Maromak sei halo buat foun

Lalika hanoin buat uluk sira nee, no lalika hanoin buat nebee iha tempu antigu. Tebes, Hau sei halo buat foun; agora buat nee mosu mai, imi sei la hatene ka? Hau sei halo dalan iha rai fuik, no mota sira iha rai maran. Isaias 43:18-19 BK

Iha ita-nia moris, fasil ba ita atu hanoin no rai kona-ba sala sira ne'ebé ita halo iha tempu uluk, oportunidade sira ne'ebé ita lakon, laran kanek sira ne'ebé akontese iha pasadu, etc. Isaias 43:18-19 fó-hanoin ba ita atu haluha buat ne'ebé akontese iha pasadu. Maromak konvida ita atu hein ho esperansa no espetativa ba futuru. Nia hatete: "Hanoin to'ok kona-ba buat uluk nian, la'ós tanba buat sira-ne'e la problema, maibé tanba buat sira-ne'e la define saida mak Maromak sei halo ba ita.

Maromak ko'alia liafuan sira-ne'e ba ema Izrael iha tempu dadur no susar oioin. Maski nune'e, Maromak hatete katak buat foun sei mai daudaun, ne'e mak buat ida-ne'ebé ita la espera. Dalan ida iha rai-fuik, mota iha iha rai-fuik maran, ne'e mak imajen kona-ba transformasaun no restaurasaun ne'ebé Maromak sei halo ba ema fiar nain sira. Maski iha fatin ne'ebé aat liu iha ita-nia moris, Maromak promete katak nia sei kria dalan, fo solusaun no fo moris.

Versikulu ida dezafia ita atu fiar katak Maromak sempre serbisu iha ita-nia moris, maski ita seidauk haree evidénsia sira. Versikulu ne'e husu ita atu husik tiha buat ne'ebé iha kotuk atu nune'e ita bele kaer metin buat ne'ebé sei akontese iha futuru. Buat foun ne'ebé Maromak halo sei di'ak liu, karik ita hakarak tau fiar tomak ba Maromak. Tamba ba Maromak la iha buat ida mak imposivél, Maromak nia serbisu sempre di'ak. 

Ohin loron, halo to'ok reflesaun no husu ba ita-nia an: buat saida iha pasadu mak ita kaer metin hela to'o agora no Maromak husu atu husik? No iha ne'ebé mak Maromak bele halo buat foun iha ita-nia moris, agora?

Orasaun: 

Nai, ajuda ha'u atu husik buat ne'ebé iha kotuk no loke ha'u-nia laran ba buat foun ne'ebé Ita halo daudaun. Fó matan mai ha'u atu haree Ita-nia obra sira no fiar ba ita boot. Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Saudades atu fila ba uma

Nunee mak Nai sei sai Liurai ba mundu tomak. Iha loron nebaa, Nai sei ida deit no Nia naran sei ida deit. Zakarias 14:9 BK 

Iha tempu ne'ebá, ema Izrael sira sai dadur iha Babilonia. Bainhira sira dadur hela, iha tinan 70 nia rohan, profeta Zacarias hakerek livru istória, mehi, no vizaun sira kona-ba nasaun Izrael ne'ebé iha terus laran, hodi dezafia sira atu fiél nafatin ba sira-nia aliansa ho Maromak no atu fó esperansa ba Maromak nia Ukun iha futuru. 

Saudades atu fila ba hela iha ita-nia rai moris fatin mak hanesan buat ne'ebé ita hakarak tebes bainhira ita hela iha ema-nia rain. Uma la'ós de'it fatin fíziku de'it, maibé ida-ne'e mak halo ema sente komfortu, iha familiaridade, no sentimentu partensi ba. 

Zecarias 14: 9 mak resposta ba sira-nia saudades ne'e: "Nunee mak Nai sei sai Liurai ba mundu tomak. Iha loron nebaa, Nai sei ida deit no Nia naran sei ida deit" Zakarias 14:9 BK 

Maizumenus iha tinan 70 nia rohan, profeta Zacarias hakerek karta ba nasaun ida-ne'ebé nakonu ho susar atu fó-hanoin sira kona-ba Maromak nia laran-di'ak, atu sira fiél nafatin ba Maromak, no atu fó esperansa ba Maromak nia Ukun ne'ebé sei mai. 

Hanoin to'ok kona-ba nasaun ida-ne'ebé sai husi sira-nia rai ba tinan 70 nia laran, hasoru dúvida no inserteza kona-ba sira-nia futuru. Profeta Zakaria Ninia lia-fuan la'os de'it istória, maibé kona-ba destinu sira-nia moris ba oin, buat ne'ebé nia hatete ne'e fó-hanoin ba sira ne'ebé sai dadur hela katak sira-nia viajen sei to'o ninia rohan. Liafuan sira-ne'e hatudu Maromak nia restaurasaun, imajen ba Maromak Ninia ukun iha futuru. 

Ohin loron, karik ita sente dook husi Maromak Nia hakarak ka dook hosi Maromak Ninia promesa ba ita-nia moris. Karik ita saudades atu hetan komfortu, profeta Zacarias nia korajen sei vale, to'o ohin loron iha ita-nia tempu. Maromak Nia laran-di'ak no laran-metin nunka para, no Maromak promete ona ba ninia ema sira ne'ebé fiar ba Nia katak loron ida Nia sei lori sira ba lalehan iha ne'ebé Maromak mak ukun (Apokalipse 21). 

Ita bele tau fiar ba Maromak nia Ukun iha futuru. Ita-nia uma la dook, besik ona!

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Esperansa iha tempu susar laran

"Tanba saa mak o tristi, Oh hau nia klamar Tanba saa mak o susar iha hau nia laran? Hein iha Maromak, tanba hau sei hahii fila fali Nia, hau nia salvasaun no hau nia Maromak" Salmu 42:11 BK

Iha ita-nia moris iha tempu triste, susar, konfuzaun, no hein buat ruma ne'ebé la serteza, bainhira ita senti todan no senti dook hosi Maromak. Salmu 42: 11 ko'alia kona-ba situasaun hanesan ne'e. Autór salmu hatete ho momoos kona-ba ninia kondisaun moris nian. Nia sente laran-tun no la hakmatek. Maibé nia la hela iha situasaun ne'ebá. Nia ko'alia ba ninia an. Nia fó mandamentu ba ninia an: "Tau ó-nia esperansa ba Maromak." 

Versíkulu ne'e fó-hanoin ita katak iha fé la signifika livre hosi luta ba moris nian, maibé fé mak hili atu fiar nafatin mesmu iha terus nia laran. Salmista la nega ninia terus, maibé nia intrega ba Maromak no tau nia esperansa ba Maromak. Ida ne'e mak esensi hosi fé ne'ebé maduru: aprende atu hahii Maromak bainhira ita hein, aprende atu hahi'i maski resposta ba orasaun sira la mai lalais. 

Liafuan "maski nune'e Hau sei hahii Nia" mak deklarasaun ba fé nian. Nia hatete: "Hau la sente kontente agora, maibé ha'u sei sente kontente fali. Ha'u sei hahii Nia nafatin". Tipu esperansa ida ne'e, kaer metin ba Maromak Ninia karakter ne'ebé nunka muda". Nia sei nafatin ita-nia Salvador. Nia sei nafatin ita-nia Maromak. 

Kuandu ita sente katak ita-nia moris terus liu ona, ko'alia ba ita-nia an hanesan Salmista ne'e. Keta husik Ita-nia sentimentu determina ita-nia fé, pelu kontrariu biarba ita-nia fé mak determina ita-nia sentimentu.  

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More