Koñesimentu espirituál la ho domin valor la iha

“ita hotu iha matenek.” Matenek ne'e halo ema loko aan, maibé domin hametin ema. 1 Korinto 8:1

                          1 Korinto 8:1

Ema barak hanoin katak kuandu sira iha koñesimentu barak liu kona-ba Biblia, sira sei sai ema kristaun ne'ebé di'ak liu. Maibé apóstolu Paulo fó avizu ida mai ita. Nia hatete katak koñesimentu ne'ebé la akompaña ho domin bele sai perigu. 

Oinsá mak ida-ne'e bele akontese? 

Karik ema ida hatene versíkulu barak husi Biblia, maibé nia uza versíkulu sira-ne'e atu kritika ema seluk duke ajuda sira. Karik nia argumenta no manán debate maibé halo ema ofendidu no ema neʼe lakohi tan estuda no hatene lia-loos.

Karik ema ida hatene hanorin barak kona-ba Biblia, maibé nia sente orgullu no foti aan. Karik nia hanoin: "Hau hatene liu fali ema seluk." Duke hatudu laran-di'ak no haraik-an, nia hatun fali ema seluk. 

Karik ema ida hatene lia-loos, maibé nia ko'alia lia-loos ho kasar. Lia-loos mak buat ne'ebé importante, maibé ita tenke ko'alia lia-loos ho domin (Efeso 4:15). Ema barak hakarak rona bainhira sira hatene katak ita hanoin no prekupa kona-ba sira. 

Apóstolu Paulo hakerek liafuan sira-ne'e tanba ema kristaun balu iha Korinto hatene katak ídulu ne'e la bale buat ida. Sira hatene katak sira bele han ai-han ne'ebé oferese ona ba estátua sira. Maibé ema kristaun foun balu sira-nia fiar sei fraku. Se sira haree ema kristaun ne'ebé maduru ona han ai-han ne'ebé oferese ba estátua, sira bele sai konfuzaun no monu ba sala. Loos duni katak ai-han ne'ebé oferese ona ba estátua la bale buat ida, maibé kuandu ita han no halo ema seluk monu ba sala, ida ne'e perigu. Apóstolu Paulo hatete katak domin mak importante liu fali hatudu ita-nia koñesimentu (1 Korinto 8: 9-13). 

Lisaun ne'e mós aplika ba ita ohin loron. 

Karik ita hatene katak buat ruma la sala ba ita, maibé se ita-nia hahalok halo ema fiar-na'in seluk sidi, nee la di'ak. Domin bele halo ita husik tiha ita-nia liberdade ne'e ba ema seluk nia di'ak. 

Jesus mak ita-nia ezemplu ne'ebé perfeitu. Nia hatene buat hotu, maibé Nia la uza Ninia koñesimentu atu halo ema seluk sente ki'ik no la bale. Nia hanorin ho laran-di'ak, pasiénsia, no kompaixaun. Nia mai la'ós atu hatudu katak Nia iha podér boot tebes, maibé atu salva ema. 

Ohin loron, husu ba ita-nia an: "Serake ha'u uza buat ne'ebé ha'u hatene atu ajuda ema seluk, ka atu halo ha'u sai orgullu no foti aan?" Maromak la'ós de'it hakarak ita atu hatene Biblia. Nia hakarak ita atu aplika ka moris tuir hanorin Biblia nian. 

Koñesimentu kona-ba Bíblia mak prezente furak ida, maibé tenke akompaña ho domin. Kuandu lia-loos no domin la'o hamutuk, halo ema hakbesik liután ba Jesus. 

Bainhira ita krexe liután iha Maromak Nia lia-loos no mós iha Maromak Nia domin, ita kontinua la'o ho laran-metin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Saida mak bele troka Maromak nia fatin iha ita-nia laran?

