Leitura Bíblica: Mateus 7:13–14
Jesus dehan:
Tama liu hosi odamatan kloot. Tanba odamatan luan no dalan boot sei lori ema ba mate, no ema barak tama liu hosi dalan ida nee. Maibee odamatan kloot no dalan kiik sei lori ema ba moris, no ema uitoan deit mak hetan dalan ida nee. Mateus 7:13-14
Saida mak Jesus hakarak hanorin ita ho liafuan dalan kloot?
Dalan kloot la'ós dalan físiku ida ne'ebé ki'ik. Jesus uza liafuan ne'e atu hanorin kona-ba dalan moris ne'ebé ita hili. Dalan luan mak dalan ne'ebé ema barak hili tanba fasil. Dalan kloot mak dalan ne'ebé presiza fiar, obedénsia no sakrifísiu atu tuir Jesus.
Dalan luan fasil, maibé nia finalidade aat
Iha moris loroloron, ita haree katak buat fasil dala barak ema barak gosta. Ezemplu, bainhira ema hotu halo buat ida, ita bele hanoin: “Se ema hotu halo, ha'u mós bele halo.”
Maibé se ema hotu ko'alia liafuan aat ka tolok, serake ita mós tenki ko'alia? Se ema hotu bosok atu hetan osan, serake ita tenki halo mós? Se ema hotu la respeita Maromak, serake ita tenki tuir sira? Se ema ruma hetan osan barak liuhusi komete adultériu ka fornikasaun, serake ita mós tenke halo?
Lae!.
Dalan luan mak bainhira ita dehan: “Ha'u sei halo buat saida de'it ne'ebé ha'u hakarak, mesmu kontra MaromakNia hanorin.” Maibé dalan ne'e bele lori ita ba problema, sala no ikusmai separasaun hosi Maromak.
Dalan kloot presiza desizaun
Dalan kloot mak bainhira ita dehan: “Ha'u desidi hakarak tuir Jesus, maski la fasil.”
Ezemplu: Bainhira ema ida halo aat mai ita, ita bele hili atu halo aat mós. Maibé Jesus hanorin katak ita tenke perdua.
Bainhira ita iha oportunidade atu simu subornu no bosok atu hetan osan, ita bele rejeita subornu no hili atu ko'alia lia-loos.
Bainhira ema ida la haree ita-nia hahalok sala, ita bele kontinua halo sala tan. Maibé ita hili atu halo buat ne'ebé loos maski ema la haree.
Bainhira ita hetan tentasaun atu halo buat ne'ebé imoral, ita bele dehan: “Ema barak halo buat ne'e.” Maibé ita hili atu dehan: “Ha'u labele halo ida ne'e tamba hahalok ne'e kontra Maromak Nia ukun-fuan”
Ida-ne'e mak dalan kloot.
Dalan kloot la signifika moris perfeitu
Ita tenki komprende buat ida: tuir dalan kloot la signifika katak ita nunka halo sala. Ita hotu bele monu ba sala. Ita hotu presiza Jesus. Ninia diferensa mak: bainhira ita monu, ita la hela nafatin iha sala ne'e. Ita fila ba Jesus, konfesa ita-nia sala, husu perdua no kontinua hala'o ita-nia moris ba oin.
Jesus la dehan, “Hili dalan kloot tanba ita forte.” Nia bolu ita atu tuir Nia tanba Nia mak bele fó ita forsa ba ita.
Oinsá ita bele hili dalan kloot ohin? Hahú ho buat ki'ik sira:
1. Lee Bíblia loroloron.
Maski versíkulu ida de'it, lee no hanoin kona-ba versikulune'e.
2. Reza molok halo desizaun.
Husu: “Jesus, serake buat ida-ne'e fo glória ba Jesus?”
3. Aprende atu dehan “lae” ba tentasaun.
La'ós buat hotu ne'ebé fasil no ema hotu halo mak di'ak.
4. Halo buat loos maski ema seluk la halo.
Maromak haree ita-nia fuan no ita-nia hahalok.
5. Bainhira ita monu ba sala, fila lalais ba Jesus. Keta halai hosi Maromak tanba sentimentu sala. Jesus hakarak ita fila ba Nia.
Dalan kloot dala ruma bele difisil. Maibé Jesus promete katak dalan kloot ne'e lori ita ba moris rohan-laek. Nia la husik ita lao mesak. Jesus hakarak la'o hamutuk ho ita iha dalan ne'e.
Ohin, ita iha escolla ida atu halo: tuir dalan luan tanba fasil, ka hili dalan kloot tanba ita hakarak tuir Jesus? Hili Jesus. Hili Nia dalan. Tamba dalan kloot, nia finalidade lori ba moris rohan-laek.
Ita-nia programa Dalan ba Lalehan hakarak ajuda ita hatene Jesus no la'o hamutuk ho Nia loroloron. Tanba Jesus mak dalan ne'ebé lori ita ba Lalehan.
🙏 MAROMAK FO BENSAUN🙏🏻
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com#AllThingsNew
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment