Keta fó buat neʼebé santu ba asu, no mós keta soe imi-nia pérola ba fahi sira

Keta fó buat neʼebé santu ba asu, no mós keta soe imi-nia pérola ba fahi sira-nia oin, tanba sira sei sama deʼit no fila hodi ataka imi. Mateus 7:6

Iha versu ida ne'e, Na'i Jesus refere ba liafuan di'ak sira ne'ebé Na'i Maromak revela ka hatudu ona ba ita tanba Nia domin no grasa

Iha ai-knanoik Na'i Jesus nian iha Mateus 13, Nia koalia kona-ba  negosiadór Ida ne'ebé deskobre Perola furak Ida no Nia fa'an buat hotu ne'ebé Nia iha atu Sosa Perola nee,  (Mateus 13:45-46).

Dalabarak ita lee Bíblia, Na'i Maromak loke ita nia kompriensaun kona-ba versu ne'ebé ita lee. Ida ne'e hanesan ita hetan Perola furak Ida. Nó ita labele fahe Perola furak ne'e ba kualker ema, liuliu sira ne'ebé lakoi atu simu.

Karik ita ba fahe Maromak Nia liafuan ba ema ne'ebé la fiar no lakoi halo tuir, sira sei goza tan ita. Aat Liu tan sira sei baku ka oho tan ita. Tanbasá? Tanba sira kompara Lia Loos Bíblia hó dutrina  relijiaun nian ne'ebé dalaruma kahur ona ho tradisaun ne'ebé la'os mai hosi Sagrada bíblia.

Na'i Jesus dehan "Ema ida labele hakbesik haʼu se Aman neʼebé haruka haʼu mai la dada nia, no haʼu sei fó moris-hiʼas ba nia iha loron ikus. João 6:44. Tan ne'e karik ita fahe Maromak Nia liafuan di'ak no ema lakoi simu, lalika obriga, tanba Na'i Jesus dehan  "Keta fó buat neʼebé santu ba asu, no mós keta soe imi-nia pérola iha fahi sira-nia oin, tanba sira sei sama deʼit no fila hodi ataka imi" Mateus 7:6

Iha ezemplu Barak, bainhira Paulo Haklaken no ema Judeu sira baku Nia no Nia tenki husik Hela sira no la kontinua Haklaken.

Porezemplu:
Iha Antiokia, Pisidia
Iha loron Sábadu tuirmai, besik ema hotu iha sidade neʼe halibur hamutuk atu rona Na'i nia liafuan. Kuandu ema Judeu sira haree ema-lubun neʼe, sira sai laran-moras tebes no hahú koʼalia aat hodi kontra buat neʼebé Paulo dehan. Tuirmai, Paulo no Barnabé ho aten-brani dehan ba sira: “Maromak nia liafuan tenke fó sai uluk ba imi. Maibé tanba imi la simu ida-neʼe, imi hatudu sai ona katak imi la merese atu hetan moris rohan-laek. Neʼe duni, agora ami fó sai fali ida-neʼe ba ema husi nasaun seluk. Tanba Na'i haruka ami ho liafuan sira tuirmai neʼe: ‘Haʼu hili ona ó nuʼudar naroman ba nasaun sira atu ó lori salvasaun toʼo rai hotu iha mundu tomak.’ Apostolu 13:45-46

Iha Korinto:
Bainhira Silas no Timóteo tun mai ona husi Masedónia, Paulo uza nia tempu tomak hodi haklaken Maromak nia liafuan no fó sasin ba ema Judeu sira atu hatudu katak Jesus mak Kristu. Maibé bainhira sira kontra nafatin nia no koʼalia aat hasoru nia, nia liki ninia roupa no dehan: “Husik imi-nia raan fila fali ba imi-nia ulun. Haʼu la iha sala.Husi ohin ba oin, haʼu sei bá ema husi nasaun seluk.  Entaun, nia muda husi neʼebá no bá Tísio Justo nia uma. Ema neʼe adora Maromak no ninia uma iha sinagoga nia sorin. Apostolu 18:5-7

Molok Na'i Jesus fila fali mai ba dala rua,  haklaken liafuan di'ak nafatin. Haklaken ne'e ema Kristaun hotu nia devér. Na'i Jesus dehan "No  liafuan diʼak kona-ba Maromak nia reiñu iha mundu tomak nuʼudar sasin ba nasaun hotu, depois neʼe, mundu nia rohan sei to'o mai. Mateus 24:14

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Mateus 7:6