Tanbasá mak ita hadook an husi Maromak nia laran-sadi'a?

Oh Jerusalém, Jerusalém, sidade nebee oho profeta sira, no tuda mate ho fatuk ema sira nebee Maromak haruka ba o! Dala hira ona mak Hau hakarak halibur hamutuk o nia oan sira hanesan manu inan halibur ninia oan sira iha ninia liras okos. Maibee o lakohi! Mateus 23:37 BK

Bainhira Jesus hateke ba Jeruzalein, nia laran-susar. Nia hakarak tebes atu halibur ninia povu hanesan manu inan halibur ninia oan sira, ne'ebé fraku, la iha kbiit, desperadu no presiza kuida. Maibé sira lakohi Nia tau matan ba sira. 

Ne'e mak buat ne'ebé triste tebes: ema ne'ebé presiza laran-sadi'a lakohi simu ida-ne'e. Iha tempu pasadu, Maromak haruka profeta sira atu dirije Ninia povu, no sira oho tiha. Iha semana santula nia rohan, sira mós sei oho tan Jesus, profeta ikus no fonte ba sira-nia salvasaun rasik.

Tanbasá mak ita hasees an husi Maromak nia laran-sadi'a? Dala barak, tanba ita luta atu fiar katak laran sadi'a ne'e ba ita. Iha mundu ne'e, laran-sadi'a sente estrañu. Maibé Jesus Ninia hanoin la funsiona hanesan mundu nia hanoin. 

Iha versíkulu ne'e ita haree katak oferese laran-sadi'a mak ninia hakarak ne'ebé kle'an liu. Kruz hatudu mai ita oinsá Jesus esforsu atu ita bele hetan buat ne'ebé ita la merese atu hetan - Ninia domin, grasa, no perdua no la hetan buat ne'ebé ita merese hetan - mak mate.

Jesus hakarak tebes atu halibur ita hodi tau matan ba ita. Ninia laran-sadi'a la iha komparasaun. Nia la hakiduk no dúvida, maibé hakarak tebes atu halibur ita iha ninia liras okos.

Mai ita fiar katak laran-sadi'a ne'e real (loos duni) ba ita. Mai ita simu ida-ne'e ho laran ne'ebé agradese ba Jesus ne'ebé mate ona hodi oferese laran sadi'a ba ita.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Liurai dame nian

“Hatete ba Zion nia oan feto, ‘Tebes, o nia Liurai mai ba o, ho laran maus, no Nia sae kuda buru ida, no kuda buru oan ida nebee halo servisu baibain deit" Mateus 21:5 BK

Maizumenus tinan atus ba atus antes Jesus moris, profeta Zacarias ko'alia ba ema Izrael ne'ebé lakon funu ona katak liurai ida sei mai la ho kbiit ka forsa, maibé ho haraik-an no sa'e kuda-burru ida. Liurai ne'e sei hametin dame, la'ós liuhusi forsa, maibé liuhusi Espiritu. 

Kuandu ema-lubun simu Jesus bainhira Nia tama ba Jeruzalein, sira fiar katak Nia mak liurai ne'ebé, sira hein ne'ebé sei duni sai governu Romanu no restaura Izrael nia ukun rasik an. Maibé Jesus la kumpre sira-nia espetativa. Duke foti surik hodi halo funu, nia rende an ho dame. Nia tahan hasoru hahalok-aat, hahalok injustisa, no mate Iha kruz ho haraik-an no domin. 

Jesus la'ós de'it liurai; Nia mak Liurai ne'ebé halo dame entre Maromak no ema, no liuhusi Nia iha dame entre povu. Ninia ukun la'ós kona-ba hatudu podér no halo vingansa, maibé kona-ba rekonsiliasaun no grasa. 

Jesus nia ukun ne'ebé laran-maus dezafia ita atu hadomi mós ita-nia inimigu sira, hanesan Nia hadomi ona ita.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Ita livre ona!

Maun-alin sira, Maromak bolu ona imi ba liberdade. Keta uza liberdade nee atu halo tuir imi nia isin nia hakarak, maibee serví malu liu hosi domin. Galásia 5:13 BK

Serake Ita-boot debe ema-nia osan ka hatene ema ruma ne'ebé debe osan? Ita hatene ninia impaktu ba ema ne'e. Bainhira ita iha debe, ita-nia osan, tempu, ka rekursu sira la'ós ita-nian - tamba ema osan na'in kontinua foti husi Ita-boot, no dala barak foti mós ho ninia funan.

La iha ema ida mak hakarak sai atan ba ema ne'ebé fó-empresta, maibé ita hotu iha debe ida ne'ebé ita labele selu. 

Liafuan gregu antigu ne'ebé tradús nu'udar "pekadu" signifika "lakon marka". Uluk ema uza ida ne'e atu deskreve rama oan ne'ebé la kona alvu sentru ka la kona tarjetu. Iha kompetisaun hana, ema la prekupa se rama oan besik tarjetu ka dook husi sentru. Se ó la kona alvu ka tarjetu iha sentru, ó lakon. 

Iha Eskritura, "Marka/tarjetu" mak sasukat ne'ebé Maromak hakarak ita atu halo tuir- maibé ita hotu lakon marka ka tarjetu ne'e. Ita lakon marka ne'e bainhira ita hili hanoin an de'it duke haraik-an, ita hili hirus duke hatudu laran maus. Ita lakon marka ne'e bainhira ita ko'alia lia-bosok, na'ok, halo protesta, no gossip. Ita lakon marka ne'e bainhira ita hakanek ema seluk duke obedese ba Maromak no hatudu laran-di'ak ba malu. Pekadu hanetik ita atu sai ema ne'ebé tuir Maromak hakarak.

Maibé liafuan di'ak mak ne'e: Jesus salva ita ida-idak liuhosi hasa'e nia an nu'udar sakrifísiu ba ita-nia sala sira. Ita la bele selu fali ita-nia tusan mesmuke ita moris iha tinan miliaun ba miliaun, maibé nia halo ita livre husi sala sira ne'e iha momentu ida deit. 

No tanba nia selu ita-nia debe ne'e, Nia hakarak ita atu moris nu'udar ema ne'ebé livre.

Kuandu ita buka buat saida de'it ne'ebé haketak ita husi Maromak nia Espiritu, liuhosi halo desizaun ne'ebé legalistik ka la halo tuir ukunfuan sira, ita halo ita nia an hanesan Jesus la halo ita livre. Maibé kuandu ita hili atu hadomi ema seluk hanesan Jesus hadomi ita, ida-ne'e hatudu katak ita hafolin Jesus nia sakrifísiu no hakarak atu simu liberdade ne'ebé Nia sosa ba ita. 

Entaun, oinsá mak ita bele moris livre? 

Ita simu katak buat ne'ebé Jesus halo sufisiente ona ba ita, no depois ne'e ita komete atu hadomi Nia. Bainhira ita-nia domin ba Maromak krese boot liután, Ninia Espiritu ajuda ita atu hadomi ema seluk ho laran tomak. Kuandu ita hadomi liután, ita bele simu ita-nia liberdade liután, no tanba Maromak nia domin, la iha buat ida mak bele foti ita-nia liberdade.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More