Oinsá atu serbi hanesan Jesus

Entaun se Hau, nebee imi nia Nai no Mestri, fasi ona imi nia ain, nunee imi mos tenki halo ida nee ba malu, atu fasi imi nia maluk nia ain. João 13:14 BK

Bainhira ita haree imajen ulun-nain ida, serake ita haree ita-nia an rasik? 

Ita hotu iha área influénsia nian, ne'e signifika katak ita ida-idak iha kbiit atu lidera. No se ita la'o tuir Jesus, ita hetan konvite atu halo tuir ezemplu lideransa nian ne'ebé Nia fó sai ba ita, iha fatin ne'ebé de'it ita hela, iha buat saida de'it ne'ebé ita halo. 

Bainhira Jesus fase ninia dixipulu sira-nia ain, Nia hatudu katak sira presiza hamoos sira-nia espirituál ka sira-nia relasaun ho Maromak, maibé Nia mós hatudu ba sira saida mak Ninia standard ba lideraransa. Atu lidera hanesan Na'i Jesus, Ninia dixipulu sira presiza haraik-an hanesan Jesus no halo sakrifisiu atu serbí ema seluk.

"Tanba Ema Nia Oan mos la mai hodi ema bele serví Nia, maibee Nia mai hodi Nia bele serví ema, no foo Ninia moris hodi hola fali ema barak" Marcos 10:45 BK

Iha apóstolu sira-nia tempu, serbisu fase ain ne'e, knaar atan sira nian. Nune'e saida mak Jesus halo ne'e hanesan buat radikál ida no Nia haruka ninia dixipulu sira atu halo buat ne'ebé hanesan. Ida-ne'e sei tau dixipulu ida-idak iha pozisaun nu'udar atan. 

Maibé atu sai boot iha Jesus Nia oin, ita tenke serbí ema seluk ho sakrifísiu. No atu ita bele sakrifika an hodi serbí ema seluk, ita tenke haree ema seluk di'ak liu fali ita-nia an.

Ida-ne'e la signifika katak ita hatún an ka hanoin ita-nia an menus iha ema seluk nia leet. Ida-ne'e signifika katak ita la haree ita-nia an nu'udar ema ne'ebé boot liu ka kiik Liu fali ema seluk. Maibé ita haree ita-nia an hanesan Jesus haree ita: nu'udar ema ne'ebé merese hetan serbí no merese atu serbí ema seluk mós. 

Tanba Jesus nia domin mak nia serbí Ninia dixipulu sira, no tanba nia hadomi ita mak Nia leba krús ho hakarak rasik iha foho Kalvariu. Jesus hatudu ba ita katak se ita hakarak sai lider, ita presiza serbí ema seluk ho haraik-an. 

No se ita hakarak atu lidera hanesan Jesus, ita presiza sai hanesan Nia. 

Tan ne'e, agora husu ba Jesus atu hatudu oinsá ita haree ita-nia an no oinsá ita haree ema seluk ne'ebé Maromak tau iha ita-nia moris. Tuirmai, husik Maromak hatudu ba ita oinsá mak ita bele serbí ema seluk ho domin. 

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Maromak sei halo buat foun

Lalika hanoin buat uluk sira nee, no lalika hanoin buat nebee iha tempu antigu. Tebes, Hau sei halo buat foun; agora buat nee mosu mai, imi sei la hatene ka? Hau sei halo dalan iha rai fuik, no mota sira iha rai maran. Isaias 43:18-19 BK

Iha ita-nia moris, fasil ba ita atu hanoin no rai kona-ba sala sira ne'ebé ita halo iha tempu uluk, oportunidade sira ne'ebé ita lakon, laran kanek sira ne'ebé akontese iha pasadu, etc. Isaias 43:18-19 fó-hanoin ba ita atu haluha buat ne'ebé akontese iha pasadu. Maromak konvida ita atu hein ho esperansa no espetativa ba futuru. Nia hatete: "Hanoin to'ok kona-ba buat uluk nian, la'ós tanba buat sira-ne'e la problema, maibé tanba buat sira-ne'e la define saida mak Maromak sei halo ba ita.

Maromak ko'alia liafuan sira-ne'e ba ema Izrael iha tempu dadur no susar oioin. Maski nune'e, Maromak hatete katak buat foun sei mai daudaun, ne'e mak buat ida-ne'ebé ita la espera. Dalan ida iha rai-fuik, mota iha iha rai-fuik maran, ne'e mak imajen kona-ba transformasaun no restaurasaun ne'ebé Maromak sei halo ba ema fiar nain sira. Maski iha fatin ne'ebé aat liu iha ita-nia moris, Maromak promete katak nia sei kria dalan, fo solusaun no fo moris.

Versikulu ida dezafia ita atu fiar katak Maromak sempre serbisu iha ita-nia moris, maski ita seidauk haree evidénsia sira. Versikulu ne'e husu ita atu husik tiha buat ne'ebé iha kotuk atu nune'e ita bele kaer metin buat ne'ebé sei akontese iha futuru. Buat foun ne'ebé Maromak halo sei di'ak liu, karik ita hakarak tau fiar tomak ba Maromak. Tamba ba Maromak la iha buat ida mak imposivél, Maromak nia serbisu sempre di'ak. 

Ohin loron, halo to'ok reflesaun no husu ba ita-nia an: buat saida iha pasadu mak ita kaer metin hela to'o agora no Maromak husu atu husik? No iha ne'ebé mak Maromak bele halo buat foun iha ita-nia moris, agora?

Orasaun: 

Nai, ajuda ha'u atu husik buat ne'ebé iha kotuk no loke ha'u-nia laran ba buat foun ne'ebé Ita halo daudaun. Fó matan mai ha'u atu haree Ita-nia obra sira no fiar ba ita boot. Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Saudades atu fila ba uma

Nunee mak Nai sei sai Liurai ba mundu tomak. Iha loron nebaa, Nai sei ida deit no Nia naran sei ida deit. Zakarias 14:9 BK 

Iha tempu ne'ebá, ema Izrael sira sai dadur iha Babilonia. Bainhira sira dadur hela, iha tinan 70 nia rohan, profeta Zacarias hakerek livru istória, mehi, no vizaun sira kona-ba nasaun Izrael ne'ebé iha terus laran, hodi dezafia sira atu fiél nafatin ba sira-nia aliansa ho Maromak no atu fó esperansa ba Maromak nia Ukun iha futuru. 

Saudades atu fila ba hela iha ita-nia rai moris fatin mak hanesan buat ne'ebé ita hakarak tebes bainhira ita hela iha ema-nia rain. Uma la'ós de'it fatin fíziku de'it, maibé ida-ne'e mak halo ema sente komfortu, iha familiaridade, no sentimentu partensi ba. 

Zecarias 14: 9 mak resposta ba sira-nia saudades ne'e: "Nunee mak Nai sei sai Liurai ba mundu tomak. Iha loron nebaa, Nai sei ida deit no Nia naran sei ida deit" Zakarias 14:9 BK 

Maizumenus iha tinan 70 nia rohan, profeta Zacarias hakerek karta ba nasaun ida-ne'ebé nakonu ho susar atu fó-hanoin sira kona-ba Maromak nia laran-di'ak, atu sira fiél nafatin ba Maromak, no atu fó esperansa ba Maromak nia Ukun ne'ebé sei mai. 

Hanoin to'ok kona-ba nasaun ida-ne'ebé sai husi sira-nia rai ba tinan 70 nia laran, hasoru dúvida no inserteza kona-ba sira-nia futuru. Profeta Zakaria Ninia lia-fuan la'os de'it istória, maibé kona-ba destinu sira-nia moris ba oin, buat ne'ebé nia hatete ne'e fó-hanoin ba sira ne'ebé sai dadur hela katak sira-nia viajen sei to'o ninia rohan. Liafuan sira-ne'e hatudu Maromak nia restaurasaun, imajen ba Maromak Ninia ukun iha futuru. 

Ohin loron, karik ita sente dook husi Maromak Nia hakarak ka dook hosi Maromak Ninia promesa ba ita-nia moris. Karik ita saudades atu hetan komfortu, profeta Zacarias nia korajen sei vale, to'o ohin loron iha ita-nia tempu. Maromak Nia laran-di'ak no laran-metin nunka para, no Maromak promete ona ba ninia ema sira ne'ebé fiar ba Nia katak loron ida Nia sei lori sira ba lalehan iha ne'ebé Maromak mak ukun (Apokalipse 21). 

Ita bele tau fiar ba Maromak nia Ukun iha futuru. Ita-nia uma la dook, besik ona!

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More