Textu Bíbliku: 2 Korinto 11:4
Tanba se ema ida mai no haklaken Jesus oin seluk ne'ebé ami la haklaken, ka se imi simu espíritu ne'ebé la hanesan ida ne'ebé imi simu ona, ka se imi simu ‘evanjellu’ ne'ebé la hanesan ida ne'ebé imi simu ona, labele simu sira-nia hanorin. 2 Korinto 11:4
Hanoin ba loron ohin:
Iha mundu ohin loron, ita rona liafuan barak kona-ba Maromak.
Iha ema barak ko’alia kona-ba Jesus. Iha ema barak hanorin kona-ba Bíblia. Iha mensajen barak iha igreja, rádio, televizaun, Facebook, YouTube no TikTok.
Maibé pergunta ida importante mak:
“Liafuan ne’e loos duni tuir Bíblia ka lae?”
Paulo hakerek ba igreja iha Korinto tanba iha ema balu mai no hanorin buat diferente kona-ba Jesus. Ema sira bele ko’alia ho lian furak no konviniente, maibé mensajen sira ne'e la hanesan ho evangelhu ne’ebé sira simu hosi Paulo.
Tanba ne’e, Paulo aviza ba sira atu la simu hanorin ka dutrina hotu-hotu ho fasil.
Ezemplu simples
Hanoin katak ema ida ba merkadu atu sosa fini atu kuda. Vendedor ida dehan:
“Fini ne’e di’ak tebes. Kuda de’it, sei fó rezultadu barak.”
Ema ne’e la sosa kedas. Nia haree didi'ak fini ne'e, husu ema seluk, no haree serake fini ne’e loos duni tuir saida mak vendedor ko'alia.
Tanba se nia kuda fini sala, rezultadu mós sei sala hotu.
Hanesan mós ho ita-nia vida espirituál.
Se ita simu hanorin sala kona-ba Jesus, ita bele tuir dalan sala. Tanba ne’e, ita presiza testa buat ne’ebé ita rona ho Bíblia.
Oinsá atu proteje ita-nia an hosi dutrina ne'ebé sala?
1. Lee Bíblia rasik.
La depende de’it ba buat ne’ebé ema seluk dehan. Lee Bíblia kada loron, maski versu balu de’it.
2. Haree se hanorin ne’e tuir Bíblia.
Bainhira ema dehan, “Bíblia dehan hanesan ne’e,” buka versu no lee nia konteúdu rasik.
3. La fiar de'it tanba ema ko’alia furak.
Ema bele ko’alia ho lian furak ne'ebé konviniente, maski ema ne'e famozu ka populer, ka iha ema barak ne'ebé tuir nia. Maibé ita tenki haree serake nia mensajen tuir Palavra Maromak nian.
4. Husu Espíritu Santu atu guia ita.
Antes lee ka rona hanorin ida, halo orasaun:
“Maromak, ajuda hau atu komprende Ita-nia Palavra no hatene saida mak loos.”
5. Haree ba Jesus iha Bíblia.
Jesus hanorin kona-ba domin, laran-sadi'a, obediénsia, humildade no fiar ba Maromak. Evanjellu loos sei lori ita besik liután ba Jesus, la’ós ba ema.
Atensaun ba tempu ohin
Ita bele simu mensajen espirituál ida iha telemóvel iha tempu balu de’it. Ita haree títulu no hanoin, “Ne’e tenki loos tanba ko’alia kona-ba Jesus.”
Maibé la'os hanorin hotu-hotu ne’ebé uza Jesus nia naran mak hanorin kona-ba lia-loos Jesus Nian.
Tanba ne’e, bainhira ita rona hanorin ida, la presiza hirus ka halo diskusaun kedas. Halo buat simples sira tuir mai:
Para → Lee Bíblia → Husu Maromak → Kompara ho Maromak Nia Liafuan → Depois hili.
Mensajen importante:
Ita presiza aprende atu lee Bíblia loroloron no husu Espíritu Santu atu ita bele hatene Maromak Nia Liafuan atu bele halo diferensa entre hanorin ne'ebé loos tuir sagrada Biblia no hanorin sira ne'ebé falsu ka kontradiz ho Biblia.
Hanoin kona-ba banku. Bainhira ita hatene osan ne’ebé orijinal ka loos, ita bele fasil hatene osan ne’ebé falsu. Hanesan ne'e mós ho lia-loos Biblia nian. Bainhira ita hatene Maromak Nia Liafuan, ita bele fasil liu hatene hanorin ne’ebé la tuir Maromak Nia Liafuan.
Jesus dehan: “No imi sei hatene lia loos, no lia loos sei halo imi livre. João 8:32
Orasaun:
“Maromak ami-nia Aman Santu, iha mensajen barak iha mundu ne’e. Ajuda ami atu la simu hanorin hotu-hotu ho fasil. Fó ami dezezu atu lee Bíblia no aprende Ita-nia lia-loos. Fó Espíritu Santu atu guia ami-nia hanoin, atu ami bele hatene saida mak loos no saida mak sala. Ajuda ami atu nafatin tuir Jesus. Hodi Jesus nia naran ami harohan. Amén.”
Desafiu ba ohin
Loron ohin, se ita rona hanorin espirituál ida, tenke teste ho Maromak Nia lia-loos, labele simu kedas!.
Husu pergunta tolu:
“Saida mak Bíblia dehan?”
“Serake mensajen ne’e lori hau besik liu ba Jesus?”
“Serake hau bele prova ida-ne’e hosi Maromak Nia futarlia?”
Labele simu dutrina hotu-hotu tanba de'it saida mak ema dehan. Kompara dutrina hotu-hotu ho Bíblia.
🙏 MAROMAK FO BENSAUN🙏🏻
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com#AllThingsNew
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
Maluk sira ne'ebé Kristu hadomi,
Ami konvida ita-boot sira atu like, share no follow pájina Dalan ba Lalehan. Ami-nia misaun mak atu fahe Maromak Nia Liafuan ho língua ne'ebé simples no fasil atu nune'e ema hotu bele komprende mensajen salvasaun nian liuhusi Jesus Kristu
Favór like, follow, no share pájina ida ne'e ba ita-nia família no kolega sira. Atu nune'e, bele ajuda habelar lia-loos husi Maromak no tau esperansa ba ema hotu iha mundu tomak.
Obrigadu ba imi-nia suporta. Ha'u espera katak Maromak sei haraik bénsaun barak ba imi bainhira ita halo viajen espirituál hamutuk iha dalan ba lalehan.
Like • Follow • Share • Maromak fo bensaun! 🙏📖✨
