Saida mak signifika hosi fó ita-nia isin nudar sakrifísiu moris?

Nune'e ha'u husu imi, maun-alin sira, tanba Maromak Nia laran luak, atu fó imi-nia isin nu'udar sakrifísiu moris nian, neʼebé santu no Maromak bele simu. Ida ne'e mak imi-nia ministériu espirituál nian. Roma 12:1

                               Roma 12:1

Kuandu ita rona liafuan "sakrifísiu moris nian", karik ita hanoin kona-ba animál sira ne'ebé ema sakrifika iha altár iha Testamentu Antigu. Maibé apóstolu Paulo hatete katak ohin loron, ita tenke sai sakrifísiu moris nian. Ida ne'e signifika saida? 

Ne'e katak loron-loron ita hili atu fó ita-nia moris tomak ba Jesus. Ita-nia moris la'ós tan partensi ba ita-nia aan rasik. Ita mak Jesus Nian tanba Nia mate atu salva ita (1 Korinto 6: 19-20). 

Oinsá mak "fó ita-nia isin nu'udar sakrifísiu moris nian" iha ita-nia moris loroloron nian? 

Ne'e katak ita uza ita-nia matan atu hateke ba buat ne'ebé halo Maromak kontente no hasees an husi pornografia no buat sira ne'ebé lori ita monu ba sala (Mateus 5:28). 

Ne'e katak uza ita-nia ibun atu ko'alia lia-loos Maromaknian, fó korajen ba ema seluk, no hasees an husi gossip, lia-bosok no liafuan fo'er ka tolok (Efeso 4:29). 

Ne'e katak uza ita-nia liman atu serbisu ho laran-moos, ho onestidade, ajuda ema ne'ebé presiza, no serbí ema seluk (Efeso 4:28). 

Ida-ne'e katak uza ita-nia ain atu la'o ba fatin sira ne'ebé fó glória ba Maromak no hasees an husi fatin sira ne'ebé lori ita ba tentasaun (Salmo 119:101). 

Ne'e katak uza ita-nia neon atu hanoin kona-ba buat ne'ebé moos, justu, no di'ak ne'ebé halo Maromak kontente (Filipe 4:8). 

Ne'e mós katak tau matan ba ita-nia isin lolon rasik. Ita tenke han ho matenek, hasees an husi toman aat sira, deskansa naton, no hanoin-ba katak ita-nia isin mak Espíritu Santu nia templu (1 Korinto 6:19). 

Fó sakrifísiu moris nian mós katak ita hadomi ita-nia inimigu, ema ne'ebé susar ba ita atu hadomi, fó perdua ba sira ne'ebé hakanek ita, hatudu onestidade iha serbisu fatin, lakohi simu subornu, kumpre ita-nia promesa sira, no hili atu halo buat ne'ebé loos maski la iha ema ida mak haree. 

Ida-ne'e la fasil. Loron balu ita sei falla. Maibé dadeer-dadeer ita bele mai hasoru Jesus, husu Ninia perdaun, no husik Espíritu Santu fó forsa mai ita atu moris ba Maromak. 

Ohin loron, husu ba ita-nia an: "Serake, ha'u-nia moris loroloron sai ona Jesus nian?" Maromak la husu oras ida ka rua de'it iha loron adorasaun semanal nian. Nia hakarak ita-nia moris tomak, hanesan: ita-nia hanoin, ita-nia liafuan, ita-nia hahalok, no ita-nia isin sai Maromak Nian. 

Sakrifísiu moris nian la'ós kona-ba ema ne'ebé mate ba Maromak. Maibé ne'e signifika ema ne'ebé moris ba Maromak loroloron. 

Bainhira ita oferese ita-nia moris ba Jesus loroloron, ita kontinua la'o ho laran-metin iha Dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e  atu Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Serake ita bele husik ita-nia direitu ba emaseluk nia di'ak?

Eskritura prinsipál: 1 Korinto 9: 1-6 

Laos ha'u livre? La'os ha'u apostolu ida? La'os ha'u haree ona ita-nia Nai Jesus? La'os imi mak rezultadu hosi ha'u-nia servisu iha Nai? 1 Korinto 9:1 BK 

                              1 Korinto 9:1

Ema barak ohin loron hatete: "Ne'e mak ha'u-nia direitu. Ha'u bele halo saida de'it ne'ebé ha'u hakarak." Maibé Maromak Nia Liafuan hanorin ita dalan ne'ebé diferente. 

Iha 1 Korinto 9: 1-6, Paulo esplika katak nu'udar apóstolu, nia iha direitu atu hetan apoiu husi igreja. Nia mós iha direitu atu kaben hanesan apóstolu sira seluk. Buat sira-ne'e mak buat ne'ebé di'ak no loos. 

Maibé Paulo prontu atu husik ninia direitu balu se ida-ne'e bele ajuda ema atu hatene liután kona-ba Jesus. Nia lakohi buat saida de'it atu sai hanesan bareira ba ninia Evanjelizasaun (1 Korinto 9:12). Nia dezezu boot liu mak la'ós atu halo ninia an kontente, maibé atu ajuda ema seluk hetan salvasaun

Ida-ne'e mak signifika hosi nega ita-nia an ne'ebé motiva hosi domin. Ne'e katak tau uluk Maromak Nia serbisu no ema seluk nia presiza duke ita-nia komfortu rasik. 

Jesus mak ezemplu di'ak liu hotu. Maski Nia mak Maromak Nia Oan-Mane, Nia husik hela lalehan, Nia halo aan ba ema, no mate iha krús hodi salva ita (Filipe 2: 5-8). Nia husik hela buat hotu tanba Nia hadomi ita.

Oinsá mak ita bele prátika ka halo tuir ezemplu Jesus ne'ebé nia fó mai ita iha ita-nia moris loroloron nian? 

Dala ruma ita lakon ita-nia tempu hodi ajuda ema ne'ebé presiza. Dala ruma ita hili atu la diskute malu ho ema, maski ita hanoin katak ita iha pozisaun loos hela. Dala ruma ita gasta ita-nia osan atu ajuda família kiak ida duke sosa buat ruma ba ita-nia an rasik. Dala ruma ita para halo buat ida-ne'ebé bele halo ema seluk sidi (Roma 14:13). 

Asaun sira-ne'e ita halo la'os atu manan salvasaun. Ita halo asaun sira-ne'e tanba Jesus Nia domin hakonu ita-nia laran. 

Ohin loron, husu ba ita-nia an: "Serake ha'u moris ba ha'u-nia aan de'it ka ha'u mós halo sakrifísiu ba ema seluk?" Domin la'ós de'it ho liafuan. Domin hatudu liuhusi ita-nia sakrifísiu ba ema seluk nia di'ak. 

Kuandu ita tau uluk Jesus no hadomi ema seluk liu fali ita-nia an rasik, ema sei haree Kristu iha ita-nia moris. 

Bainhira ita ho kontente nega ita-nia an no serbí ema seluk ho domin, ita kontinua la'o ho laran-metin iha Dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Maluk sira ne'ebé Kristu hadomi, 

Ami konvida ita-boot sira atu like, share no follow pájina Dalan ba Lalehan. Ami-nia misaun mak atu fahe Maromak Nia Liafuan ho língua ne'ebé simples no fasil atu nune'e ema hotu bele komprende mensajen salvasaun nian liuhusi Jesus Kristu.

Favór like, follow, no share pájina ida ne'e ba ita-nia família no kolega sira. Atu nune'e, bele ajuda habelar lia-loos husi Maromak no tau esperansa ba ema hotu iha mundu tomak. 

Obrigadu ba imi-nia suporta. Ha'u espera katak Maromak sei haraik bénsaun barak ba imi bainhira ita halo viajen espirituál hamutuk iha dalan ba lalehan. 

 Like • Follow • Share • Maromak fo bensaun! 🙏📖✨

#GodsWord #hopechannel #hopechanneltimorleste #awrtimoleste #RTL#dalanbalalehan.blogspot.com

Read More

Tanbasá mak maromak fo tilun 2 maibé ibun ida de'it?

Eskritura prinsipál: "Ne'e duni, ha'u-nia maun-alin doben sira, mai ita hotu lalais atu rona, neineik atu ko'alia no neineik atu sai hirus. Tiago 1:19 BK

                               Tiago 1:19

Serake ita hatán ona ba ema ruma antes sira ko'alia hotu? Serake ita sai hirus los tanba buat ruma ne'ebé Ita komprende sala? Ida-ne'e akontese loron-loron iha família, igreja, fatin servisu, no iha média sosial. 

Tiago fó lisaun ne'ebé simples maibé iha podér boot. Nia hatete katak ita tenke rona lalais, ko'alia neineik, no neineik atu sai hirus. 

Tanbasá mak ida-ne'e importante? 

Iha kontekstu Tiago 1, Bíblia hanorin ita katak Maromak Nia oan sira labele rona de'it Maromak Nia Liafuan maibé mós tenke halo tuir (Tiago 1:22). Ema ne'ebé rona ba Maromak mós sei aprende atu rona ba ema seluk. Rona mak sinál ida hosi haraik-an. Ida-ne'e hatudu katak ita hanoin kona-ba ema seluk no ita hakarak aprende mós hosi ema seluk. 

Problema barak akontese tanba ema lais liu atu ko'alia. Liafuan maka'as bele hakanek kaben na'in sira, harahun relasaun di'ak ho ema seluk, no hafahe igreja. Bainhira lia-fuan sai ona hosi ita-nia ibun ita labele dada fali. Proverbiosb15: 1 hatete: "Hataan ho laran maus sei hatuun laran hirus, maibé liafuan todan sei provoka laran hirus." Provérbiu 15:1

Kuandu ita la sai hirus lalais, ita fó tempu ba Maromak atu dirije ita-nia hanoin. Tiago 1:20 mós hatete: "Tanba ema nia laran hirus la hatudu Maromak Nia hahalok loos." Dala barak, hahalok hirus halo ita ko'alia ka halo buat ne'ebé ita arrepende iha loron ikus. 

Jesus mak ita-nia ezemplu ne'ebé perfeitu. Nia rona ema ho domin no pasiénsia. Maski ema seluk insulta ka halo aat ba Nia, maibé Nia la hatán ho odi (1 Pedro 2:23). Nia ko'alia lia-loos, maibé Nia sempre ko'alia ho domin. 

Ohin loron, antes Ita ko'alia, husu ba Ita-nia an: "Serake hau-nia liafuan sei ajuda ka hakanek ema?" Rona didi'ak antes Ita hatán. Hanoin didi'ak antes ko'alia. Halo orasaun antes foti asaun. 

Ema kristaun la'os koñesidu tamba de'it nia ko'alia barak kona-ba Jesus. Ema kristaun mós koñesidu liuhusi oinsá nia rona, oinsá nia ko'alia, no oinsá nia trata ema seluk. 

Kuandu ita rona lalais, neineik atu ko'alia, no la sai hirus lalais, ita hatudu Jesus Nia karakter ba ema hotu ne'ebé hale'u ita. 

Bainhira ita husik Jesus kontrola ita-nia liafuan no ita-nia atitude ka hahalok loroloron nian, ita kontinua la'o ho laran-metin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More