EMA moras presiza doutór, EMA maksalak presiza Jesus

Depois neʼe, bainhira Jesus han hela iha Mateus nia uma, kobradór impostu barak no mós sala-naʼin sira mai han hamutuk ho Jesus no ninia dixípulu sira. Maibé, bainhira ema Farizeu haree ida-neʼe, sira hatete ba Jesus nia dixípulu: “Tanbasá mak imi-nia mestre han hamutuk ho kobradór impostu no sala-naʼin sira?” Rona tiha neʼe, Jesus hatete: “Ema neʼebé isin-diʼak la presiza doutór, maibé ema moras presiza. Tan neʼe, imi laʼo bá no buka-hatene liafuan sira-neʼe katak sá: ‘Haʼu hakarak laran-sadiʼa, laʼós sakrifísiu.’ Tanba haʼu mai laʼós atu bolu ema diʼak, maibé atu bolu ema sala-naʼin.” Mateus 9:10-13

Hafoin Na'i Jesus bolu Nia (Mateus 9:9), Mateus lori nia kolega sira mai rona Na'i Jesus nia hanorin.

Nia hatene tuir Nia esperiensia ounsá Na'i Jesus Nia grasa bele ajuda Nia kolega sira ne'e no Na'i Jesus sei la rejeita sira.

Ba sira ne'ebé hatene Na'i Jesus Nia hanorin, hatene Maromak Nia grasa, labele subar ba ita nia an de'it maibé tenki konvida mós ema seluk ba Na'i Jesusatu hatene Nia hanorin.

Ba sira ne'ebé fiar an katak sira nia klamar saudavél, sei la presiza Doutór boot espirituál nian.  Iha kazu Ida ne'e, Ema Farizeu sira mak sira rejeita Na'i Jesus tanba sira hanoin sira saudavél (realidade bele oin seluk); maibé ema Kobradór impostu no peskadór sira  hanoin katak sira presiza tebes Na'i Jesus Nia hanorin.

Ita dala barak, hanoin katak ita la iha sala. Maibé realidade mak la iha ema ida mak libre hosi sala. Maromak Nia liafuan iha Roma 3:23 hatete katak "Ema hotu halo ona sala no lakon ona Maromak nia glória" Dala ruma ita Nia liafuan hatete katak ita Sala la iha maibé ita nia asaun hatudu oin seluk.

Ita dala barak la kontenti hó ema seluk tanba sira nia status sosiál iha sosiadade nia laran. Liuhosi Na'i Jesus Nia aproximasaun ba ema maksalak sira tamba Nia laran sadi'a ba ema Sala na'in sira.

Liafuan di'ak Na'i Maromak nian, hanorin ita atu muda ita nia hanoin no dalan ne'ebé la loos ba dalan Maromak nian.

Se karik, ita senti katak ita sala la iha, ita la presiza Na'i Jesus mai ba ita nia moris.

Mai ita halo diagnosa ba ita nia an, atu nune'e ita bele hatene ita Nia moras no bele halo tuir Doutór boot Nia resep.

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Mateus 9:12