne'ebé prontu atu koá. Maibé, la iha serbisu-nain natoon atu ba koá iha toos sira ne'e. Jesus hatete atu halo orasaun atu Maromak haruka serbisu-nain barak liután atu halibur no ko'a.

Tuir loloos, iha ema balu ne'ebé prontu no prontu atu rona no hatán ba mensajen husi Evanjellu, ne'ebé Jesus lori atu fo esperansa ba ema hotu. Maibé kuandu Jesus dehan "serbisu-nain uitoan de'it" (Mateus 9:38), ne'e signifika ema la to'o atu haklaken lia-fuan di'ak ba ema seluk. 

Nu'udar ema kristaun, ita hetan moris rohan-laek hanesan prezente gratuita no ita hetan xamada atu fahe mensajen moris rohan-laek ne'e ba ema seluk. Maibé, ema kristaun barak mak rai prezente ne'e ba sira-nia an de'it. 

Ita tenke iha aten-barani atu fahe mensajen husi krús ba ema seluk atu nune'e sira mós bele hetan moris foun iha Jesus. 

Ohin loron, hanoin to'ok kona-ba pasu ki'ik saida mak ita bele halo atu hahú fahe Jesus ba ema seluk. Husu ba ita-nia viziñu, kolega servisu, ka kolega sira saida mak sira-nia background espirituál atu nune'e ita bele komesa ko'alia kona-ba Maromak. Halo orasaun ba Maromak atu fó aten-barani ba ita, depois hakat Slsai ba no hahú fahe evanjelu ba ema seluk.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More