Leitura Bíblika: Números 11:19–20
La'os loron ida deit mak imi haan, la'os loron rua ka loron lima, no la'os loron sanulu ka loron rua-nulu, maibé to'o fulan ida, to'o buat ne'e sai hosi imi-nia inus no imi baruk, tanba imi rejeita ona Nai ne'ebé iha imi nia leet, no imi tanis iha Nia oin, no hatete, “Tanbasa mak ita sai hosi Ejitu?”’ Númeru 11:19-20
Ita hotu hakarak hetan buat di'ak iha ita-nia moris. Ita hakarak saúde di'ak, família ne'ebé hakmatek, serbisu, osan natoon no moris ne'ebé fasil. La sala atu husu buat sira-ne'e ba Maromak. Maibé, ita tenki kuidadu atu la husik ita-nia hakarak ba buat barak liu, domina ita-nia fuan.
Iha Números 11, ita haree povu Israel ne'ebé la kontente ho Maromak Nia bénsaun. Maromak hasai sira hosi Ejitu, liberta sira hosi ukun-aat Faraó nian, no lori sira ba rai-fuik. Iha ne'ebá, Maromak fó maná hosi lalehan loroloron atu sira bele han.
Maibé, povu Israel komesa murmura. Sira hanoin fila-fali ba hahán ne'ebé sira han iha Ejitu. Sira husu na'an, no la kontente ona ho maná ne'ebé Maromak fó ba sira.
Iha Números 11:19–20, Maromak hatete katak sira sei han na'an durante loron barak, to'o sira sente bosu no injua. Problema boot la'ós de'it sira hakarak na'an, maibé sira haluha ona buat barak ne'ebé Maromak halo ba sira. Sira haree buat ne'ebé sira seidauk iha, maibé haluha buat ne'ebé Maromak fó ona.
Ita mós bele iha atitude hanesan ne'e. Dala ruma, ita agradese ba Maromak bainhira ita simu buat foun. Maibé, depois tempu balu, ita komesa hakarak buat seluk tan. Ita iha uma, maibé hakarak uma boot liután. Ita iha servisu, maibé la kontente ho saláriu ne'ebé ita iha. Ita iha hahán atu han, maibé kompara ita-nia moris ho ema seluk ne'ebé iha buat barak liu.
Ita bele sai ema ne'ebé sempre kompara ita-nia an ho ema seluk, sempre murmura no la kontente. Bainhira ida ne'e akontese, ita-nia matan haree de'it buat ne'ebé falta, no la haree ona bensaun ne'ebé Maromak fó.
Saida mak ita tenki halo atu evita atitude ne'e?
Primeiru, aprende agradese ba buat ne'ebé ita iha. Bainhira ita han, hanoin kona-ba ema sira ne'ebé la iha hahán. Bainhira ita iha família, agradese ba Maromak tanba ita iha sira. Maski ita-nia moris seidauk perfeitu, iha buat barak ne'ebé ita bele agradese.
Segundu, la kompara ita-nia moris ho ema seluk. Ema ida-idak iha ninia situasaun rasik. Maromak hatene ita-nia nesesidade. Ita la presiza moris atu halo ema seluk hakfodak ka surpreza.
Terseiru, aprende kontente ho buat ne'ebé Maromak fó, no kontinua servisu ho responsabilidade. Kontente la signifika katak ita la bele iha objetivu ka buka moris ne'ebé di'ak liu. Signifika katak ita la husik ita-nia hakarak ba buat foun halo ita haluha Maromak nia bénsaun no la agradese ba Nia.
Maun-alin sira, iha pergunta ida ba ita atu hanoin: “Se Maromak la fó ha'u buat ne'ebé ha'u hakarak ohin, serake ha'u sei kontinua agradese no fiar ba Nia?”
Labele hein to'o ita hetan buat hotu mak ita hakarak atu foin fó agradese ba Maromak. Agradese ba Nia agora, tanba buat ne'ebé ita iha ohin loron mós mai hosi Nia.
Iha programa Dalan ba Lalehan, ita aprende katak dalan ba moris rohan-laek la'ós dalan atu buka buat hotu ne'ebé ita hakarak, maibé dalan atu fiar ba Maromak, agradese ba Nia no kontente ho Nia bensaun loroloron.
🙏 MAROMAK FO BENSAUN🙏🏻
Click iha ne'e atu Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment