Jesus haree ita-nia fé

No nia dehan ba sira, “Tanba sa mak imi tauk hanesan ne'e? Nusá mak imi la fiar? Marcos 4:40 BK 

                               Marcos 4:40

Dixipulu sira foin haree milagre barak husi Jesus. Sira rona ninia hanorin, haree Ninia podér, no la'o hamutuk ho Nia loroloron. Maibé kuandu anin-fuik mosu iha tasi, ta'uk domina tiha sira. Iha situasaun paniku, sira fanun Jesus tanba sira fiar katak sira besik mout ona. Jesus hakalma anin-fuik no husu pergunta importante ida: "Tanbasa mak imi ta'uk? Tanbasa mak imi la iha fé? 

Jesus la'ós de'it hateke ba anin-fuik ne'ebé hale'u sira, maibé nia hateke ba kondisaun sira-nia laran. Nia bele haree sira-nia ta'uk, dúvida, no fiar ne'ebé fraku. Maibé lia-loos ne'ebé furak mak ne'e: Jesus mós haree itania fé ne'ebé loos, maski fé ne'ebé ki'ik.

Iha Evanjellu sira-nia laran, Jesus fila fila rekoñese no responde ba ema-nia fé. Iha Evanjellu Mateus 15:21-28, feto ida hosi Kana kontinua husu Jesus Nia laran-sadi'a maski nia haree Jesus ignora nia. Maski nune'e feto ne'e kontinua husu, hatudu fiar ne'ebé kle'an, no Jesus hatán ba saida mak nia husu. Iha Evanjellu Lucas 7: 1-10, komandante Romanu ida fiar katak Jesus bele kura de'it nia atan ho liafuan ida. Jesus admira ho fiar hanesan ne'e. 

Iha tempu hanesan, Jesus mós haree fé ne'ebé kahur ho frakeza. Iha Evanjellu Marcos 9:24, aman ida-ne'ebé desperadu halerik no dehan: "Nai, ha'u fiar; ajuda ha'u- karik hau la fiar!" Orasaun onestu hosi ema ne'e hatudu katak ita la presiza sai perfeitu antes mai ba Jesus. Nia simu sira ne'ebé tau fiar ba Nia maski sira luta hela. 

Bíblia mós fó-hanoin ita katak Jesus hatene saida mak iha ema-nia laran. Mateus 2:23-25 hatete katak Jesus hatene saida mak iha ema-nia laran. Nia haree liu fali buat ne'ebé aparese iha liur. Karik ema seluk haree saida mak ema halo hanesan atividade relijiaun nian, maibé Jesus haree karik fé ne'ebé loos, ezisti iha ema-nia laran 

Ohin loron, Jesus mós sei nafatin husu pergunta ne'ebé Nia husu ba Ninia dixipulu sira: "Tanbasa mak imi ta'uk?" Anin-fuik sei mosu mai: hanesan problema, moras, moris ne'ebé la serteza, no desapontadu. Maibé fiar sai boot liután bainhira ita hanoin-hetan se mak hamutuk ho ita iha ro laran. Dixipulu sira fokus liu ba anin-fuik, maibé Jesus hakarak sira fokus ba Nia. 

Fé la signifika la iha ta'uk. Fé mak tau fiar ba Jesus maski iha anin-fuik laran

Pergunta ba ita-nia reflesaun:

Anin-fuik saida de'it mak agora dadauk koko hela ita-nia fiar? 

Serake Ita fokus liu ba problema sira ne'e ka fokus ba Jesus?

Serake ita bele halo orasaun ho onestu hodi dehan: "Nai, ha'u fiar; ajuda ha'u karik ha'u la fiar"? 

Orasaun:

Nai, Ita haree ami-nia laran kompletamente. Maromak hatene ami-nia ta'uk, dúvida, no luta sira. Favór hametin ami-nia fiar atu nune'e ami bele tau fiar ba Ita iha anin-fuik hotu iha ami-nia moris tomak. Ajuda ami atu hanoin katak la iha buat ida-ne'ebé imposivél ba Maromak. Hanorin ami atu fokus ba Jesus duke ta'uk. Hodi Jesus nia naran, Amen. 

Ohin loron, mai ita hanoin katak Jesus la'ós de'it haree ita-nia ta'uk, maibé nia mós haree ita-nia fiar maski fé ne'e ki'ik. No bainhira ita kontinua la'o hamutuk ho nia, bisrba ita-nia fiar sei sai metin liután hosi loro ba loron hodi nafatin la'o iha Dalan ba Lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e  atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Fó sinál mai ha'u!

No ema Farizeu sira mai no hahú haksesuk malu ho Jesus. Sira husu Nia hatudu sinál hosi lalehan, atu koko Nia. Jesus dada iis boot iha Ninia espíritu, no dehan, “Tanba saa mak jerasaun nee buka sinál ida? Tebes Ha'u dehan ba imi, jerasaun ne'e sei la hetan sinál ida.” Marcos 8:11-12 BK 

                           Marcos 8:11-12

Ema barak husu: "Se ha'u bele haree de'it milagre ida ho ha'u-nia matan rasik, entaun ha'u sei fiar." Karik ema balu fali hatete: "Se ha'u haree Tasi Mean fahe ba rua, manna monu husi lalehan, ka Jesus kura ema matan-delek sira, ha'u-nia fiar sei sai metin." Ohin loron mós, ema barak husu Maromak atu fó sinál antes sira hakarak tau fiar ba Nia. 

