Objetivu hosi Jesus Ninia moris

Nia sei tuur ahi oan mane ida, no o sei hanaran Nia Jesus, tanba Nia sei salva Ninia povu hosi sira nia sala. Mateus 1:21 BK

Imajina, bainhira Maria no Jose sei finaliza sira-nia lista konvidadu sira no hili dosi kazamentu nian, Maria halo Jose hakfodak ho novidades katak - nia ne'ebé virjen, isin-rua ona.

Jose hanoin katak Maria la fiél ba nia, tan ne'e Jose hakarak kansela prenda ne'e. Maibé bainhira nia hanoin hela estratejia oinsá atu kansela prenda ne'e, Nai Nia anju ida mosu ba nia iha mehi ida - hodi dehan ba Jose labele ta'uk atu hola Maria nu'udar ninia feen, tanba bebé ne'e mai husi Espiritu Santu. 

"Nia sei tuur ahi oan mane ida, no o sei hanaran Nia Jesus, tanba Nia sei salva Ninia povu hosi sira nia sala" Mateus 1:21 BK

Milagre ne'e hanesan kumprimentu ba profesia atus ba atus kona-ba Mesias, Salvador, ka "Ida ne'ebé Maromak hili ona", ne'ebé hakerek iha Testamentu Antigu. Bainhira Jesus sei iha Maria ninia kanotak, Jesus Ninia ojetivu fo sai ona: atu salva Ninia povu husi sira-nia sala. Tanba antes Maromak kria mundu, ninia planu mak atu salva mundu ne'e. 

Buat ne'ebé interesante mak ne'e, ita la hili tempu, fatin, Isin, ka familia ne'ebé Ita moris ba! Loos ka lae? Maibé Maromak halo ita ezisti iha ne'e agora, ho ojetivu rasik. 

Ita-nia ezistensia hakerek ona iha Maromak Ninia istória ida-ne'ebé hakerek daudauk husi tempu hahu kedas. No Jesus Ninia sakrifísiu atu fo salvasaun husi ita-nia sala no selu debe ka tusan ne'ebé ita nunka bele selu, ne'e estende ona mai ita.

Saida mak pekadu? Pekadu mak la halo tuir Maromak Ninia ukunfuan sira (1João 3:4). Pekadu mak hili ita-nia dalan rasik duke Maromak nia dalan. Pekadu mak kontra hasoru Maromak Ninia planu sira. No ita hotu halo ona ida-ne'e - ita hotu la tuir Maromak nia standard ne'ebé loos. Maibé, tan ne'e mak Maromak haruka Jesus mai, tanba Nia hadomi tebes ita. 

Hanesan soldadu ida-ne'ebé sakrifika ninia moris ba ninia família, belun, ka nasaun, Jesus fó ninia moris tanba mundu ne'e. 

Se ita nunka simu prezente salvasaun nian, ohin mak ita-nia loron, no momentu agora mak ita-nia momentu. La iha buat ida mak ita bele halo atu hetan, maibé ita bele hakbesik ba Nia, ho kondisaun reál ne'ebé agora ita iha. Mai de'it ba Na'i, Nia Hein hela ita.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Bensaun Sabadu nian

Maromak foo bensaun ba loron hitu, Nia halo loron nee santu, tanba iha loron nee Nia deskansa hosi Ninia servisu hotu nebee Nia halo iha kriasaun nee. Jénesis 2:3 BK

Husi tempu uluk kedas, Maromak haketak loron dahitu nu'udar tempu deskansa no Nia hasantu loron ne'e. Jenesis 2: 3 fó-hanoin ba ita katak loron Sabadu la mosu iha tempu ikus, maibé ida-ne'e Maromak fo iha inisiu kedas, hanesan parte ida husi Maromak nia dezeñu ne'ebé perfeitu ba ita ema. Sábado hanesan instituisaun divinu, Maromak kria la'os de'it ba deskansa fiziku maibé mós atu renova ita-nia vida espirituál no ita-nia relasaun ho kriadór.

Liuhusi fo bénsaun no hasantu loron dahitu, Maromak fó-hanoin ba ita semanalmente kona-ba Ninia podér nudar kriadór no Ninia domin hanesan Aman. Ida-ne'e signifikante tebes tamba, ida ne'e akontese antes sala tama iha mundu. Loron Sabadu ne'e Maromak fo kedas iha Eden hatudu katak ida-ne'e la'ós de'it ba ema judeu sira ka ritual ida de'it iha Testamentu tuan, maibé ida ne'e prezente ba ema hotu.

Iha mundu ne'ebé ema hahii produtividade, loron Sabadu konvida ita atu pauza no hanoin kona-ba ita ne'e se no ita ne'e se nian. Loron sábado mak loron haksolok ba Maromak Ninia kriasaun, atu hanoin fali kona-ba Ninia laran-di'ak, no atu adora Maromak hanesan kriadór. 

Biblikamente, hasantu loron sábado la'os kona-ba legalidade maibé kona-ba relasaun ho ita-nia kriadór. Hasantu loron dahitu, loron sábado hanesan espresaun fé katak Maromak sei fornese no fiar ba tempu ne'ebé Maromak determina (la'os ema). Kuandu ita hasantu loron Sabadu, ita aliña ita-nia an ho ritmu Maromak nian no haburas dame ne'ebé Nia fo. 

Reflesaun: Oinsa mak ita bele prepara an atu deskansa no halo relasaun di'ak ho Maromak iha loron Sabadu ne'e? 

Orasaun: Nai, obrigadu ba prezente Sabadu nian. Ajuda ha'u atu fó onra ho haksolok no hakbesik liután ba Ita-Boot kada semana. Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Oinsá atu serbi hanesan Jesus

Entaun se Hau, nebee imi nia Nai no Mestri, fasi ona imi nia ain, nunee imi mos tenki halo ida nee ba malu, atu fasi imi nia maluk nia ain. João 13:14 BK

Bainhira ita haree imajen ulun-nain ida, serake ita haree ita-nia an rasik? 

Ita hotu iha área influénsia nian, ne'e signifika katak ita ida-idak iha kbiit atu lidera. No se ita la'o tuir Jesus, ita hetan konvite atu halo tuir ezemplu lideransa nian ne'ebé Nia fó sai ba ita, iha fatin ne'ebé de'it ita hela, iha buat saida de'it ne'ebé ita halo. 

Bainhira Jesus fase ninia dixipulu sira-nia ain, Nia hatudu katak sira presiza hamoos sira-nia espirituál ka sira-nia relasaun ho Maromak, maibé Nia mós hatudu ba sira saida mak Ninia standard ba lideraransa. Atu lidera hanesan Na'i Jesus, Ninia dixipulu sira presiza haraik-an hanesan Jesus no halo sakrifisiu atu serbí ema seluk.

"Tanba Ema Nia Oan mos la mai hodi ema bele serví Nia, maibee Nia mai hodi Nia bele serví ema, no foo Ninia moris hodi hola fali ema barak" Marcos 10:45 BK

Iha apóstolu sira-nia tempu, serbisu fase ain ne'e, knaar atan sira nian. Nune'e saida mak Jesus halo ne'e hanesan buat radikál ida no Nia haruka ninia dixipulu sira atu halo buat ne'ebé hanesan. Ida-ne'e sei tau dixipulu ida-idak iha pozisaun nu'udar atan. 

Maibé atu sai boot iha Jesus Nia oin, ita tenke serbí ema seluk ho sakrifísiu. No atu ita bele sakrifika an hodi serbí ema seluk, ita tenke haree ema seluk di'ak liu fali ita-nia an.

Ida-ne'e la signifika katak ita hatún an ka hanoin ita-nia an menus iha ema seluk nia leet. Ida-ne'e signifika katak ita la haree ita-nia an nu'udar ema ne'ebé boot liu ka kiik Liu fali ema seluk. Maibé ita haree ita-nia an hanesan Jesus haree ita: nu'udar ema ne'ebé merese hetan serbí no merese atu serbí ema seluk mós. 

Tanba Jesus nia domin mak nia serbí Ninia dixipulu sira, no tanba nia hadomi ita mak Nia leba krús ho hakarak rasik iha foho Kalvariu. Jesus hatudu ba ita katak se ita hakarak sai lider, ita presiza serbí ema seluk ho haraik-an. 

No se ita hakarak atu lidera hanesan Jesus, ita presiza sai hanesan Nia. 

Tan ne'e, agora husu ba Jesus atu hatudu oinsá ita haree ita-nia an no oinsá ita haree ema seluk ne'ebé Maromak tau iha ita-nia moris. Tuirmai, husik Maromak hatudu ba ita oinsá mak ita bele serbí ema seluk ho domin. 

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More