Se ita servi Maromak, tansá ita presiza kompete ba malu?

Leitura Bíblia: 2 Koríntiu 10:12–18

                          2 Koríntiu 10:17

Iha igreja, dala ruma ita haree ema kompara-an ho ema seluk: “Ema ida-ne’e prega di’ak liu hau.” “Grupu ida-ne’e iha membru barak liu.” “Hau halo servisu barak liu nia.” “Tansá ema la agradese hau?”

Kompetisaun hanesan ne’e bele tama mós iha lider no membru igreja. Maibé Paulo fó avizu importante iha 2 Koríntiu 10:12–18. Nia hatudu katak ita la presiza kompara-an ho ema seluk. Ita tenke haree ba Maromak Nia medida, la’ós ema nia medida.

Tansá Kompetisaun Fasil Tama Iha Ita-nia Igreja?

Tanba ita ema. Ita hakarak ema apresia ita. Ita hakarak ema haree ita-nia servisu. Ita hakarak rona: “Ita di’ak liu,” ka “Ita halo servisu barak liu.”

Maibé bainhira ita komesa kompara-an ho ema seluk, ita bele haluha katak servisu ne’e la’ós ita-nian; servisu ne’e Maromak nian.

Hanoin kona-ba igreja hanesan isin ida. Ita-nia liman no ain la kompete ba malu. Liman la dehan, “Hau importante liu ain.” Hotu-hotu servisu hamutuk atu ajuda isin.

Iha igreja mos hanesan ne’e. Pastor, ansiaun, diákonu, mestri sira, jovem, labarik, no membru hotu-hotu iha knaar diferente. Objetivu la’ós atu sai boot liu ema seluk, maibé atu ajuda ema sira atu koñese Jesus.

Oinsá Ita Bele Evita Kompetisaun?

Primeiru, la kompara ita-nia servisu ho ema seluk. Se ema seluk halo buat di’ak, haksolok no agradese Maromak. La presiza sente katak nia foti ita-nia pozisaun.

Daruak, fó louvor ba ema seluk. Se membru ida prega di’ak liu, dehan, “Agradese ba Maromak tanba ita-nia pregasaun ne'ebé kapaz.” Se jovem ida halo programa di’ak, enkoraja nia.

Datoluk, haree ba objetivu, la’ós ba naran. Pergunta: “Serake servisu ne’e lori ema ba Jesus?” Se resposta “sin,” entaun ita hotu iha razaun atu haksolok.

Ikusmai, Paulo dehan katak ema ne’ebé aprovadu la’ós ema ne’ebé foti an, maibé ema ne’ebé Maromak aprova (2 Koríntiu 10:18).

Entaun, bainhira ita serbí iha igreja, la presiza buka atu sai númeru um. La presiza atu ema dehan ita boot liu. Ita-nia objetivu simples de’it:

“Maromak, uza hau atu ajuda ema seluk no lori sira besik ba Ita.”

Bainhira ita servisu ho hanoin ida-ne’e, kompetisaun sei lakon no unidade sei aumenta.

Dalan ba Lalehan la’ós kompetisaun atu haree sé mak boot liu. Dalan ba Lalehan mak servisu hamutuk ho Jesus, ho humildade, atu lori ema barak liu ba Maromak nia Reino.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Arma Maromak Nian Mak Fó Forsa

Tanba ami-nia armas funu nian la mai hosi isin, maibé armas ne'e iha kbiit hosi Maromak atu sobu fortaleza sira. 2 Korinto 10:4

                           2 Korinto 10:4

Bainhira ita hasoru problema boot, ita halo saida? Ita tenta rezolve ho ita-nia forsa rasik? Ka ita husu ajuda hosi Maromak?

Ita hotu iha luta iha moris. Maibé luta hotu la bele rezolve ho osan, pozisaun, forsa fiziku ka liafuan. Iha luta ida ne’ebé akontese iha ita-nia hanoin no laran: luta kontra tentasaun, frakeza, odi vingansa, orgullu, laran-moras ba ema no hanoin aat.

2 Koríntiu 10:4 hanorin ita katak ita-nia arma la’ós arma ema nian. Ita presiza arma ne’ebé mai hosi Maromak, tanba arma ne’e iha poder.

Arma Maromak nian

Bainhira ema ko’alia aat ba ita, ita mós hakarak hatán ho lia-fuan aat. Bainhira ema halo sala ba ita, ita mós hakarak vingansa. Maibé Jesus hanorin dalan diferente.

Roma 12:21 dehan:

Keta husik hahalok aat manaan imi, maibee manaan hahalok aat ho hahalok diak. Roma 12:21

Ita la manán ho odi, maibé ho domin. Ita la manán ho vingansa, maibé ho perdaun. Ita la manán ho liafuan aat, maibé ho liafuan di’ak.

Orasaun mak arma ida. Bainhira ita hasoru problema, antes ko’alia ho ema, ko’alia ho Maromak. Filipe 4:6–7 hanorin ita atu lori ita-nia preokupasaun ba Maromak liuhosi orasaun.

Ita bele dehan: “Maromak, hau hirus. Ajuda hau atu la hatán ho luan maka'as. Fó hau pas no sabedoria atu halo buat ne’ebé loos.”

Orasaun la’ós sinal fraqueza. Orasaun mak dalan atu simu Maromak nia forsa.

Bíblia mós mak arma ida. Jesus uza Liafuan Maromak nian bainhira Satanás tenta Nia iha rai-fuik. Iha Mateus 4, Jesus hatán: “Hakerek nanis ona…”

Ita mos bele uza Bíblia bainhira tentasaun mai. Liafuan Maromak nian bele muda ita-nia hanoin no ita-nia hahalok.

Luta boot hahú iha ita-nia hanoin

Dala ruma ita dehan:

“Hau la bele.”

“Ema hotu kontra hau.”

“Hau tenke halo vingansa.”

Hanoin hirak ne’e bele sai hanesan forsa ida iha ita-nia laran. Maibé 2 Koríntiu 10:5 bolu ita atu lori ita-nia hanoin hotu atu obedese Kristu.

Entaun, bainhira iha hanoin ida mosu mai, husu ba ita-niaan: “Serake hanoin ne’e tuir Jesus nia hanorin?”

Troka hanoin ne'ebé dehan “Hau la bele” ho “Ho Maromak, hau bele.”

Troka hanoin ne'ebé dehan “Hau tenke halo vingansa” ho “Hau sei intrega de'it ba Maromak.”

Troka hanoin ne'ebé dehan “Hau la iha esperansa” ho “Maromak sei hamutuk ho hau.”

Komesa ohin

Bainhira problema mai, harohan uluk.

Bainhira tentasaun mai, hanoin Liafuan Maromak nian.

Bainhira laran hirus mai, para lai antes ko’alia.

Bainhira ema halo aat ba ita, husu Jesus atu fó pas no domin.

Maun-alin sira, ita la presiza luta ho ita-nia forsa rasik. Ita-nia problema bele boot, maibé Maromak boot liu. Ita-nia tentasaun bele forte, maibé Maromak nia poder forte liu.

Ohin, hili atu la depende de’it ba ita-nia forsa. Lori ita-nia luta ba Maromak. Harohan. Lee Bíblia. Fiar. No obedese.

Labele husik forsa nakukun manán ita. Labele husik frakeza manán ita. Husik Jesus manán iha ita-nia laran.

Tanba arma ita-nia luta la’ós arma ema nian; arma ne’e hosi Maromak no iha poder. 🙏

🙏 MAROMAK FO BENSAUN🙏🏻

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

Maluk sira ne'ebé Kristu hadomi, 

Ami konvida ita-boot sira atu like, share no follow pájina Dalan ba Lalehan. Ami-nia misaun mak atu fahe Maromak Nia Liafuan ho língua ne'ebé simples no fasil atu nune'e ema hotu bele komprende mensajen salvasaun nian liuhusi Jesus Kristu

Favór like, follow, no share pájina ida ne'e ba ita-nia família no kolega sira. Atu nune'e, bele ajuda habelar lia-loos husi Maromak no tau esperansa ba ema hotu iha mundu tomak. 

Obrigadu ba imi-nia suporta. Ha'u espera katak Maromak sei haraik bénsaun barak ba imi bainhira ita halo viajen espirituál hamutuk iha dalan ba lalehan. 

 Like • Follow • Share • Maromak fo bensaun! 🙏📖✨

Read More

Mensajen hosi Maromak

Lee : João 3:16

                            João 3:16

Tanba Maromak hadomi tebes mundu, to'o Nia fó Ninia Oan Mane mesak, atu ema hotu ne'ebé fiar ba Nia sei la lakon, maibé sei hetan moris rohan laek. João 3:16

Bainhira ita hadomi ema ida, oinsa ita hatudu domin ba ema ne’e ? Ita bele dehan de’it, “Hau hadomi ó,” ka ita halo buat ruma atu ajuda no fó haksolok ba ema ne’e?

João 3:16 fó resposta ida ne’ebé boot tebes: Maromak hadomi mundu, no tanba Nia hadomi, Nia fó. Nia fó Ninia Oan Mane mesak atu salva ita.

Liafuan “hadomi” no “fó” iha versu ida-ne’e lao hamutuk. Domin loos la’ós de’it liafuan. Domin loos hatudu an liuhosi buat ne’ebé ita prontu atu fó ba ema seluk.

Jesus hatudu domin liuhosi fó Ninia an

João 15:13 dehan katak domin boot liu mak bainhira ema ida fó nia moris ba nia belun. Jesus halo buat ne’e duni. Nia fó Nia moris ba ita.

Efésiu 5:2 dehan katak Kristu hadomi ita no fó an ba ita. Versu 25 hosi Galasia 5 mós hatudu katak Kristu hadomi igreja no fó an ba igreja.

Galasia 2:20 dehan katak Jesus hadomi ita no fó an ba ita.

1 João 3:16 mós hatudu ba ita katak ita hatene domin tanba Jesus fó Nia moris ba ita.

Entaun, versu sira-ne’e hotu iha mensajen ida ne’ebé klaru:

Maromak Nia domin mak domin ne’ebé Nia fó.

Jesus la dehan de’it, “Hau hadomi imi.” Nia hatudu domin liuhosi fó Nia vida, Nia servisu, Nia sakrifísiu no Nia mate iha krús atu soi ita.

Saida mak ita bele aprende?

Bainhira ita simu Jesus Nia domin, ita mós aprende atu fó.

Maibé fó la’ós de’it kona-ba osan.

Ita bele fó ita-nia tempu ba ema ne’ebé presiza ko’alia.

Ita bele fó ita-nia forsa atu ajuda ema ida ne’ebé la bele halo nia servisu.

Ita bele fó hahán ba família ida ne’ebé falta.

Ita bele fó osan ba ema ne’ebé presiza, tuir ita-nia kapasidade.

Ita bele fó ita-nia talentu hodi serbí Maromak iha igreja.

Ita bele fó liafuan di’ak ba ema ida ne’ebé triste.

Ita bele fó perdaun ba ema ne’ebé halo sala hasoru ita.

Buat sira ne’e bele haree ki’ik, maibé bainhira ita halo ho domin, sira iha folin boot iha Maromak Nia matan.

Iha família, ita bele komesa hosi buat ki’ik

Hanoin to'ok kona-ba inan-aman. Bainhira sira kole, ita bele ajuda halo servisu iha uma, la hein sira husu.

Hanoin kona-ba oan. Karik oan ida presiza tempu no atensaun. Ita bele tuur hamutuk ho nia no rona nia istória.

Hanoin kona-ba vizinhu. Se nia moras, ita bele vizita. Se nia falta hahán, ita bele fahe buat ne’ebé ita iha.

Hanoin kona-ba igreja. Karik igreja presiza ema atu ajuda arruma fatin, vizita ema moras, ajuda labarik, ka fahe liafuan Maromak nian. Ita bele fó ita-nia tempu no talentu.

Ne’e mak domin ne’ebé ema bele haree.

Ita bele aprende “linguajen lalehan”

Ita bele dehan katak “linguajen lalehan” mak domin no fó.

Maromak fó Ninia Oan ba ita.

Jesus fó Nia moris ba ita.

Agora Jesus bolu ita atu fó ita-an ba ema seluk.

Ida ne'e la signifika katak ita tenke fó buat hotu ne’ebé ita iha to’o ita rasik la iha. Maibé signifika katak ita la moris de’it ba ita-nia an. Ita husu ba Maromak iha orasaun: “Maromak, hosi buat ne’ebé Ita fó mai hau, saida mak hau bele fahe ho ema seluk ohin?”

Karik resposta mak tempu.

Karik ajuda.

Karik hahán.

Karik osan.

Karik talentu.

Karik liafuan korajen ida ne’ebé fó esperansa.

Hahú hosi buat ki’ik. Domin ne’ebé loos sempre bele hahú hosi buat ki’ik.

Ita la presiza hein sai riku atu fó. Ita la presiza hein sai importante atu serbí. Ita la presiza hein ema husu atu ajuda.

Haree ba Jesus. Nia fó an uluk ba ita. Agora ita bele hatudu ita-nia domin ba Nia liuhosi maneira ita trata no ajuda ema seluk.

Dalan ba Lalehan mak aprende hosi Jesus atu hadomi ho asaun, la’ós ho liafuan de’it. Maromak hadomi ita no fó Ninia Oan ba ita. Jesus hadomi ita no fó Nia moris ba ita. Agora, ita mós bele aprende atu fó ita-nia tempu, forsa, sasán, talentu no domin ba ema seluk. 🙏

🙏 MAROMAK FO BENSAUN🙏🏻

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com#AllThingsNew

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More