Arma Maromak Nian Mak Fó Forsa

Tanba ami-nia armas funu nian la mai hosi isin, maibé armas ne'e iha kbiit hosi Maromak atu sobu fortaleza sira. 2 Korinto 10:4

                           2 Korinto 10:4

Bainhira ita hasoru problema boot, ita halo saida? Ita tenta rezolve ho ita-nia forsa rasik? Ka ita husu ajuda hosi Maromak?

Ita hotu iha luta iha moris. Maibé luta hotu la bele rezolve ho osan, pozisaun, forsa fiziku ka liafuan. Iha luta ida ne’ebé akontese iha ita-nia hanoin no laran: luta kontra tentasaun, frakeza, odi vingansa, orgullu, laran-moras ba ema no hanoin aat.

2 Koríntiu 10:4 hanorin ita katak ita-nia arma la’ós arma ema nian. Ita presiza arma ne’ebé mai hosi Maromak, tanba arma ne’e iha poder.

Arma Maromak nian

Bainhira ema ko’alia aat ba ita, ita mós hakarak hatán ho lia-fuan aat. Bainhira ema halo sala ba ita, ita mós hakarak vingansa. Maibé Jesus hanorin dalan diferente.

Roma 12:21 dehan:

Keta husik hahalok aat manaan imi, maibee manaan hahalok aat ho hahalok diak. Roma 12:21

Ita la manán ho odi, maibé ho domin. Ita la manán ho vingansa, maibé ho perdaun. Ita la manán ho liafuan aat, maibé ho liafuan di’ak.

Orasaun mak arma ida. Bainhira ita hasoru problema, antes ko’alia ho ema, ko’alia ho Maromak. Filipe 4:6–7 hanorin ita atu lori ita-nia preokupasaun ba Maromak liuhosi orasaun.

Ita bele dehan: “Maromak, hau hirus. Ajuda hau atu la hatán ho luan maka'as. Fó hau pas no sabedoria atu halo buat ne’ebé loos.”

Orasaun la’ós sinal fraqueza. Orasaun mak dalan atu simu Maromak nia forsa.

Bíblia mós mak arma ida. Jesus uza Liafuan Maromak nian bainhira Satanás tenta Nia iha rai-fuik. Iha Mateus 4, Jesus hatán: “Hakerek nanis ona…”

Ita mos bele uza Bíblia bainhira tentasaun mai. Liafuan Maromak nian bele muda ita-nia hanoin no ita-nia hahalok.

Luta boot hahú iha ita-nia hanoin

Dala ruma ita dehan:

“Hau la bele.”

“Ema hotu kontra hau.”

“Hau tenke halo vingansa.”

Hanoin hirak ne’e bele sai hanesan forsa ida iha ita-nia laran. Maibé 2 Koríntiu 10:5 bolu ita atu lori ita-nia hanoin hotu atu obedese Kristu.

Entaun, bainhira iha hanoin ida mosu mai, husu ba ita-niaan: “Serake hanoin ne’e tuir Jesus nia hanorin?”

Troka hanoin ne'ebé dehan “Hau la bele” ho “Ho Maromak, hau bele.”

Troka hanoin ne'ebé dehan “Hau tenke halo vingansa” ho “Hau sei intrega de'it ba Maromak.”

Troka hanoin ne'ebé dehan “Hau la iha esperansa” ho “Maromak sei hamutuk ho hau.”

Komesa ohin

Bainhira problema mai, harohan uluk.

Bainhira tentasaun mai, hanoin Liafuan Maromak nian.

Bainhira laran hirus mai, para lai antes ko’alia.

Bainhira ema halo aat ba ita, husu Jesus atu fó pas no domin.

Maun-alin sira, ita la presiza luta ho ita-nia forsa rasik. Ita-nia problema bele boot, maibé Maromak boot liu. Ita-nia tentasaun bele forte, maibé Maromak nia poder forte liu.

Ohin, hili atu la depende de’it ba ita-nia forsa. Lori ita-nia luta ba Maromak. Harohan. Lee Bíblia. Fiar. No obedese.

Labele husik forsa nakukun manán ita. Labele husik frakeza manán ita. Husik Jesus manán iha ita-nia laran.

Tanba arma ita-nia luta la’ós arma ema nian; arma ne’e hosi Maromak no iha poder. 🙏

🙏 MAROMAK FO BENSAUN🙏🏻

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

Maluk sira ne'ebé Kristu hadomi, 

Ami konvida ita-boot sira atu like, share no follow pájina Dalan ba Lalehan. Ami-nia misaun mak atu fahe Maromak Nia Liafuan ho língua ne'ebé simples no fasil atu nune'e ema hotu bele komprende mensajen salvasaun nian liuhusi Jesus Kristu

Favór like, follow, no share pájina ida ne'e ba ita-nia família no kolega sira. Atu nune'e, bele ajuda habelar lia-loos husi Maromak no tau esperansa ba ema hotu iha mundu tomak. 

Obrigadu ba imi-nia suporta. Ha'u espera katak Maromak sei haraik bénsaun barak ba imi bainhira ita halo viajen espirituál hamutuk iha dalan ba lalehan. 

 Like • Follow • Share • Maromak fo bensaun! 🙏📖✨

Read More

Mensajen hosi Maromak

Lee : João 3:16

                            João 3:16

Tanba Maromak hadomi tebes mundu, to'o Nia fó Ninia Oan Mane mesak, atu ema hotu ne'ebé fiar ba Nia sei la lakon, maibé sei hetan moris rohan laek. João 3:16

Bainhira ita hadomi ema ida, oinsa ita hatudu domin ba ema ne’e ? Ita bele dehan de’it, “Hau hadomi ó,” ka ita halo buat ruma atu ajuda no fó haksolok ba ema ne’e?

João 3:16 fó resposta ida ne’ebé boot tebes: Maromak hadomi mundu, no tanba Nia hadomi, Nia fó. Nia fó Ninia Oan Mane mesak atu salva ita.

Liafuan “hadomi” no “fó” iha versu ida-ne’e lao hamutuk. Domin loos la’ós de’it liafuan. Domin loos hatudu an liuhosi buat ne’ebé ita prontu atu fó ba ema seluk.

Jesus hatudu domin liuhosi fó Ninia an

João 15:13 dehan katak domin boot liu mak bainhira ema ida fó nia moris ba nia belun. Jesus halo buat ne’e duni. Nia fó Nia moris ba ita.

Efésiu 5:2 dehan katak Kristu hadomi ita no fó an ba ita. Versu 25 hosi Galasia 5 mós hatudu katak Kristu hadomi igreja no fó an ba igreja.

Galasia 2:20 dehan katak Jesus hadomi ita no fó an ba ita.

1 João 3:16 mós hatudu ba ita katak ita hatene domin tanba Jesus fó Nia moris ba ita.

Entaun, versu sira-ne’e hotu iha mensajen ida ne’ebé klaru:

Maromak Nia domin mak domin ne’ebé Nia fó.

Jesus la dehan de’it, “Hau hadomi imi.” Nia hatudu domin liuhosi fó Nia vida, Nia servisu, Nia sakrifísiu no Nia mate iha krús atu soi ita.

Saida mak ita bele aprende?

Bainhira ita simu Jesus Nia domin, ita mós aprende atu fó.

Maibé fó la’ós de’it kona-ba osan.

Ita bele fó ita-nia tempu ba ema ne’ebé presiza ko’alia.

Ita bele fó ita-nia forsa atu ajuda ema ida ne’ebé la bele halo nia servisu.

Ita bele fó hahán ba família ida ne’ebé falta.

Ita bele fó osan ba ema ne’ebé presiza, tuir ita-nia kapasidade.

Ita bele fó ita-nia talentu hodi serbí Maromak iha igreja.

Ita bele fó liafuan di’ak ba ema ida ne’ebé triste.

Ita bele fó perdaun ba ema ne’ebé halo sala hasoru ita.

Buat sira ne’e bele haree ki’ik, maibé bainhira ita halo ho domin, sira iha folin boot iha Maromak Nia matan.

Iha família, ita bele komesa hosi buat ki’ik

Hanoin to'ok kona-ba inan-aman. Bainhira sira kole, ita bele ajuda halo servisu iha uma, la hein sira husu.

Hanoin kona-ba oan. Karik oan ida presiza tempu no atensaun. Ita bele tuur hamutuk ho nia no rona nia istória.

Hanoin kona-ba vizinhu. Se nia moras, ita bele vizita. Se nia falta hahán, ita bele fahe buat ne’ebé ita iha.

Hanoin kona-ba igreja. Karik igreja presiza ema atu ajuda arruma fatin, vizita ema moras, ajuda labarik, ka fahe liafuan Maromak nian. Ita bele fó ita-nia tempu no talentu.

Ne’e mak domin ne’ebé ema bele haree.

Ita bele aprende “linguajen lalehan”

Ita bele dehan katak “linguajen lalehan” mak domin no fó.

Maromak fó Ninia Oan ba ita.

Jesus fó Nia moris ba ita.

Agora Jesus bolu ita atu fó ita-an ba ema seluk.

Ida ne'e la signifika katak ita tenke fó buat hotu ne’ebé ita iha to’o ita rasik la iha. Maibé signifika katak ita la moris de’it ba ita-nia an. Ita husu ba Maromak iha orasaun: “Maromak, hosi buat ne’ebé Ita fó mai hau, saida mak hau bele fahe ho ema seluk ohin?”

Karik resposta mak tempu.

Karik ajuda.

Karik hahán.

Karik osan.

Karik talentu.

Karik liafuan korajen ida ne’ebé fó esperansa.

Hahú hosi buat ki’ik. Domin ne’ebé loos sempre bele hahú hosi buat ki’ik.

Ita la presiza hein sai riku atu fó. Ita la presiza hein sai importante atu serbí. Ita la presiza hein ema husu atu ajuda.

Haree ba Jesus. Nia fó an uluk ba ita. Agora ita bele hatudu ita-nia domin ba Nia liuhosi maneira ita trata no ajuda ema seluk.

Dalan ba Lalehan mak aprende hosi Jesus atu hadomi ho asaun, la’ós ho liafuan de’it. Maromak hadomi ita no fó Ninia Oan ba ita. Jesus hadomi ita no fó Nia moris ba ita. Agora, ita mós bele aprende atu fó ita-nia tempu, forsa, sasán, talentu no domin ba ema seluk. 🙏

🙏 MAROMAK FO BENSAUN🙏🏻

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com#AllThingsNew

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Lia-loos Sei Liberta Ita

No imi sei hatene lia loos, no lia loos sei halo imi livre. João 8:32

                                    João 8:32

Serake Ita gosta livre ka liberdade? Ita hakarak bele lao ba ne’ebé ita hakarak, ko’alia ho liberdade no halo desizaun rasik. Maibé Jesus ko’alia kona-ba liberdade ida ne’ebé liu fali liberdade atu halo buat hotu ne’ebé ita hakarak.

Jesus dehan: “No imi sei hatene lia loos, no lia loos sei halo imi livre." João 8:32

Saida mak Jesus hakarak dehan?

Lia-loos ka Verdade ne’ebé Jesus ko’alia kona-ba saida?

Lia-loos mak Maromak nia liafuan no Jesus rasik. Jesus dehan iha João 14:6, “Hau mak dalan, lia-loos no moris.”

Bainhira ita hatene Jesus no tuir Nia liafuan, ita komesa haree klaru kona-ba saida mak loos no sala.

Ezemplu, ema bele dehan, “Bosok ki’ik la problema.” Maibé Bíblia hanorin ita atu ko’alia lialos.

Ema bele dehan, “Se ema halo aat ba ita, ita tenke baku.” Maibé Jesus hanorin ita atu perdua.

Ema bele dehan, “Osan no sasán mak buat importante liu.” Maibé Jesus hanorin ita atu tau Maromak uluk iha buat hotu.

Lia-loos Maromak nian ajuda ita atu hili dalan ne’ebé loos.

Lia-loos bele liberta ita hosi saida?

Ita bele sai atan ba buat barak: bosok, ódiu, inveja ka laran-morasbaema, osan, alkohol, tabaku, pornografia, liafuan aat, sai hirus, ka hahalok sala seluk.

Bainhira ita halo sala dala barak ona, ita sente katak ita la bele muda ona. Ita bele dehan, “Hau-nia natureza hanesan ne’e. Hau la bele muda.”

Maibé Jesus dehan katak lia-loos bele halo ita livre.

Ezemplu, se ema ida toman ka acostuma atu bosok, nia bele komesa hili atu ko’alia lia-loos. Se nia halo sala, nia bele husu deskulpa. Se nia iha laran hirus ba ema ida, nia bele husu Jesus ajuda nia atu perdua.

Liberdade la signifika katak ita nunka hetan tentasaun. Liberdade signifika katak tentasaun la presiza kontrola ita tan. Ho Jesus nia ajuda, ita bele dehan “lae” ba buat ne’ebé sala.

Oinsá ita bele hatene lia-loos?

Ita tenke lee Bíblia no aprende hosi Jesus.

Ezemplu simples: se ita lee Bíblia dadeer minutu 10, ita bele husu:

“Jesus, saida mak Ita hakarak hau aprende ohin?”

Depois, bainhira ita hasoru situasaun durante itania atividade loron-loronnian, lembra buat ne’ebé ita lee.

Iha uma, se ita hakarak hirus, lembra Jesus nia liafuan.

Iha servisu, se ema tenta ita atu bosok, lembra lia-loos.

Iha negósiu, se ita bele hili entre hetan osan ho maneira sala ka halo buat loos ho osan menus, hili buat loos.

Iha igreja, se ema halo sala hasoru ita, la espalha nia sala ba ema seluk. Ko’alia ho domin no buka dalan atu rezolve problema.

Bíblia la’ós de’it livru atu lee. Nia mak Maromak Nia liafuan atu ajuda ita moris.

Lia-loos ka verdade tenke sai ita-nia karakter

Ita bele hatene Bíblia barak, maibé se ita la pratika, ita sei la hetan benefísiu tomak.

Ezemplu: Ita bele hatene katak “perdua” mak buat loos. Maibé bainhira ema halo sala hasoru ita, ita tenke pratika perdáun.

Ita bele hatene katak “hadomi ita-nia maluk” mak Jesus Ninia mandamentu. Tan ne'e bainhira ema ne’ebé ita la gosta presiza ajuda, ita bele ajuda nia.

Ita bele hatene katak “la bosok” mak loos. Maibé bainhira bosok bele fó vantajen ba ita, ita tenke hili verdade.

Ne’e mak liberdade ne’ebé Jesus fó: ita la moris tanba presiza tuir ita-nia hakarak hotu; ita livre atu hili buat ne’ebé loos.

Entaun, ohin, ita bele hahú ho pergunta simples ida:

“Iha buat saida mak hau presiza husik atu Jesus bele halo hau livre?”

Karik ita presiza husik hagalok hirus-teen. Karik ita presiza para bosok. Karik ita presiza husik hábito ida ne’ebé aat. Karik ita presiza husu ema ida nia deskulpa.

La presiza muda buat hotu iha loron ida. Hahú ho pasu ida ho Jesus. Lee Nia liafuan, halo tuir Nia, no husu Nia ajuda kada loron.

Dalan ba Lalehan mak dalan verdade nian. Bainhira ita hatene Jesus, ita hatene verdade; no bainhira ita tuir verdade, ita sai livre hosi buat ne’ebé halo ita dook hosi Maromak. Jesus la hakarak ita moris iha bandeira sala; Nia hakarak ita moris livre, ho laran dame no esperansa.

🙏 MAROMAK FO BENSAUN🙏🏻

Click iha ne'e atu Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

hopechanneltimorleste, AWRTimoLeste

dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More