Tanbasá mak Maromak haruka Moises atu hasai Ninia sandálias?

Eskritura Prinsipal: Exodo 3: 5 

Loron ida, Moises tau matan hela ba bibi-malae sira iha rai-fuik. Derrepente de'it, nia haree buat ne'ebé estrañu. Nia haree ahi sunu hela ai-hun ida, maibé ahi la destroi ai ne'e (Exodo 3: 2). 

                                  Exodu 3:5

Moises ba besik liután atu haree. Tuirmai Maromak bolu ninia naran: "Moses!, Moses!" Moises hatán: "Hau mak ne'e." Tuirmai Maromak dehan: “Keta hakbesik liu tan. Hasai tiha ó-nia sandálias lai, tanba fatin neʼebé ó hamriik mak rai santu.” Exodu 3:5

Tanbasá mak Moises tenke hasai ninia sandálias? 

Maromak hanorin lisaun importante ida ba Moises: Maromak ne'e santu. 

Rai ne'ebe Moises hamriik ba, la espesiál ida. Ne'e mak fatin baibain ida iha rai-fuik. Maibé kuandu Maromak mai iha ne'ebá ou tamba Maromak Nia prezensa iha ne'eba, fatin ne'e sai santu. 

Hasai tiha ninia sandálias mak dalan ida atu hatudu respeitu, haraik-an, no hatudu onra no louvor ba Maromak. 

Moises la bele arbiru de'it mai iha Maromak Nia oin. Nia presiza hatene katak nia hamriik iha Kriador Nia oin. 

Lisaun ne'ebe hanesan importante ba ita atu prende ohin loron. 

Karik ita la haree ai ne'ebé sunu ho ahi, maibé Maromak nafatin santu (Isaias 6: 3). 

Ne'e katak sá iha ita-nia moris loroloron nian? 

Kuandu ita halo orasaun, hanoin-hetan, ho se mak ita ko'alia daudauk. Orasaun la'ós hanesan ita ko'alia ho kolega ida liuhusi telefone. Bainhira halo orasaun, Ita ko'alia daudauk ba Kriador lalehan no rai nian. 

Bainhira ita ba igreja, keta hanoin hanesan atividade baibain ida. Ko'alia neineik bainhira presiza, mantein silensiu. Rona ho atentivu ba Maromak Nia Liafuan. Hasees an husi interferensia ka distraksaun ne'ebé la nesesariu. Mai igreja ho laran ne'ebé prontu atu hasoru Maromak. 

Kuandu ita lee Biblia, lee ho respeitu. Ita la'ós de'it lee livru baibain ida. Ita rona daudauk Maromak Nia mensajen. 

Iha uma, hanorin oan sira atu respeitu Maromak. Ajuda sira atu komprende katak adorasaun ne'e importante, la'ós tanba uma ne'e espesiál, maibé tanba Maromak merese atu hetan respeitu hosi ita. 

Maibé iha mós lisaun importante seluk tan.

Maromak la dehan de'it ba Moises atu hasai ninia sandálias. Maromak prepara nia atu hala'o misaun ida. Maromak hatete: "Hau sei haruka ó ba Farao." Exodo 3:10

Antes Moises bele serbí Maromak, nia presiza hatene uluk se mak Maromak no se mak status nia (Moises) aan rasik. 

Dala ruma ita hakarak halo buat ne'ebé di'ak ba Maromak, maibé ita haluha gasta tempu hamutuk ho Maromak. 

Dalaruma Ita hakarak haklaken, hanorin, dirije, ka serbí, maibé Maromak dehan: 

 "Hakbesik mai ha'u. Hatene ha'u lai. Respeitu Ha'u. Rona Ha'u." 

Serbi Maromak ne'ebé loos hahú ho laran ne'ebé haraik-an. 

Ohin, antes ita ho lalais ba ita-nia serbisu, para no gasta tempu ho Maromak. Antes ko'alia ba Maromak, rona uluk ba Maromak. Antes ita dirije ema seluk, husik Maromak dirije ita. 

Ohin, husu ba ita-nia an: 

"Serake hau hafolin duni Maromak nu'udar santu ka ha'u trata Maromak la ho kuidadu hanesan figura baibain ida?" 

Ohin loron, ita la presiza hasai ita-nia sandálias, maibé ita-nia atitude oinsa atu hatudu respeitu ba Maromak sei importante nafatin. 

Ita mai ba Maromak ho haraik-an. 

Ita rona Maromak Nia futarlia ho respeitu. 

Ita adora ho laran-moos. 

Ita obedese ba Maromak ho domin. 

Maromak ne'ebé ko'alia ba Moises husi ai ne'ebé sunu hela sei bolu ema to'o ohin loron. 

"Hakbesik liután ba Ha'u. Rona mai Ha'u. Ha'u iha serbisu ba imi." 

Bainhira ita hakbesik ba Maromak santu ho haraik-an, rona ba Ninia lian, no halo tuir Ninia konvite ho laran-metin, Nia lidera ita iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Serake ita prontu resposta kona-ba Ita-nia esperansa?

Eskritura xave: 

Maibé iha imi-nia fuan-laran, fó onra ba Nai Kristu neʼebé santu. Imi tenki prontu nafatin atu hatán ema ne'ebé husu imi atu esplika esperansa neʼebé iha imi-nia laran. Maibé hatán ho laran maus no respeitu. 1 Pedro 3:15

                             1 Pedro 3:15

Karik ema husu Ita: "Tanbasá mak ó fiar ba Jesus?" 

Karik iha serbisu-fatin ema ruma husu Ita:

"Tanbasa mak ó ba igreja?" 

Karik kolega ida husu: "Tanbasá mak ó la join ho ami halo ida ne'e?" 

Karik ema ruma ne'ebé hasoru hela susar balu no husu: "Tanbasa mak ó sei iha esperansa nafatin?" 

Serake ita hatene saida mak atu ko'alia? 

Apóstolu Pedro hatete ba ema kristaun atu "sempre prontu nafatin". Ida-ne'e la dehan katak ema hotu tenke sai evanjelista ka haklaken-nain. Ne'e katak ema kristaun ida-idak tenke hatene tanbasá mak sira fiar ba Jesus no prontu atu esplika. 

Esperansa saida mak ita iha? 

Ita-nia esperansa mak Jesus Kristu. 

Ita fiar katak Jesus mate tanba ita-nia sala no moris hi'as fali (1 Korinto 15: 3-4). Ita fiar katak Nia moris ona. Ita fiar katak Nia sei mai fali no lori Ninia povu ba lalehan (João 14: 1-3). 

Tanba Jesus, ita bele hetan perdua ohin loron no moris rohan-laek iha futuru (1 Joao 1:9; Joao 3:16). 

Oinsá mak ita bele prontu iha ita-nia moris loroloron nian? 

Ulukliu, hatene Ita-nia istória rasik. 

Ita la presiza tenke hatene versíkulu atus ba atus. Ita bele dehan de'it: 

"Hau tuir Jesus tanba Nia fó perdua mai ha'u, transforma ha'u-nia moris, no fó esperansa mai ha'u." 

Se Ita esperiensia ona Maromak Nia ajuda, fó-hatene ema seluk kona-ba ne'e. 

Segundu, hatene kona-ba versikulu balu kona-ba Maromak Ninia promesa sira iha Biblia. 

Porezemplu: 

João 3:16 - Maromak hadomi ita no haruka Jesus mai salva ita. 

1 João 1: 9 - Maromak fó perdua ba ita-nia pekadu kuandu ita konfesa ita-nia sala sira. 

João 14: 1-3 - Jesus promete atu mai fali. 

Roma 8:38-39 - La iha buat ida mak bele haketak ita husi Maromak Nia domin. 

Terseiru, husik Ita-nia moris hatudu Ita-nia lia-fuan sira. 

Se ita hatete ba ema katak Jesus hanorin ema onestidade, maibé ita bosok iha ita-nia negósiu, karik sira la fiar ita-nia mensajen.

Se ita hatete ba ema katak Jesus hanorin kona-ba fo perdua, maibé ita rasij lakohi fó perdua ba ita-nia maluk sira, ita-nia liafuan sai fraku. 

Ita-nia asaun hotu tenke suporta buat ne'ebé ita hatete. 

Ba dala haat, ko'alia ho laran-di'ak. 

Apostolu Pedro hatete katak ita tenke hatán "ho laran-maus no ta'uk" (1 Pedro 3:15). Ita labele hakilar ema ka halo sira sente beik tanba sira-nia fiar ne'ebé diferente. 

Ita-nia objetivu mak la'os atu manán debate. Ita-nia objetivu mak ajuda ema atu haree Jesus. 

Ohin, husu ba ita-nia an: 

"Se ema ruma husu ha'u tanbasá mak ha'u fiar ba Jesus, serake ha'u prontu atu hatán?" 

Hahú prepara aan ohin. Lee Biblia. Halo orasaun. Hanoin to'ok kona-ba buat ne'ebé Jesus halo ona ba ita-nia moris. Aprende oinsá esplika Ita-nia esperansa ho liafuan simples sira. 

Karik ita la'ós pastor ida. Karik Ita la'os mestri Biblia ida. Maibé ita bele sai sasin. 

Karik ema ne'ebé hale'u ita buka hela esperansa. Karik ita-nia sasin simples ida mak buat primeiru ne'ebé bele lori ema neʼe hakbesik liután ba Jesus. 

Bainhira ita moris ho esperansa, prepara ita-nia an atu esplika esperansa ne'e, no fahe Jesus Ninia hanorin ho laran-di'ak, ita ajuda ema seluk atu deskobre dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Serake Ita rona de'it Maromak Nia Liafuan maibé la halo tuir?

Maibé sai ema neʼebé halo tuir liafuan ne'e, la'ós ema ne'ebé rona de'it, hodi imi la lohi imi-nia aan rasik. Tiago 1:22

                               Tiago 1:22

Serake ita rona ona ema ida fó konsellu di'ak maibé nia rasik nunka halo tuir? 

Porezemplu, doutór ida hatete: "Ita presiza halo ezersísiu no han hahan ne'ebé nutrisaun di'ak." Ita rona didi'ak no hatete: " Sin, doutór." Maibé bainhira ita fila ba uma, ita la halo tuir.

Rona mak buat ne'ebé di'ak, maibé rona la ho asaun la ajuda ita. 

Tiago mós fo lisaun ne'ebé hanesan kona-ba Maromak Nia Liafuan. Nia dehan katak ita labele rona de'it Maromak Nia Liafuan. Ita tenke halo tuir buat ne'ebé Biblia hatete. 

Ne'e katak sá iha ita-nia moris loroloron nian? 

Se Biblia hatete: "Keta bosok" (Koloso 3:9), entaun ita tenke fó sai lia-loos maski bosok bele ajuda ita. 

Se Biblia hatete: "Hadomi ó-nia inimigu sira" (Mateus 5:44), entaun ita labele koko atu hakanek ema ne'ebé hakanek ita. Ita bele halo orasaun ba ema ne'e no hili atu fo perdua. 

Se Biblia hatete: "Keta na'ok" (Exodo 20:15), entaun ita labele foti buat ne'ebé la'ós ita-nian, maski la iha ema ida mak haree. 

Se Biblia hatete: "Keta husik liafuan aat sai husi ó-nia ibun" (Efeso 4:29), entaun ita tenke hapara gossip, insulta ema no hasai liafuan ne'ebé hakanek ema seluk. 

Se Biblia hatete: "lori ta-nia maluk nia todan sira" (Galatia 6: 2), entaun kuandu ema ida hasoru susar ruma, ita labele dehan de'it: "Hau sei halo orasaun ba imi." Se ita bele ajuda, ita presiza ajuda. 

Se Biblia hanorin ita atu fó perdua (Efeso 4: 32), ita labele alista ema nia sala sira iha pasadu iha ita-nia laran. 

Bíblia hanesan espellu ida.

Tiago kompara Maromak Nia Liafuan ho espellu (Tiago 1:23-25). 

Kuandu ita hateke ba espellu, ita haree fo'er iha ita-nia oin. Maibé hanoin to'ok, karik ita haree fo'er iha ita-nia oin no depois la'o sai de'it ba no la fase. 

Ne'e mak buat ne'ebé akontese bainhira ita lee Biblia, haree buat ruma ne'ebé sala iha ita-nia moris, maibé lakohi muda ita-nia hahalok. 

Karik Biblia hatudu katak ita ema ne'ebé hirus dór. 

Karik Biblia hatudu katak ita la onestu 

Karik biblia hatudu katak ita presiza fó perdua ba ema seluk. 

Karik Biblia hatudu katak ita ladún uza tempu barak hamutuk ho Maromak liuhosi lee Biblia no orasaun.

Kuandu Maromak Nia Liafuan hatudu buat sala ruma mai ita, keta taka Biblia no haluha tiha de'it. Husu Maromak atu ajuda Ita nuda Ita-nia hahalok sala ne'e. 

Ohin loron, keta husu de'it: "Hau aprende saida husi Biblia?" 

Maibé mós husu: "Saida mak ha'u sei halo tanba buat ne'ebé ha'u aprende ona hosi Biblia?" 

Lee versíkulu ida. Komprende versikulu ne'e. Tuirmai halo tuir ka pratika lisaun ne'e. 

Asaun obedese iha buat kiik-oan sira, di'ak liu duke hatene versíkulu barak, maibé lakohi halo tuir. 

Maromak Nia Liafuan la'ós de'it atu hakonu ita-nia kakutak ho koñesimentu. Maromak Nia lia-fuan sira fó atu muda ita-nia laran no ita-nia moris. 

Kuandu ita rona Maromak Nia Liafuan, halo tuir, no tau ba pratika loroloron, ita kontinua la'o ho laran-metin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Maluk sira ne'ebé Kristu hadomi, 

Ami konvida ita-boot sira atu like, share no follow pájina Dalan ba Lalehan. Ami-nia misaun mak atu fahe Maromak Nia Liafuan ho língua ne'ebé simples no fasil atu nune'e ema hotu bele komprende mensajen salvasaun nian liuhusi Jesus Kristu

Favór like, follow, no share pájina ida ne'e ba ita-nia família no kolega sira. Atu nune'e, bele ajuda habelar lia-loos husi Maromak no tau esperansa ba ema hotu iha mundu tomak. 

Obrigadu ba imi-nia suporta. Ha'u espera katak Maromak sei haraik bénsaun barak ba imi bainhira ita halo viajen espirituál hamutuk iha dalan ba lalehan. 

 Like • Follow • Share • Maromak fo bensaun! 🙏📖✨

Read More