Iha Evanjellu Marcos 8:11-12, ema farizeu sira husu Jesus atu hetan sinál husi lalehan. Maibé Jesus laran-susar tebes tanba sira-nia laran la nakloke atu fiar. Sira haree ona milagre barak, maibé sira nafatin lakoi fiar ba Nia. Ida-ne'e hanorin ba ita katak sinál sira-ne'e la sempre prodús fé ne'ebé reál.

Ema Izrael mós haree milagre furak barak. Maromak salva sira husi rai-Ejitu, fó-han sira ho manna, no dirije sira liuhusi rai-fuik. Maski nune'e, sira barak sei dúvida kona-ba Maromak. Moises fó-hanoin ba povu Izrael atu hanoin Maromak nia matadalan no laran-di'ak sira iha pasadu (Deuteronomio 4:7-10, 8: 2-3). Hanoin fali Maromak Nia ajuda no tulun sira iha pasadu, sei ajuda ita atu hametin liután ita-nia fiar. 

Ohin loron, ita iha vantajen boot. La hanesan ho ema Izrael, ita iha Biblia tomak no istória rihun ba rihun ne'ebé hatudu Maromak Nia fidelidade. Evanjellu João 20:30-31 esplika katak milagre sira ne'ebé hakerek iha Eskritura hakerek ona atu nune'e ita bele fiar katak Jesus mak Maromak Nia Oan-Mane no ita bele hetan moris liuhusi Nia. 

Jesus mós fó avizu iha Evanjellu Mateus 24 katak iha loron ikus sira sei mosu sinál falsu no milagre barak. Ida-ne'e katak ita labele bazeia ita-nia fé ba milagre ka sentimentu. Fé ne'ebé loos tenke bazeia ba no maihusi Maromak Nia Liafuan. 

Depoisde Jesus moris hi'as fali, Tomé fiar bainhira nia haree Jesus ho ninia matan rasik. Maibé iha Evanjellu João 20:29, Jesus hatete: "Haksolok ba sira ne'ebé seidauk haree maibé fiar" Ne'e mak fiar ne'ebé Maromak hakarak. 

Ebreu 11: 1 fó-hanoin ita katak fé mak fiar maski ita seidauk haree. Maromak fó ona evidénsia ne'ebé sufisiente liuhusi Eskritura, istória, orasaun sira ne'ebé hetan resposta no Jesus nia moris. 

Tan ne'e, duke husu Maromak kona-ba sinál, mai ita haka'as an atu tau fiar ba Maromak liuhusi ninia Liafuan. Bainhira ita hanoin-hetan ninia fidelidade no la'o ho fé, la'ós ho buat neʼebé matan bele haree, ita kontinua la'o ba oin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Saida mak fé?

Agora, fiar mak laran metin ba buat sira ne'ebé ita espera atu simu, no hatudu realidade kona ba buat sira ne'ebé ita la haree. Ebreu 11:1 BK 

                                Ebreu 11:1

Fé mak buat ne'ebé importante tebes iha ema Kristaun nia moris. Se ita la iha fé, imposivél ba ita atu fiar no tuir Maromak kompletamente. Maibé saida mak fé? 

Ebreu 11: 1 hatete: "Fiar mak laran metin ba buat sira ne'ebé ita espera atu simu, no hatudu realidade kona ba buat sira ne'ebé ita la haree". Fé signifika fiar ba Maromak maski ita seidauk haree resposta ba ita-nia orasaun Fé mak fiar katak Maromak ne'e reál, Ninia promesa sira loos, no Nia serbisu ba ita-nia di'ak tomak.  

Fé la'ós de'it sentimentu. Ita-nia sentimentu bele muda hosi loron ba loron. Fé mak tau fiar ba Maromak Nia Liafuan maski susar. Kuandu ita-nia moris sai susar, fé sei ajuda ita atu fiar nafatin katak Maromak sei hamutuk ho ita. 

Bíblia mós hanorin katak Maromak fó fé ba ita. Roma 12: 3 hatete katak Maromak fó ona fé ba ema ida-idak. Ne'e katak fé mak prezente husi Maromak. Ita presiza husu ajuda Maromak atu haforsa ita-nia fé. 

Salvasaun ne'e rasik mai husi fé. Efeso 2: 8-9 hatete katak ita hetan salvasaun tamba grasa liuhusi fé la'os tamba ita-nia serbisu sira. Ita labele hetan salvasaun tamba ita-nia esforsu rasik. Salvasaun ne'e prezente husi Maromak liuhusi Jesus Kristu. 

Iha fé la dehan katak ita sei nunka iha pergunta ka susar. Dala ruma ita-nia fé bele sente ki'ik. Maibé fé ne'ebé ki'ik mós bele sai boot liután bainhira ita uza tempu atu hamutuk ho Maromak liuhusi orasaun no Ninia Liafuan. 

Fé mós lori ita ba asaun. Kuandu ita tau fiar duni ba Maromak, ita sei halo tuir Nia no halo tuir Ninia hanorin sira. Karik ita la komprende buat hotu, maibé ita fiar katak Maromak hatene saida mak di'ak liu ba ita. 

Ohin loron, mai ita husu Maromak atu hametin ita-nia fé. Mai ita tau fiar ba Maromak iha tempu di'ak no tempu susar sira. Bainhira ita kontinua la'o ho fé, la'ós ho buat ne'ebé matan bele haree, ita hakbesik liután ba Maromak no kontinua la'o iha Dalan ba Lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e  atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More