Leitura Bíblika: Éxodu 15:20–21; Númeru 12:1–10; Miqueias 6:4
Ita hotu iha frajilidade. Dala ruma ita halo buat ne'ebé loos, maibé iha tempu seluk ita halo sala. Maski ita serbisu ba Maromak, ita mós sei bele halo sala. Maibé istória iha Bíblia hanorin mai ita katak Maromak kontinua hadomi ita no hakarak ajuda ita atu muda ita-niahahalok.
Maromak bolu mane no feto atu serbisu ba Nia.
Ita lee iha Éxodu 15:20–21 katak Miriam, profeta feto ida, lori feto sira atu kanta no dansa hodi fó agradese ba Maromak tanba Nia salva Israel iha tasi mean. Miriam uza ninia influensia lori ema sira haksolok no fó glória ba Maromak.
Iha Miqueias 6:4, Maromak temi Miriam hamutuk ho Moisés no Aaron, nu'udar ema sira ne'ebé Nia haruka atu lori povu Israel sai husi Ejitu. Ida-ne'e hatudu katak Maromak fó serbisu importante ba mane no feto.
Maibé, Miriam la perfeitu. Iha Númeru 12:1–2, Miriam no Aaron ko'alia kontra Moisés tanba nia kaben feto hosi Kus. Sira mós husu serake Maromak ko'alia de'it liuhusi Moisés. Miriam nia hahalok hatudu katak ema ida ne'ebé Maromak uza mós bele iha sentimentu inveja ka laran moras no orgullu.
Maromak korrije Miriam, no nia hetan kastigu (Númeru 12:9–10). Istória ne'e hanorin ita katak servisu ba Maromak la signifika katak ita bele halo buat hotu tuir ita-nia hakarak. Ita presiza aprende atu rona Maromak no simu koreksaun bainhira ita sala.
Esperansa saida mak ita bele aprende hosi istória sira-ne'e?
Primeiru, Maromak bele uza ita maski ita la perfeitu. Ita la presiza hein to'o ita sai ema ne'ebé la iha sala mak ita foin serbisu ba Nia. Maromak hakarak ita fó ita-nia tempu no kapasidade ba Nia. Maibé ita tenke husik Nia atu muda ita-nia karakter.
Segundu, bainhira ita sala, ita presiza simu koreksaun. Hanoin to'ok ba situasaun ida iha igreja ka iha uma. Karik ita ko'alia aat kona-ba ema ida tanba laran moras ka ita hakarak ema hotu respeita ita. Bainhira ema ida hatudu ita-nia sala, ita bele hirus ka buka atu defende ita-nia an. Maibé, ita bele hili dalan di'ak liu: rona ho hakmatek, rekoñese sala, husu deskulpa no hadi'a ita-nia hahalok.
Datoluk, ita la bele julga ema seluk nu'udar ema ne'ebé aat liu ita. Se Maromak uza ita-nia kolega, maibé la uza ita iha serbisu ne'ebé hanesan, la presiza laran-moras. Se ema seluk simu responsabilidade iha igreja, fó apoiu ba nia. Ita hotu iha serbisu ne'ebé diferente, maibé ita hotu serbisu ba Maromak no ita hotu presiza Maromak Nia grasa.
Dá-neen, ita bele fila fali ba Maromak bainhira ita monu ba sala. Ita-nia sala la signifika katak ita-nia moris remata ona. Se ita arrepende no husu Maromak nia tulun, Nia bele hanorin ita atu moris ho maneira foun. Iha 1 João 1:9, Bíblia promete katak bainhira ita konfesa ita-nia sala sira, Maromak fiél atu fó perdua ba ita no hamoos ita husi hahalok aat hotu.
Maluk sira, ita hotu presiza grasa.
La'ós profeta Miriam de'it mak presiza Maromak Nia grasa. Moisés, Aaron, profeta mane no feto sira, no ita mós presiza grasa ne'e. Maromak la bolu ita tanba ita perfeitu, maibé Nia bolu ita atu aprende, muda no serbisu ho laran-moos.
Bainhira ita sala, labele subar sala ne'e. Bainhira ita hetan koreksaun, labele rejeita kedas. Bainhira ema seluk sala, labele lalais kondena nia. Husu Maromak atu fó ba ita laran-ne'ebé haraik-an no hadomi ema hotu.
Dalan ba Lalehan. Dalan ne'e la'ós dalan ba ema ne'ebé hanoin katak sira perfeitu. Ne'e mak dalan ba ema sira ne'ebé rekoñese katak sira presiza Jesus, simu Nia grasa no husik Nia muda sira-nia moris.
Jesus mak ita-nia esperansa. Liuhusi Nia, ita bele simu perdua, aprende hosi ita-nia sala no kontinua lao iha dalan loos.
Ohin, husu ba ita-nia an: “Serake ha'u prontu atu simu Maromak Nia koreksaun no husik Nia muda ha'u?”
Husu Jesus atu haburas ita-nia fiar, hamoos ita-nia laran husi inveja no orgullu, no ajuda ita atu serbisu ba Nia ho domin no humildade.
Tanba iha Jesus, ema ne'ebé monu bele hamriik fali, ema ne'ebé sala bele hetan perdua, no ema ne'ebé fraku bele hetan forsa atu kontinua lao iha Dalan ba Lalehan.
🙏 MAROMAK FO BENSAUN🙏🏻
Click iha ne'e atu Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment