Oho de'it imi-nia parte ne'ebé mai hosi mundu: sala seksuál, hahalok la moos, hakarak ne'ebé la loos, kaan buat aat, no kaan sasaan, mak hanesan adora ídulu. Tanba buat sira ne'e hotu mak halo Maromak Nia laran nakali sei mai. Kolose 3:5-6
Bíblia bolu ema kristaun atu hakotu sira-nia hahalok tuan nu'udar ema sala-na'in. Apóstolu Paulo hatete katak ita tenke "hamate" buat hotu ne'ebé partensi ba buat mundu nian (Koloso 3:5). Ida-ne'e katak ita tenke hasees an husi hakarak no toman sala-na'in ne'ebé haketak ita husi Maromak.
Tanbasá mak ida-ne'e importante? Tanba pekadu rezulta ba Maromak Nia julgamentu. Bíblia hatete katak Maromak Nia hirus sei mosu hasoru ema hotu ne'ebé hahalok-aat (Roma 1: 18). Kuandu ema kontinua halo sala, Maromak husik sira halo tuir sira-nia hakarak sala nian, ne'ebé halo sira sai aat liután (Roma 1:24, 26-27). Ida-ne'e hatudu oinsa Maromak haree sala hanesan buat ne'ebé seriu iha Ninia oin.
Maibé Maromak bolu ema fiar-na'in sira atu labele hela nafatin iha hahalok sala. Bíblia hanorin katak kuandu ita simu Kristu, ita-nia hahalok tuan pekador nian krusifika ona hamutuk ho Kristu atu nune'e ita labele sai tan atan ba sala (Roma 6: 1-7). Ita hetan ona moris foun, no Maromak bolu ita atu moris diferente ho ema mundu nian.
Tanba moris foun ne'e, ita tenke tau ita-nia laran ba buat sira iha leten, la'ós ba buat sira iha mundu (Koloso 3: 1). Ita labele fokus ba ksolok temporariu sira, maibé kona-ba buat ne'ebé rohan-laek nian, buat lalehan nian.
Bíblia mós fó-hanoin ita katak loron julgamentu nian sei to'o mai (2 Kor 5:10). Ema ne'ebé la simu Maromak Nia hanorin sei koko atu subar an husi Ninia prezensa, maibé sira sei labele halai ses husi Ninia hirus (Apokalipse 6: 16-17). Maromak Nia liafuan ne'e bolu ita atu hasees an husi sala ne'ebé ita halo agora. Agora kedas, la aban, la semana oin, la fulan oin ka tinan oin. Agora kedas!
La fasil atu hapara hahalok mundu nian, maibé ida ne'e nesesariu. Liuhusi Maromak Nia ajuda, ita bele husik hahalok sala-na'in no moris hodi halo Maromak kontente. Bainhira ita hili moris santu no hateke ba lalehan, ita kontinua krexe iha fé no la'o ho laran-metin iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment