Espíritu Santu Sei Hanorin no Hatudu Dalan ba Ita

Leitura Bíblika: João 14:26

Maibé Ajudadór, katak Espíritu Santu, ne'ebé Aman sei haruka mai hodi Ha'u-nia naran, Nia sei hanorin buat hotu ba imi, no halo imi hanoin hetan buat hotu ne'ebé Hau dehan ona ba imi. João 14:26

                               João 14:26

Jesus la husik ita mesak

Maluk sira, ita hotu esperiensia tempu balu, ne'ebé ita haluha buat ruma. Dala ruma ita rona konsellu di'ak, maibé bainhira problema mosu, ita la hatene atu halo saida. Dala ruma ita lee Bíblia, maibé ita la komprende saida mak Maromak hakarak hanorin mai ita.

Iha João 14:26, Jesus fó promesa importante ida ba Nia dixípulu sira. Nia hatete katak Aman sei haruka Espíritu Santu atu hanorin sira no halo sira hanoin fila fali ba buat hotu ne'ebé Jesus hanorin ona.

1. Saida mak promesa ne'e signifika ba dixípulu sira iha tempu Jesus nian?

Iha tempu ne'ebá, Jesus hatene katak Nia sei la hela kleur tan ho dixípulu sira iha mundu. Nia sei terus, mate no fila ba Aman Maromak. Dixípulu sira sei hasoru difikuldade, persegisaun no situasaun ne'ebé sira la hatene oinsá atu rezolve.

Maibé Jesus la husik sira la ho esperansa. Nia promete Espíritu Santu atu hanorin no fó hanoin sira kona-ba Ninia liafuan sira 

Depois Jesus mate no moris-hi'as, dixípulu sira presiza komprende di'ak liu buat hotu ne'ebé Nia hanorin ona. Espíritu Santu ajuda sira atu komprende no fó kbiit ba sira atu fó sasin kona-ba Jesus.

Promesa ne'e mós ajuda ita atu komprende oinsá dixípulu sira bele hanoin no hakerek buat barak kona-ba Jesus Nia moris no hanorin sira iha Sagrada Eskritura.

2. Saida mak promesa ne'e signifika ba ita ohin loron?

Ohin loron, ita mós presiza Espíritu Santu. Nia ajuda ita atu komprende Bíblia, hanoin fila fali ba Jesus Nia hanorin sira no hili dalan ne'ebé loos.

Maibé ita tenke komprende katak Espíritu Santu la halo ita sai ema ne'ebé hatene buat hotu kedas. Ita presiza lee Bíblia, reza, aprende no aplika Maromak Nia liafuan iha ita-nia moris.

Ezemplu ida iha família: Karik ita-nia oan halo sala no ita sente hirus. Ita hakarak hakilar ka fó kastigu ho maneira ne'ebé bele hakanek nia. Maibé ita lembra Jesus Nia hanorin atu hadomi no trata ema seluk ho domin. Ita pauza, reza no husu Espíritu Santu atu ajuda ita kontrola ita-nia hirus. Depois, ita ko'alia ho ita-nia oan ho hakmatek no hanorin nia atu hadi'a nia sala.

Ezemplu ida iha servisu: Karik ita hetan oportunidade atu bosok atu hetan osan ka benefísiu. Espíritu Santu bele ajuda ita atu lembra katak Maromak hakarak ita moris ho onestu. Ita hili atu ko'alia loos, maski ita lakon benefísiu ruma.

Ezemplu ida iha tempu susar: Karik ita sente ta'uk tanba moras, problema família ka difikuldade ekonomia. Ita bele lee Filipense 4:6–7 no hanoin katak ita bele lori ita-nia preokupasaun ba Maromak iha orasaun. Espíritu Santu ajuda ita atu tau fiar ba Maromak no buka dalan atu enfrenta problema sira.

3. Oinsá ita bele rona Espíritu Santu?

Ita la presiza hein atu rona lian ida hanesan ema ko'alia mai ita. Ita bele husu Espíritu Santu atu guia ita bainhira ita lee Bíblia no bainhira ita tenke halo desizaun.

Ita bele halo buat tolu:

- Lee Bíblia loroloron. Hili versikulu balu no hanoin kona-ba saida mak versikulu sira-ne'e hanorin.

- Reza molok halo desizaun. Husu Maromak atu fó matenek no ajuda ita atu hili buat ne'ebé loos.

- Halo tuir buat ne'ebé Bíblia hanorin. Se ita hatene katak ita-nia hahalok ida sala, husu Maromak atu fó kbiit ba ita atu muda.

Importante atu hatene katak ita-nia hanoin ka sentimentu la'ós sempre mai husi Espíritu Santu. Tan ne'e, ita tenke sukat ita-nia hanoin ho Bíblia no buka matenek husi ema sira ne'ebé fiél ba Maromak ne'ebé iha esperiénsia.

Konkluzaun: Espíritu Santu ajuda ita atu lao iha Dalan ba Lalehan

Maluk sira, Jesus hatene katak ita sei hasoru problema iha moris. Tan ne'e, Nia promete Espíritu Santu atu hanorin no ajuda ita atu lembra Nia Nia liafuan.

Ita la presiza enfrenta moris mesak. Bainhira ita la hatene atu halo saida, fila ba Maromak iha orasaun. Bainhira ita lee Bíblia, husu Espíritu Santu atu ajuda ita komprende. Bainhira ita hetan tentasaun, husu Nia atu fó kbiit ba ita atu hili buat ne'ebé loos.

Dalan ba Lalehan. Jesus mak ita-nia dalan, no Espíritu Santu ajuda ita atu komprende Jesus nia hanorin no lao tuir Nia loroloron.

Ita bele halo orasaun hanesan ne'e:

“Maromak Aman, agradese ba Ita tanba Jesus la husik ami la'o mesak. Haruka Espíritu Santu atu hanorin ami, ajuda ami lembra Ita-nia liafuan no fó matenek ba ami atu halo buat ne'ebé loos. Ajuda ami atu hatudu Jesus Nia domin iha ami-nia família, servisu no komunidade. Guia ami atu kontinua la'o iha Dalan ba Lalehan. Iha Jesus nia naran, amém.”

🙏 MAROMAK FO BENSAUN🙏🏻

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com#AllThingsNew

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Maromak bolu mane no feto ne'ebé la perfeitu atu serbisu ba Nia.

Leitura Bíblika: Éxodu 15:20–21; Númeru 12:1–10; Miqueias 6:4

Ita hotu iha frajilidade. Dala ruma ita halo buat ne'ebé loos, maibé iha tempu seluk ita halo sala. Maski ita serbisu ba Maromak, ita mós sei bele halo sala. Maibé istória iha Bíblia hanorin mai ita katak Maromak kontinua hadomi ita no hakarak ajuda ita atu muda ita-niahahalok.

Maromak bolu mane no feto atu serbisu ba Nia.

Ita lee iha Éxodu 15:20–21 katak Miriam, profeta feto ida, lori feto sira atu kanta no dansa hodi fó agradese ba Maromak tanba Nia salva Israel iha tasi mean. Miriam uza ninia influensia lori ema sira haksolok no fó glória ba Maromak.

Iha Miqueias 6:4, Maromak temi Miriam hamutuk ho Moisés no Aaron, nu'udar ema sira ne'ebé Nia haruka atu lori povu Israel sai husi Ejitu. Ida-ne'e hatudu katak Maromak fó serbisu importante ba mane no feto.

Maibé, Miriam la perfeitu. Iha Númeru 12:1–2, Miriam no Aaron ko'alia kontra Moisés tanba nia kaben feto hosi Kus. Sira mós husu serake Maromak ko'alia de'it liuhusi Moisés. Miriam nia hahalok hatudu katak ema ida ne'ebé Maromak uza mós bele iha sentimentu inveja ka laran moras no orgullu.

Maromak korrije Miriam, no nia hetan kastigu (Númeru 12:9–10). Istória ne'e hanorin ita katak servisu ba Maromak la signifika katak ita bele halo buat hotu tuir ita-nia hakarak. Ita presiza aprende atu rona Maromak no simu koreksaun bainhira ita sala.

Esperansa saida mak ita bele aprende hosi istória sira-ne'e?

Primeiru, Maromak bele uza ita maski ita la perfeitu. Ita la presiza hein to'o ita sai ema ne'ebé la iha sala mak ita foin serbisu ba Nia. Maromak hakarak ita fó ita-nia tempu no kapasidade ba Nia. Maibé ita tenke husik Nia atu muda ita-nia karakter.

Segundu, bainhira ita sala, ita presiza simu koreksaun. Hanoin to'ok ba situasaun ida iha igreja ka iha uma. Karik ita ko'alia aat kona-ba ema ida tanba laran moras ka ita hakarak ema hotu respeita ita. Bainhira ema ida hatudu ita-nia sala, ita bele hirus ka buka atu defende ita-nia an. Maibé, ita bele hili dalan di'ak liu: rona ho hakmatek, rekoñese sala, husu deskulpa no hadi'a ita-nia hahalok.

Datoluk, ita la bele julga ema seluk nu'udar ema ne'ebé aat liu ita. Se Maromak uza ita-nia kolega, maibé la uza ita iha serbisu ne'ebé hanesan, la presiza laran-moras. Se ema seluk simu responsabilidade iha igreja, fó apoiu ba nia. Ita hotu iha serbisu ne'ebé diferente, maibé ita hotu serbisu ba Maromak no ita hotu presiza Maromak Nia grasa.

Dá-neen, ita bele fila fali ba Maromak bainhira ita monu ba sala. Ita-nia sala la signifika katak ita-nia moris remata ona. Se ita arrepende no husu Maromak nia tulun, Nia bele hanorin ita atu moris ho maneira foun. Iha 1 João 1:9, Bíblia promete katak bainhira ita konfesa ita-nia sala sira, Maromak fiél atu fó perdua ba ita no hamoos ita husi hahalok aat hotu.

Maluk sira, ita hotu presiza grasa.

La'ós profeta Miriam de'it mak presiza Maromak Nia grasa. Moisés, Aaron, profeta mane no feto sira, no ita mós presiza grasa ne'e. Maromak la bolu ita tanba ita perfeitu, maibé Nia bolu ita atu aprende, muda no serbisu ho laran-moos.

Bainhira ita sala, labele subar sala ne'e. Bainhira ita hetan koreksaun, labele rejeita kedas. Bainhira ema seluk sala, labele lalais kondena nia. Husu Maromak atu fó ba ita laran-ne'ebé haraik-an no hadomi ema hotu.

Dalan ba Lalehan. Dalan ne'e la'ós dalan ba ema ne'ebé hanoin katak sira perfeitu. Ne'e mak dalan ba ema sira ne'ebé rekoñese katak sira presiza Jesus, simu Nia grasa no husik Nia muda sira-nia moris.

Jesus mak ita-nia esperansa. Liuhusi Nia, ita bele simu perdua, aprende hosi ita-nia sala no kontinua lao iha dalan loos.

Ohin, husu ba ita-nia an: “Serake ha'u prontu atu simu Maromak Nia koreksaun no husik Nia muda ha'u?”

Husu Jesus atu haburas ita-nia fiar, hamoos ita-nia laran husi inveja no orgullu, no ajuda ita atu serbisu ba Nia ho domin no humildade.

Tanba iha Jesus, ema ne'ebé monu bele hamriik fali, ema ne'ebé sala bele hetan perdua, no ema ne'ebé fraku bele hetan forsa atu kontinua lao iha Dalan ba Lalehan.

🙏 MAROMAK FO BENSAUN🙏🏻

Click iha ne'e atu Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Saida mak signifika fó glória ba Maromak?

Leitura Bíblika: Apokalipse 15:4 

                          Apokalipse 15:4

Oh Nai, se mak la hamta'uk no fó glória ba Ó-nia naran? Tanba Ó mesak de'it mak santu. Nasaun hotu-hotu sei mai no adora Ó, tanba Ó hatudu ona Ó-nia hahalok loos. Apokalipse 15:4

Maluk sira, ita bele husu ba ita-nia an rasik: Saida mak signifika hosi fó glória ba Maromak? Serake liuhusi kanta iha igreja de'it? Ka ita bele fó glória ba Maromak iha ita-nia moris loroloron?

Apokalipse 15:4 hatudu katak Maromak mak santu, no nasaun hotu sei mai adora Nia. Loron ida, ema hotu sei hatene Maromak Nia kmanek no justisa. Maibé ita la presiza hein to'o loron ne'eba atu hahú fó glória ba Nia. Ita bele hahú ohin.

Oinsá ita bele fó glória ba Maromak iha ita-nia moris?

1. Fó glória ba Maromak liuhusi ita-nia hahalok.

Hanoin to'ok ba aman ida ne'ebé serbisu loroloron atu sustenta ninia família. Maski nia kolen, nia la bosok iha nia serbisu no la foti buat ne'ebé la'ós ninian. Nia halo nia knaar ho onestu tanba nia hatene katak Maromak haree nia.

Hahalok hanesan ne'e fó glória ba Maromak. Ema bele haree Maromak Nia karakter liuhusi ita-nia hahalok. Jesus dehan iha Mateus 5:16 katak ita-nia naroman tenke naroman iha ema hotu nia oin, atu sira haree ita-nia hahalok di'ak no fó glória ba Aman iha lalehan.

2. Fó glória ba Maromak liuhusi ita-nia liafuan.

Dala ruma, ita hirus no ko'alia liafuan ne'ebé hakanek ema seluk. Iha uma, ita bele ko'alia maka'as ba ita-nia kaben ka oan sira. Iha serbisu fatin, ita bele haksesuk malu tanba ita la konkorda malu ho kolega serbisu.

Maibé, bainhira ita husik Maromak muda ita-nia laran, ita hahú ko'alia ho domin no pasiénsia. Bainhira ita sala, ita husu deskulpa. Bainhira ema seluk sala, ita aprende atu perdua.

Liafuan ne'ebé di'ak bele lori dame ba família no komunidade. Ne'e mós dalan ida atu fó glória ba Maromak.

3. Fó glória ba Maromak liuhusi ita-nia desizaun.

Hanoin took ba estudante ida ne'ebé iha oportunidade atu kopia resposta husi nia kolega durante ezame. Nia bele hetan nota di'ak liuhusi dalan ne'ebé sala, maibé nia hili atu onestu.

Ka karik ita hetan ema seluk nia osan ne'ebé lakon. Ita bele rai osan ne'e ba ita-nia an, maibé ita hili atu buka nia na'in no fó fila fali.

Bainhira ita hili buat ne'ebé loos maski ita la hetan benefísiu, ita hatudu katak ita hadomi Maromak no hakarak halo tuir Nia.

4. Fó glória ba Maromak bainhira ita hasoru susar.

Dala ruma ita reza, maibé problema la lakon lalais. Ita bele hetan moras, lakon serbisu, ka hasoru problema iha família.

Iha tempu hanesan ne'e, fó glória ba Maromak la signifika katak ita tenke subar ita-nia triste. Ita bele tanis no husu ajuda. Maibé ita kontinua fiar katak Maromak la husik ita mesak.

Bainhira ita kontinua fiar ba Nia no buka Nia nia matadalan, ita hatudu ba ema seluk katak ita-nia esperansa la depende de'it ba situasaun ne'ebé ita hasoru.

5. Fó glória ba Maromak liuhusi serbí ema seluk.

Ita bele vizita ema moras, ajuda família ne'ebé kiak, rona no akompaña ema ne'ebé triste, ka hanorin labarik sira kona-ba Bíblia. Ita la presiza iha osan barak atu ajuda ema seluk. Dala ruma, tempu no liafuan di'ak mak buat ne'ebé ema presiza liu.

Bainhira ita ajuda ema ho domin no la buka atu ema gaba ita, ita hatudu Jesus Nia domin ba mundu.

Maluk sira, ita-nia moris bele sai adorasaun ba Maromak.

Fó glória ba Maromak la'ós de'it kanta, reza ka ba igreja. Ne'e signifika moris ho maneira ne'ebé hatudu ba ema seluk katak Maromak mak ita-nia Na'i. Ita-nia família, ita-nia serbisu, ita-nia liafuan no ita-nia desizaun hotu bele sai oportunidade atu fó glória ba Nia.

Labele hein to'o ita sai perfeitu mak ita foin hahú. Husu Maromak atu ajuda ita muda ita-nia moris loroloron.

Ita bele halo orasaun hanesan ne'e:

“Maromak, ami hakarak fó glória ba Ita. Ajuda ami atu ko'alia ho domin, halo buat ne'ebé loos, perdua ema seluk no fiar ba Ita iha tempu susar. Halo ami-nia moris sai naroman ba ema seluk, atu sira bele hatene Ita nia domin. Iha Jesus nia naran, amém.”

Bainhira ita la'o iha dalan ne'e, ita aprende atu hatudu Jesus nia karakter iha buat hotu ne'ebé ita halo.

Loron ida, ema hotu sei adora Maromak. Maibé ohin loron, ita bele hahú fó glória ba Nia iha ita-nia uma, iha ita-nia serbisu fatin no iha ita-nia komunidade.

Pergunta ba ita-nia an: Se ema sira haree ha'u-nia moris loroloron, serake sira bele haree Jesus nia domin iha ha'u?

Hahú ohin. Moris atu fó glória ba Maromak, no ajuda ema seluk atu hetan Dalan ba Lalehan. Amen.

🙏🌹🙏🌹🙏🌹🙏🌹🙏🌹🙏

Maluk sira ne'ebé Kristu hadomi, 

Ami konvida ita-boot sira atu like, share no follow pájina Dalan ba Lalehan. Ami-nia misaun mak atu fahe Maromak Nia Liafuan ho língua ne'ebé simples no fasil atu nune'e ema hotu bele komprende mensajen salvasaun nian liuhusi Jesus Kristu

Favór like, follow, no share pájina ida ne'e ba ita-nia família no kolega sira. Atu nune'e, bele ajuda habelar lia-loos husi Maromak no tau esperansa ba ema hotu iha mundu tomak. 

Obrigadu ba imi-nia suporta. Ha'u espera katak Maromak sei haraik bénsaun barak ba imi bainhira ita halo viajen espirituál hamutuk iha dalan ba lalehan. 

 Like • Follow • Share • Maromak fo bensaun! 🙏📖✨

click iha ne'e atu estuda Maromak ninia lia-fuan 

Read More