Tanba maski ema la haree ho matan buat ne'ebé Maromak nian, katak Ninia kbiit rohan laek no Ninia karakter nu'udar Maromak, sira sei bele hatene mo-moos. Tanba dezde Nia kria mundu, ema bele kompriende buat sira nee liu hosi buat ne'ebé Nia halo ona. Nune'e ema la iha razaun atu la fiar. Roma 1:20 BK
Ema barak husu pergunta hanesan ne'e: Se ema portugés, ema Arab, ema indianu ka Xina nunka mai iha ita-nia rai, ita-nia bei'ala sira sei fiar nafatin ba Maromak ka lae?
Bíblia hanorin katak husi tempu uluk kedas Maromak kria ema atu hatene Nia. Bainhira Maromak kria mundu, Adão no Eva iha relasaun ne'ebé besik ho Maromak. Maibé kuandu sala tama ona iha mundu, relasaun ne'e aat ona. Maski nune'e, Maromak nunka para atu buka ema sala na'in hotu.
Bíblia hatete katak natureza rasik hatudu katak Maromak ezisti. Kuandu ema hateke ba lalehan, haree ba loro-matan, foho no tasi, sira bele hatene katak iha Kriador ne'ebé poderozu. Tan ne'e mak kuaze iha kultura hotu iha mundu iha fiar ba kbiit boot ida.
Maibé hatene katak Maromak ezisti de'it la sufisiente. Karik ema sente katak iha Kriador ida, maibé karik sira la hatene Ninia karakter ka Ninia planu ba oinsa ema bele hetan salvasaun. Tan ne'e, Maromak haruka Ninia ema sira atu fahe lia-fuan di'ak ka evanjellu. Iha Evanjellu Mateus 28:19, Jesus haruka Ninia dixipulu sira atu ba haklaken evanjellu ba nasaun hotu.
Tuir hanorin Biblia sagrada nian ita komprende katak Maromak dirije istória mundu nian atu nune'e mensajen salvasaun ne'e bele to'o ba nasaun hotu molok Jesus mai ba dala rua.
Tan ne'e, pergunta importante liu mak la'ós se mak lori uluk Evanjellu ba ita-nia rai. Pergunta ne'ebé loos mak: Oinsa mak ita hatán ka responde ba Maromak Nia mensajen ohin loron?
Maromak sei nafatin buka ema iha fatin hotu. Nia konvida ita ida-idak atu hatene Nia liuhusi Jesus Kristu no la'o ho laran-metin iha Ninia lia-loos.
Ha'u espera katak devosaun ne'e sei enkoraje ita atu nafatin fiél bainhira ita kontinua la'o iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment