Textu Bíbliku: 2 Korinto 13:11
Ikus mai, maun-alin sira, haksolok ba!. Sai kompletu. Fó komfortu ba malu, simu malu, moris iha dame laran, no Maromak Domin no Dame Nian sei hamutuk ho imi. 2 Korinto 13:11
Iha esperansa ba ita
Paulo hakerek liafuan ne’e ba ema sira ne’ebé hasoru problema no difikuldade iha igreja. Maibé nia mensajen la’ós mensajen desesperasaun. Paulo fó esperansa.
Nia dehan: kontinua haksolok, hadi’a ita-nia moris, fó forsa ba malu,moris hamutuk, no moris ho dame.
Ne’e hatudu katak, maski ita hasoru problema, ita bele kontinua la'o ho Maromak.
Esperansa kristaun la signifika katak ita sei la iha problema. Esperansa signifika katak problema la'os rohan ba ita-nia moris. Maromak la husik ita, Nia ladook husi ita, Nia iha ita-nia sorin.
Paulo remata ho promessa furak: “Maromak domin no dame na'in sei hamutuk ho imi.” Ne’e mak ita-nia esperansa.
Oinsá mak ita bele hetan esperansa hosi versu ne’e?
1. Kontinua haksolok
Ita la presiza hein problema hotu-hotu remata atu bele haksolok.
Dala ruma ita iha problema iha família, osan la to’o, servisu susar, ka ema halo ita triste. Maibé ita bele haree ba buat di’ak ne’ebé Maromak fó ona.
Kada dadeer, antes ita hahú loron, dehan:
“Obrigadu Maromak tanba hau sei moris ohin. Guia hau ohin loron.”
Gratidaun bele ajuda ita haree Maromak Nia bénsaun, maski iha problema.
2. Kontinua hadi’a ita-nia moris
Paulo dehan atu ita “halo ita-nia moris sai di’ak liu.” Ita la bele dehan, “Hau mak hanesan ne’e ona; hau la bele muda.” Labele dehan hanesan ne’e. Ho Maromak Nia ajuda, ita bele muda.
Se ita sempre hirus, aprende atu kontrola ita-nia liafuan.
Se ita sempre ko’alia aat ema seluk, aprende atu ko’alia di’ak.
Se ita halo sala, husu deskulpa.
Se ita lakon tempu iha buat ne’ebé la importante, uza tempu liután ba lee Bíblia no orasaun.
Mudansa ki’ik kada loron bele lori ita ba moris ne’ebé di’ak liután.
3. Fó forsa ba malu
Ita hotu presiza aten-brani. Dala ruma ema ida iha igreja ka família bele hamnasa iha li’ur, maibé iha laran, sira triste ka sofre hela.
Liafuan simples hanesan: “Labele rende an. Hau sei halo orasaun ba ó.” bele fó forsa boot ba ema ida.
Tanba ne’e, ohin buka ema ida ne’ebé presiza korajen no fó liafuan di’ak ba nia.
4. Buka dame, la’ós konflitu
Paulo dehan: “Moris ho dame.”
Iha família, servisu fatin no igreja, ita sei iha diferensa hanoin. Maibé diferensa la presiza hamosu konflitu.
Bainhira ita hirus, tenta la responde kedas. Para lai. Halo orasaun. Depois ko’alia ho lian ne’ebé hakmatek.
Husu: “Serake hau-nia liafuan sei lori dame ka sei aumenta problema?” Dala barak, ita bele rezolve problema ida ho lian ne’ebé hakmatek duke ho lian hirus.
Oinsá atu hetan liután esperiénsia kona-ba versu 2 Korinto 13:11 ne’e? Versu ne’e la’ós de’it atu lee. Ita tenki pratika.
Hahú ohin:
Dadeer: Halo orasaun badak antes hahú atividade.
Durante loron: Bainhira problema mosu, para no husu Maromak atu fó dame.
Ho ema seluk: Fó liafuan ida ne’ebé haforsa ema.
Iha kalan: Hanoin fila-fali: “Iha ne’ebé mak Maromak ajuda ona hau ohin?” Depois agradese ba Maromak.
Se ita halo ida-ne’e kada loron, ita sei aprende atu haree katak Maromak Nia domin no dame la’ós de’it liafuan iha Bíblia. Ita bele sente no moris ho domin no dame iha ita-nia moris loroloron.
Mensajen ba ita: Ita bele iha problema, maibé ita la mesak. Maromak Nia domin sei hamutuk ho ita. Maromak Nia dame bele fó forsa ba ita maski situasaun seidauk muda.
Tanba ne’e:
Kontinua haksolok.
Kontinua hadi’a an.
Fó forsa ba malu.
Buka dame.
No kontinua fiar ba Maromak.
Biarba, “Maromak domin no dame na'in sei hamutuk ho ita.” — 2 Korinto 13:11
Orasaun: “Maromak ami-nia Aman, obrigadu tanba Ita nia domin no dame. Bainhira ami hasoru problema, ajuda ami atu la lakon esperansa. Ajuda ami atu haksolok, hadi’a ami-nia moris, fó forsa ba ema seluk no buka dame. Fó ba ami laran ida ne’ebé fiar nafatin ba Ita, maski ami la hatene saida mak sei akontese aban. Fó ami atu sente Ita nia domin no dame kada loron. Iha Jesus nia naran, ami harohan. Amén.”
🙏 MAROMAK FO BENSAUN🙏🏻
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
