Iha versu ne'e Na'i Jesus konvida ita sira ne'ebé kolen atu mai ba nia. Ita sira ne'ebé kolen tanba serbisu maka'as. Ita mós kolen tanba ita serbisu mesak de'it no depende de'it ba ita nia forsa rasik. Dala ruma ita kolen tanba ita nia prioridade ne'ebé sala. Dala ruma ita nia kompriensaun ne'ebé sala kona-ba saida mak Maromak hakarak. Dala ruma mós ita halo ona buat ne'ebé sala.
Jesus bolu ita sira ne'ebé kolen atu mai ba Nia no Nia promete sei fo kman, deskansa no refreshment ba ita nia klamar. Na'i Jesus la halo promesa mai ita atu deskansa hosi serbisu, maibé versu ne'e ko'alia kona-ba aprende no serbisu. Iha versu tuir mai (iha Mateus 11:29.... Lori haʼu-nia ai-leba no aprende husi haʼu, tanba haʼu laran-maus no haraik an, no imi sei sente kmaan) Na'i Jesus konvida ita atu foti Nia ai-leba (Ai-leba iha ne'e iha versaun Ingles karik "yoke", yoke ne'e mak ai ne'ebé ema tau iha karau rua nia kakorok ne'ebé uza ba fila rai). Ai-leba (yoke) iha ne'e nudár instrumentu serbisu nian.
Ai-leba mak instrumentu to'os nian ne'ebé junta animál rua hanesan karau hamutuk atu fahe todan ne'ebé hanesan no bele produtivu liu. Dala ruma, agrikutór sira tau animál ne'ebé iha esperiensia ona junta hamutuk hó ida ne'ebé ladún iha esperiensia atu nune'e animál ne'ebé la iha esperiensia bele aprende hosi ida ne'ebé iha esperiensia bainhira sira serbisu hamutuk.
Liuhosi ilustrasaun ida ne'e, Na'i Jesus husu ita atu fahe no sai Nia parseiru iha Nia obra, iha Nia misaun no serbisu. Nia mós promete mai ita Katak Nia sei hanorin ita no sei fó kman ba ita
Karik agora dadauk, ita iha problema ruma ne'ebé ita senti todan, labele lori mesak, maibé fahe hó Na'i Jesus..... Mai ba haʼu, imi hotu neʼebé kole tanba serbisu makaʼas no lori naha todan. Haʼu sei fó kmaan ba imi. Mateus 11:28
Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan
 |
| Mateus 11:28 |
0 comments:
Post a Comment