Lee: Marcos 12:30
"Ó tenki hadomi Nai, ó-nia Maromak, ho ó-nia laran tomak, ó-nia klamar tomak, ó-nia neon tomak, no ó-nia forsa tomak.’ Ida nee mak ukun fuan uluk liu." Marcos 12:30
Saida mak signifika bainhira ita dehan, “Hau hadomi Maromak”? Ita hatete de’it “Hau hadomi Maromak,” ka ita-nia moris mós tenke hatudu katak ita hadomi Nia?
Jesus fó resposta klaru iha Marcos 12:30. Nia dehan "Ó tenki hadomi Nai, ó-nia Maromak, ho ó-nia laran tomak, ó-nia klamar tomak, ó-nia neon tomak, no ó-nia forsa tomak." Signifika katak Maromak la hakarak de’it parte ki’ik ida hosi ita-nia moris. Nia hakarak ita-nia an tomak.
Hadomi Maromak ho ita-nia laran tomak
Laran mak fatin ne’ebé ita tau ita-nia sentimentu, hakarak no prioridade. Se ita hadomi Maromak, ita sei hakarak hatene Nia no besik ba Nia loroloron.
Ezemplu simples: bainhira ita hadomi ema iha família, ita hakarak ko’alia ho nia, rona nia no halo buat ne’ebé halo nia kontente. Nune'e mós bainhira ita hadomi Maromak.
Ita bele hatudu ita-nia domin ba Maromak bainhira ita reza, lee Bíblia, bá igreja, partisipa iha eskola sabatina, no ko’alia ho Maromak kona-ba ita-nia problema.
Maibé hadomi Maromak la’ós de’it kona-ba atividade igreja.
Hadomi Maromak ho ita-nia hanoin
Ita-nia hanoin mos pertense ba Maromak. Bainhira ita tenke halodesizaun, ita bele husu:
“Buat ne’e sei halo Maromak kontente ka lae?”
Ezemplu, iha servisu ka negósiu, ema bele tenta bosok ita atu hetan osan barak. Se ita hadomi Maromak, ita sei hili onestidade maski ita bele lakon osan.
Iha uma, bainhira ita hakarak responde ho liafuan aat, ita bele para no hanoin: “Jesus hakarak ha'u responde oinsá?”
Hadomi Maromak signifika husu Nia atu guia ita-nia hanoin antes ita halo desizaun.
Hadomi Maromak ho ita-nia forsa
Jesus mos dehan atu hadomi Maromak ho ita-nia forsa tomak.
Signifika uza buat ne’ebé ita iha atu serbí Nia.
Se ita iha forsa atu servisu, ajuda ema.
Se ita iha tempu, fó tempu ba Maromak no ba ema ne’ebé presiza.
Se ita iha talentu, uza talentu ne’e iha igreja.
Se ita iha osan, uza parte balu atu ajuda servisu Maromak nian no ajuda ema seluk.
Labarik bele ajuda inan-aman. Joventude bele ajuda igreja. Ema boot bele fahe sira-nia esperiénsia ho ema foin-sa’e sira. Ema ida-idak iha buat ruma ne’ebé nia bele fó.
Hadomi Maromak signifika obedese Nia
Jesus dehan iha João 14:15, “Se imi hadomi Ha’u, imi sei kumpre Ha’u-nia mandamentu sira.”
Ne’e importante. Ita bele hatete, “Hau hadomi Jesus,” maibé se ita kontinua halo buat ne’ebé ita hatene katak sala, ita presiza husu ita-an se ita-nia domin ba Nia loos duni ka lae.
Hadomi Maromak la signifika katak ita sei perfeitu no nunka halo sala. Ita sei halo sala tanba ita ema sala-na'in. Maibé bainhira ita hadomi Jesus, ita sei hakarak muda ita-niahahalok aat, husu deskulpa, husu perdua no tuir Maromak Nia dalan.
Hanoin kona-ba ita-nia moris ohin loron. Serake Maromak iha parte ida de’it iha ita-nia moris, ka Nia sai sentru hosi ita-nia moris?
Bainhira ita hadeer mai iha dadeer, ita bele hahú loron ho orasaun simples:
“Maromak, loron ohin hau fó hau-nia laran, hau-nia hanoin, hau-nia forsa no hau-nia tempu ba Ita. Guia hau atu moris tuir Ita-nia hakarak.”
Depois, durante loron, ita bele hatudu domin ne’e liuhosi buat ki’ik sira: ko’alia ho laran di’ak, ajuda ema, la bosok, perdua ema, fahe buat ne’ebé ita iha no hili buat ne’ebé loos maski ema seluk la haree.
Hadomi Maromak la’ós de’it liafuan ne’ebé ita dehan. Hadomi Maromak mak oinsa maneira ita moris kada loron.
Dalan ba Lalehan mak aprende atu hadomi Maromak ho ita-nia laran tomak, klamar tomak, hanoin tomak no forsa tomak. Bainhira ita tau Maromak iha ulun, iha laran no iha ita-nia asaun kada loron, ita sei lao besik liután ba Nia.
🙏 MAROMAK FO BENSAUN🙏🏻
Click iha ne'e atu estuda Maromak ninia lia-fuan 📝
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