Eskritura prinsipál: Marcos 10:17-22; Marcos 12:28-31; 1 Korinto 10 

                        Marcos 10:17

Mane joven ida-ne'ebé riku mai hasoru Jesus no husu: "Saida mak ha'u tenke halo atu hetan moris rohan-laek?" (Markus 10:17). Nia halo tuir ona Maromak Nia mandamentu barak. Maibé bainhira Jesus husu nia atu husik ninia rikusoin no la'o tuir Jesus, mane joven ne'e sai triste. Tanbasá? Tanba nia hadomi liu ninia osan duke nia hadomi Maromak (Mark 10:21-22). 

Liutiha tempu balu, Jesus hatete katak mandamentu ne'ebé boot liu mak hadomi Nai, ita-nia Maromak, ho ita-nia laran, neon, no kbiit tomak, no atu hadomi ita-nia maluk hanesan ita-nia an rasik (Markus 12:28-31). 

Saida mak komún entre istória rua ne'e? 

Istória rua ne'e hanorin katak Maromak mak tenke sai prioridade numeru dahuluk iha ita-nia moris. La sufisiente atu hatene de'it Maromak Nia mandamentu sira. Ita tenke hadomi Maromak liu fali buat seluk. 

Ne'e mós sai mensajen husi 1 Korinto 10. Paulo fó-hanoin ba ema fiar-na'in sira katak ema Izrael hasees an husi Maromak no adora estatua karau-oan halo hosi osan-mean ida (1 Korinto 10:7; Exodo 32:1-6). Sira husik buat seluk troka Maromak Nia fatin. Ida-ne'e lori sira ba komete pekadu sira seluk, inklui mós sala imoralidade seksuál. 

Ohin loron, ema barak la adora estatua karau-oan halo hosi osan-mean. Maibé ema barak iha ídulu ka estátua seluk. Ídulu seluk ne'e inklui: osan, susesu, ksolok, desportu, entertainment ka hiburan mundu nian, tua, alko, meiu komunikasaun sosiál, ka ita-nia serbisu mós bele sai importante liu fali Maromak no troka MaromakNiafatinihaita-niamoris. Kuandu buat ruma sai prioridade dahuluk iha ita-nia laran liu fali Maromak, ida ne'e sai ita-nia ídulu.

Oinsá mak ita bele hatene se buat ruma sai ona ita-nia ídulu ka estátua? 

 Husu ba ita-nia an: 

 - saida mak ha'u hanoin barak liu iha haʼu-nia moris? 

 - Saida mak hau gasta tempu barak liu iha ha'u-nia moris? 

 - Saida mak susar liu ba ha'u atu husik atu bele tuir Jesus? 

Resposta sira ne'e bele indika saida mak importante liu iha Ita-nia laran no troka Maromak iha ita-nia laran.

Jesus mós husu pergunta ne'ebé hanesan: "Serake imi tau prioridade dahuluk ha'u iha imi-nia laran?" Kuandu ita hadomi Jesus ho ita-nia laran tomak, ita sei halo tuir Nia no hadomi ema seluk. 

Ohin loron, husik Jesus sai prioridade dahuluk iha ita-nia moris. Hasai tiha buat saida de'it ne'ebé troka jesus nia fatin iha ita-nialaran. La iha osan, ksolok, ka susesu ida mak bele fó dame no moris rohan-laek ba ita, so Jesus de'it mak bele fó. 

Bainhira ita hadomi Maromak liu fali buat hotu no la'o tuir Jesus ho ita-nia laran tomak, ita kontinua la'o ho laran-metin iha Dalan ba Lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e  atu Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Maluk sira ne'ebé Kristu hadomi, 

Ami konvida ita-boot sira atu like, share no follow pájina Dalan ba Lalehan. Ami-nia misaun mak atu fahe Maromak Nia Liafuan ho língua ne'ebé simples no fasil atu nune'e ema hotu bele komprende mensajen salvasaun nian liuhusi Jesus Kristu.

Favór like, follow, no share pájina ida ne'e ba ita-nia família no kolega sira. Atu nune'e, bele ajuda habelar lia-loos husi Maromak no tau esperansa ba ema hotu iha mundu tomak. 

Obrigadu ba imi-nia suporta. Ha'u espera katak Maromak sei haraik bénsaun barak ba imi bainhira ita halo viajen espirituál hamutuk iha dalan ba lalehan. 

 Like • Follow • Share • Maromak fo bensaun! 🙏📖✨

Read More

Tanbasá mak ita nafatin monu ba sala?

Eskritura prinsipál: "Tentasaun hotu ne'ebé hasoru imi ne'e, baibain hasoru ema seluk. Maromak mak fiél, no Nia sei la husik imi atu hetan tentasaun neʼebé liu fali imi-nia kbiit. Maibé bainhira tentasaun mai, Nia sei fó dalan ida hodi sai, atu nune'e imi bele tahan tentasaun ne'e." 1 Korinto 10:13 BK 

                          1 Korinto 10:13

Ema kristaun barak husu: "Se Maromak sempre fó dalan atu halai husi tentasaun, tanbasá mak ha'u sei nafatin monu ba sala?" 

Ninia resposta mak la'ós Maromak falla. Maromak sempre kumpre Ninia promesa sira. Problema mak dala barak ita la halai-sai husi dalan ne'ebé Maromak fornese. 

Porezemplu, se ita hatene kona-ba website ka sítiu ruma ne'ebé lori ita ba sala, dalan atu halai sai mak para vizita sítiu ne'e. Se kolega balu iha grupu ida enkoraje ita atu halo buat ne'ebé sala, dalan sai mak sai husi grupu ne'e. Se ita mesak de'it ho ema ruma mak hamosu tentasaun, dalan sai mak hasees an husi situasaun hanesan ne'e. 

Dala ruma ita monu tanba ita hanoin: "Hau forte. Ha'u bele kontrola ida-ne'e." Maibé Biblia fó avizu: "Nunee ema nebee hanoin katak nia hamriik hela, nia tenki kuidadu katak nia la monu." 1 Korinto 10:12. Konfia an demais bele lori ita ba perigu. Ita presiza sadere ba Jesus loroloron. 

Dala ruma ita mós monu ba sala tanba ita kontinua fó-han ba dezezu pekadu nian. Ita gasta oras barak haree entertainment ka hiburan mundu nian, maibé so gasta minutu balun de'it halo orasaun ka lee Biblia. Relasaun ho Maromak ne'ebé fraku hafasil ita monu ba tentasaun. 

Jesus hatudu ezemplu ne'ebé loos ba ita. Kuandu Satanas koko Nia iha rai-fuik, Nia sempre hatán ho Maromak Nia Liafuan (Mateus 4: 1-11). Nia mós gasta tempu barak halo orasaun ho Ninia Aman (Lukas 5:16). Tan ne'e mak Nia prontu atu hasoru tentasaun bainhira tentasaun mosu mai. 

Liafuan di'ak mak ne'e: kuandu ita falla, Maromak la para atu hadomi ita. "Se ita konfesa ita-nia sala, Nia mak fiél no justu no Nia sei fó perdaun ba ita-nia sala, no hamoos ita hosi hahalok aat hotu."1 João 1:9. Tuirmai, Nia fó forsa mai ita atu hamriik fali. 

Ohin loron, husu ba ita-nia an: "Serake ha'u halai ses hosi tentasaun tuir dalan ne'ebé Maromak fornese, ka ha'u la'o besik ba tentasaun sira?" Keta hein to'o tentasaun sai forte liu ita. Halai ba Jesus sedu. Halo orasaun nafatin. Lee Maromak Nia Lia-fuan loroloron. Husik hela fatin sira ne'ebé lori ita ba tentasaun. Husu Espíritu Santu atu ajuda Ita. 

Maromak promete ona dalan atu halai-sai hosi tentasaun. Ita-nia parte mak hili dalan ne'ebe Maromak fornese. Kuandu ita hili Jesus duke halo sala, ita-nia fiar sai metin liután. 

Kuandu ita sadere ba Jesus loroloron no hili ninia dalan atu halai sai hosi tentasaun no ita kontinua la'o ho laran-metin iha Dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More